WAYÒM A SYÈL-LA
SÉ KI SA?
Byen konprann sa Jézi té vlé di pa "Wayòm a Syèl-la", sé on biten ésansyèl adan spirityalité krétyen. Wayòm a Syèl-la té on dékatman anmitan misyon a-Y lè I té a préché. Pa "Wayòm a Syèl-la", Jézi té ka palé on nivo apa adan konsyans a moun, pa on koté koté moun krétyen dèstiné apré lanmò.
Malérèzman, piplis légliz ofisyèl é savan adan rèlijyon jòdi-jou, yo pa ka konprann lidé a Jézi asi sa ki Wayòm a Syèl-la. Lè ou sèvi Mè-Téréza épi Jézi pou ègzanp, nou ka vwè dé pli gran karaktéristik adan konsyans senp pou Wayòm a Syèl-la, sé on lyannaj san séparasyon antrè Bondyé é lézòm, é on lyannaj san séparasyon antrè lézòm yonn èvè lòt.
Pou nenpòt krétyen ki séryé nan lavi spirityèl, byen konprann sa ki Wayòm a Syèl-la sé on kèsyon ki fondamantal. Pou di vré, pli gran érè é danjé spirityèl nou ki krétyen ka fè, sé lè nou pa kapab konprann sa Jézi té vlé di pa "Wayòm a Syèl-la" épi "Wayòm a Bondyé". Sé on érè ki tèlman senp, paskè lè nou fè'y, i ka méné lavi spirityèl an-nou asi mové chimen-la pou larèstan vi an-nou, èvè malérèzman onpil konsékans kilès nou ké pétèt rann nou kont apré nou mò.
Piplis moun ki krétyen konprann-di Wayòm a Syèl-la sé on koté, é si nou ka méné on lavi moral nou ké antré adan Wayòm a Syèl-la apré nou mò. Onpil krétyen jòdi-jou ka jwenn soutyen pou kwayans-lasa adan on-kounan liv ki fini parèt dépi apépré ven lanné pasé kilès ka palé "èspéryans toupré-lanmò" (NDE an anglé, EMA an fransé) koté moun ki manké mò é ki viré byen. Sé èspéryans-lasa ki dokimanté ka sanm byen montré ki, apré lanmò, nou k'alé on koté ki plen èvè lanmou, limyè, lapé, é lajwa, koté-la nou krétyen ka kriyé anjénéral, "syèl"...
Sèlman nou fè on érè ki mové toubònman, adan mannyè nou ka grandi adan lèspri, lè nou ka kwè "syèl-lasa" apré lanmò sé sa ki Wayòm a Syèl-la kilès Jézi dédyé près tout misyon a-Y pou préché é palé nou. Mé a pa sa. Menmsi, Jézi ka fè moun sav tini on syèl (oben on paradi) apré lanmò, a pa asi syèl-lasa I té pran tout tan a-Y préché, mé asi Wayòm a Syèl-la kilès I té di té la, é aprézan toupré, "pré lanmen" (Mak 1:15).
Mésaj prensipal kilès Jézi té méné ban nou sé té Lévanjil oben "Bon Nouvèl" a Wayòm a Syèl-la. Matyé, sila ki maké prèmyé tèks Lévanjil la, ka koumansé rakonté misyon piblik a Jézi èvè sé pawòl-lasa : "Dépi moman-lasa Jézi koumansé préché é di konsa, "Rèpanti (Chanjé lidé a-zòt), davwa Wayòm a Syèl-la pré lanmen"-" (Matyé 4:17). Pa "pré lanmen" Jézi vlé di "kotésit", "douvan nou-menm", "anmitan nou".
Yonndé vèsé pli lwen, Matyé maké, "Jézi alé toupatou nan Galilé, ka ansényé adan sinagòg a-yo, ka préché Bon Nouvèl a Wayòm-la, é géri moun èvè tout kalité malèz é maladi" (Matyé 4:23). Adan Prèch-la anlè Mòn-la, Jézi dékri ki kalité moun ki ka rété adan Wayòm a Syèl-la, ki sé moun ki dous, moun ki ni konpasyon, sé moun ki ni kyè pwòp (Matyé 5:1-10). I di nou konsa, nou ni pou "chèché an prémyè" Wayòm a Syèl-la (Matyé 6:33), ki vlé di, réyalizasyon a Wayòm a Syèl-la sé dwèt prensipal bik adan lavi a chak krétyen. Li-menm pwomèt sé prèmyé disip-la, yo ké gouté'y avan yo mò.