RÉNYON

LARÈL KRÉTYEN VIVAN

On krétyen vivan ni pou sanblé pou glorifyé Bondyé pou mannyè Sila ki Mèt ka sèvi'y pou fè volonté a-Y asi latè kon nan syèl.

  • Nou ka konfésé péché an-nou, pou nou manifèsté wayòm a-Y
  • Nou ka adoré e louwé'Y èvè lèspri an-nou, pou nou santifyé non a-Y
  • Nou ka pétisyonné é priyé'Y èvè kyè an-nou, pou nou fè volonté a-Y

Two souvan nou ka anni sanblé é ka pran chanté san menm konsidéré nou tini kèk biten ki kapab fè lofrann an-nou pa asèptab douvan Bondyé. Sé pou sa Pawòl a Bondyé ka montré nou konfésé péché an-nou, délè nou ni pou fè'y yonn ba lòt, pou nou sav tout moun péchè é pou nou aprann pa jijé moun oben kwè nou-menm méyè ki lézòt.

Nou ka bésé kyè an-nou avan nou glorifyé Bondyé, menm jan sé zanj-la é sé vennkat ansyen-la ka bésé é voyé kouwòn a-yo nan pyé a Bondyé, avan yo glorifyé non a-Y.

Apokalips 10:10-11: Sé vennkat ansyen-la pliyé jounou é adoré douvan Sila ki sizé anlè twòn-la, Sila ki ka viv toujou é pou toujou. Yo voyé kouwòn a viktwa a-yo douvan twòn-la épi yo di, "Ou mérité, Sényè Bondyé an-nou, rèsouvwè laglwa, lonè, é puisans, davwa Ou kréyé tout biten ; é sé pa volonté a-W yo ègzisté é yo té kréyé".

Konsa, lasanblé ka fèt nan 3 tan :

  • Konfésyon, prézantasyon é ansènyman nan komandman a Bondyé
  • Adorasyon, louwanj é révélasyon nan pawòl a Bondyé
  • Pétisyon, priyè é aksyon-gras nan souvrenté a Bondyé

1. Tan konfésyon

  • Nou ka konfésé péché an-nou, pannan nou ka rèsouvwè ansènyman é dékatman sajès.
  • Nou ka trapé konnésans adan on mésaj ki pou rann solid nan lafwa é béni Bondyé pou pawòl a-Y.
  • Nou ka prézanté moun douvan Bondyé, pou lasanté fizik oben spirityèl.
  • Nou ka batizé moun non a Latrinité oben prézanté timoun pou yo toujou nan kyè a Bondyé.

2. Tan adorasyon

  • Nou ka louwé, glorifyé, é adoré Bondyé, pannan nou ka kouté pasaj ki tiré nan Pawòl a-Y.
  • Nou ka atann an silans pou I béni kyè an-nou èvè lèspri é lapé pou nou kontanplé sa I yé.
  • Nou ka palé nan Lèspri palé é tèsté pawòl di ki, pou trapé révélasyon pou légliz, oben nou-menm.
  • Nou ka prézanté fè lofrann sakrifis oben nenpòt don nati, pou pèrmèt wayòm a Bondyé vansé.

3. Tan pétisyon

  • Nou ka pétisyonné Bondyé pou I sové moun isi é nan lèmonn, anmitan aksyon gras pou tousa I ka fè.
  • Nou ka priyé pou volonté a-Y fèt asi latè kon i fèt nan syèl, atravè konmisyon nou ka fè.
  • Nou ka mandé sa nou bizwen pou sèvi'Y, é pou I gadé nou nan dé men a-Y.
  • Nou ka kominyé ansanm èvè pen-la é diven-la. pou nou sonjé sa I fè pou nou é pou lèmonn antyé.