Sòm 25

Ta David.

1  Adan’W, YHWH, mwen ka pran kyè.

2  Bondyé an-mwen, mwen ka fè fon asi’W ; pa kité mwen trapé hont ; pa kité lènmi an-mwen dominé asi mwen.

3  P'on moun ka èspéré adan’W ké trapé hont, mé lahont sé pou moun ki enfidèl san rézon.

4  Montré mwen chimen a-W, YHWH ; aprann mwen ki tras Ou fè!

5  Gidé mwen nan vérité a-W épi ansényé mwen, davwa Ou sé Bondyé ki délivrans an-mwen ; sé Ou mwen ka èspéré tout lajouné.

6  YHWH, sonjé tout bèl gras é tout lanmou Ou ni, davwa yo la dépi an tan lontan.

7  Pa sonjé péché nan jennès an-mwen, ni bétiz mwen fè ; dapré gras ki ta-W, sonjé mwen, davwa Ou plen bonté!

8  YHWH bon é I drèt ; sé pou sa I ka montré moun péchè chimen-la.

9  I ka gidé moun ki ba nan lajistis, é I ka aprann yo ki tras I ouvè.

10  Tout tras YHWH fè sé bonté é fidélité pou moun ki ka kyenbé alyans a-Y é komandman a-Y.

11  Akòz non a-W, YHWH, padonné fòt an-mwen, davwa i gran.

12  Kimoun ki ni lakrent pou YHWH? YHWH ké montré’y ki tras fo i chwazi.

13  Li-menm ké pozé alèz nan bonè, é zanfan ki apré’y ké ni péyi-la pou éritaj.

14  Sigré a YHWH sé ta moun ki ni lakrent pou’Y ; I ka fè yo konnèt alyans a-Y.

15  Dé zyé an-mwen asi YHWH toulongalé, davwa I ké woté pyé an-mwen nan zatrap.

16  Viré asi mwen é fè mwen gras, davwa mwen tousèl é maléré.

17  Traka nan kyè an-mwen ka fè tilili ; délivré mwen nan détrès an-mwen.

18  Gadé lanmizè é lapenn mwen ni, épi padonné tout péché mwen fè.

19  Gadé kantité lènmi mwen ni é jan yo hay mwen èvè mové lahenn.

20  Kyenbé nanm an-mwen é délivré mwen ; pa kité mwen trapé hont, davwa mwen vlé séré koté’W.

21  Kité lafidélité é lajistis pwotéjé mwen, davwa mwen ka èspéré’W.

22  Bondyé o, délivré Izrayèl nan tout détrès a-yo.