On kantik David maké.
1 Véyé anlè mwen, Bondyé, davwa mwen pran pwotèksyon adan’W.
2 Mwen di YHWH : “Ou sé Sényè an-mwen ; Ou sé sa ki pli bon pou mwen.”
3 Mwen di asi moun sen ki anlè latè : “Sé moun ki bon, adan yo mwen ni tout plézi.”
4 Séla ki dèyè fo dyé, yo ni pou jwenn plis malè ; mwen pa pou koulé ofrann nan san pou yo, lèv an-mwen pa pou nonmé non a-yo.
5 YHWH, Ou sé mòso-la mwen trapé é koup diven-la mwen kyenbé ; Ou asiré on mòso-tè apa pou mwen.
6 Bòn a-y tonbé on bon koté pou mwen ; mi, mwen trapé on bèl éritaj!
7 Mwen ké béni YHWH ki ban mwen bon konsèy ; menm lannuit kyè an-mwen ka aprann mwen lavi.
8 Mwen ni YHWH nan zyé toulongalé ; lè I asi lanmen dwèt, mwen pa ka branné.
9 Pou sa, kyè an-mwen kontan, é nanm an-mwen ka réjwi ; kò an-mwen osi ké pozé alèz,
10 Davwa Ou pé ké kité nanm an-mwen nan bitasyon-lanmò, ni lésé Fidèl a-W pouri anba tè.
11 Ou ké fè mwen konnèt chimen a lavi ; la, tini plen lajwa nan prézans a-W, é plézi pou toujou nan dé men a-W.
Ajouter un commentaire
Commentaires