LÉGLIZ DLO VIVAN

A KI SA ?

Légliz sé on sanblé a moun lib ki pa awogan é modès nan lèspri adan lafwa nan sovasyon Jézi pòté adan lèmonn pou woté lézòm adan lanfè koté yo tout k'alé davwa yo tout pri anba men a Satan.

Yo tout ni pou bwè dlo vivan kilès sèl Bondyé ka bay.

Konsa yo pa ka chèché on rèlijyon mé plito on rèlasyon èvè Bondyé ki Pli-Ho.

  • Sé moun ki ka fasonné on kilti krétyen spésifik pou pèp a-yo, é ka maché adan on fondasyon tradisyonnèl miganné èvè on lèspri nouvoté pou jòdi-jou.
  • Sé moun ki mayé adan Pawòl-la Bondyé té révélé dépi an tan lontan é pou toujou, mé gidé nan sa Lèspri a Bondyé ka di jòdi-jou é chak jou.
  • Sé moun ki ka vwè légliz a-yo fèt nan zouvraj ki pou glorifyé Sényè-la san yo anchenné pa lézòm, mé plito lib nan Lèspri.
  • Sé moun ki plen difé pou ba lézòt on lanmen, ka anbraré lòt nan pwotèksyon, pou sové péyi-la èvè chak gout-dlo Lèspri-Sen ka bay jou apré jou.

Mi sa ki légliz, on pèp sové ki la pou Bondyé sové lézòt, pa on batiman ni on sanblé a moun ki la pou yo-menm.

Jézi-Kri préché WAYÒM A SYÈL-LA, épi sé sa nou pou chèché san janmé fatigé.

 Jan 7:37-39: Dènyé jou-la, méyè moman nan fèstival-la, Jézi doubout é kriyé ba foul-moun la, "Nenpòt moun ki swèf, vini jwenn mwen! Nenpòt moun ki kwè adan mwen, vini bwè! Davwa Lékriti, yo ka déklaré, 'Rivyè dlo vivan ké koulé dépi kyè a-y."'  (Lè I palé "dlo vivan", i té ka palé Lèspri-la, kilès Yo té pou ba tout moun ki kwè adan'y. Mé Yo pòkò té bay Lèspri-la, davwa Jézi pòkò té antré nan glwa a-y.)

POUKISA ?

Adan Lékriti, Jézi té jwenn on fanm obò on pi-dlo, é té palé'y asi dlo-la Li-menm ka ba lézòm, on dlo vivan. Sé gras a fanm-lasa tout vilaj a-y té kwè adan Jézi akòz pawòl I té di ; yo mété lafwa adan'Y pli fasilman pasé sé Juif-la ki té kwè magré onpil mirak I té fè. Tout krétyen ni pou dévlopé on lèspri a moun Samari.

Lè ou ka li Labib, réjyon Samari kilès té nonmé Sikèm avansa, sé té prèmyé koté Abraham bati on lotèl ba Bondyé, sé nan réjyon-lasa Abraham kontré Bondyé ora sé pyé-chenn la. Mé an tan a Wayòm Onò (Izrayèl), sé tribi-la té ka adoré dòt divinité é yo té mélanjé èvè payen, kifè sé Juif-la té ka méprizé yo an tan a Jézi.

Jan 4:14: “Mé nenpòt moun ki ka bwè dlo-la mwen ké ba'y la, i pé ké janmé swèf ; mé dlo-la mwen ké ba'y la ké vini adan'y on pi-dlo ka jayi nan lavi étènèl.”

Époutan Jézi pa dévwè yo ; sé pou sa I té préché nan Samari é jwenn fanm-la obò pi-dlo la. Jézi sèvi Samariten adan on parabòl I té bay pou ansényé sa Bondyé ka èspéré.

Istwa-la ka rakonté on nonm Samari ki té pran swen a on voyajè kilès yonndé bandi té kité alanmò anmitan chimen apré yo té ataké'y. Dé chèf rélijyon juif té pasé avan la, mé yo pa té lévé nonm-la di gad, mé sé té yenki on Samariten-la (kilès sé Juif-la té ka méprizé) ki té pran konpasyon pou nonm-la, é té fè onpil biten plis pasé sa i té oblijé. I pasé luil anlè bobo a-y, ba'y dlo pou bwè, lévé'y é mété anlè boukèt a-y é li-menm maché apyé ; i méné nonm-la adan on lotèl, péyé pou chanm-la é pou larèstan (manjé, bwè, éks.) épi i jis pwomèt péyé sa i ké douwé lè i ké viré apré yonndé jou (ki vlé di i pé ké obliyé nonm-la mé ké viré ba'y on vizit). 

Zakari 14:8: “Jou-lasa, dlo vivan ké koulé dépi adan Jérizalèm…”​.

Tousa sé on lèson pou nou konprann, a pa moun ki nan rèlijyon oben séla ki ka chèché mirak a Bondyé ki ka kwè adan'y pou vré. Sé plito séla ki ka kwè é asèpté pawòl a-Y nan kyè a-yo, é ki ka pran swen a moun ki nan détrès toupannan yo ka maché asi latè nan dirèksyon a Jérizalèm-la ki nan syèl. Anfendikont, nou ka vwè Bondyé pa ka méprizé moun lézòm pa ka lévé di gad ; okontrè I ka fè yo gras plis pasé séla ki kwè yo ni onlo.

Mi poukisa légliz asi latè, sé pou pwoklamé wayòm a Bondyé adan zouvraj pèp a-Y ka fè jou apré jou, jistan I déviré. Bondyé vlé zanfan a-Y patisipé nan sa I ka fè, davwa sa ka fè'Y plézi.

Témwen 5:11-15: Mi i di : Tann épi vwè! Sé ja-dlo la ki ka rèprézanté senk kontinan, mi yo vid, vid san Lèspri! Kimoun ké vini é ranpli yo? Lamenn, on nonm parèt kon miraj nan dézè, épi mwen gadé’y ka vini pa-koté nou. I té abiyé kon nomad, moun ki ka rété nan dézè. I té abiyé èvè on soutann long é kako klè, épi i té ni on vwèl menm koulè alantou tèt a-y. Nonm-la vini jis koté nou té doubout, ka pòté on sizyèm ja anlè zépòl gòch a-y. Kon i viré ora sé ja-la, dépi sila i té ni la, i vidé dlo adan chak ja, pou yo-chak té trapé menm kantité dlo, pou pa yonn adan yo pa trapé mwens dlo ki on dòt. I té ka pran pokosyon adan travay a-y, pou onsèl tigout-dlo pa té gaspiyé. Sibitman, adan sé ja-la ki té vid avansa, mwen vwè ka sòti alakous on-pakèt tibèt ka sanm zandoli, mabouya, é tout kalité tibèt ka trenné atè.

Bondyé ka voyé dlo vivan a-Y (Lèspri-Sen) adan lèmonn pou chasé tousa ki mové. Sé Jézi-Kri ki ka bay dlo-lasa, sé Li ki ka viyé Lèspri-Sen ki pou glorifyé'Y anmitan tout nasyon.