KONTAK

A KI MWEN?

Mwen sé on ti nonm Bondyé sové é kilès I aprann maché nan Pawòl a-Y é Lèspri a-Y, magré sa pa fasil. 

I ban mwen lanmou pou Li, pou wayòm a-Y, pou limanité, mé osi pou lang kréyòl-la.

Sé atravè li, mwen désidé délivré Bon-Nouvèl la, é tout pawòl ki nésésè pou nou maché drèt anmitan lèmonn ki mové.

San konsidéré légliz a nonm, Légliz a Bondyé sé yonn ki :

• katolik (inivèsèl), ki vlé di nou ka kwè Bondyé ni onsèl pèp asi latè, san gadé lasanblan, mé plito kyè a-yo.
• owtodòks (bon dòktrin), ki vlé di nou ka suiv larèl é kwayans tradisyonnèl ki asèpté nan lafwa krétyen.
• évanjélik (bon nouvèl a wayòm-la), ki vlé di nou ka kwè adan bon nouvèl la Jézi té préché, lafwa ki ka sové lézòm ki ka kwè adan'Y.

Kwayans nan tout pawòl adan non a YHWH, é ki ka glorifyé Li tousèl. I kriyé nou jòdi-jou pou maché èvè Lèspri anmitan on ras moun ki pa enmé limyè-la ni pawòl a-Y, sé pou nou pran swen a séla ki nan tout kalité soufrans, mé kilès Bondyé vlé touché.

Nou sé zanfan a Bondyé, é nou pa andwa kité kò an-nou pri nan zatrap a moun ki pa ka vwè oben tann sa Lèspri a Bondyé ka di. Jézi vlé nou travay nan lèmonn èvè'Y, épi nou k'alé èvè moun ki vlé. Sa ki pa vlé, sé pa zafè an-nou.