Sòm 27

Ta David.

1  YHWH sé limyé é délivrans an-mwen ; kimoun mwen ké krenn? YHWH sé fòs a vi an-mwen ; kimoun mwen ké pè?

2  Lè moun méchan ka vansé kont mwen pou dévoré chè an-mwen, mi sé lènmi é advèsè an-mwen ki ka tribiché é tonbé.

3  Menm si on larmé vini kanpé kont mwen, kyè an-mwen pé ké pè ; menm si on lagè vini lévé kont mwen, mwen ké plen konfyans magré sa.

4  Onsèl biten mwen ka mandé YHWH, sèl biten mwen voudré : sé pou mwen rété nan kaz a YHWH toulé jou mwen pou viv, pou kontanplé bonté a YHWH, é pou chèché’Y nan tanp a-Y.

5  Davwa nan tan détrès I ké séré mwen nan bitasyon a-Y ; I ké abréjé mwen nan kachèt a tanp a-Y ki sen ; I ké pozé mwen asi on gwo wòch.

6  Mi aprézan tèt an-mwen ké lévé ho anlè lènmi an-mwen ki alantou mwen ; mwen ké ofè sakrifis nan lajwa adan tant a-Y ki sen ; mwen ké chanté é jouwé mizik ba YWHW.

7  Kouté, YHWH, lè vwa an-mwen kriyé! Fè mwen gras osi, é réponn mwen.

8  Kyè an-mwen ka di asi’W, “Chèché figi a-Y!” Sé figi a-W, YHWH, mwen ké chèché.

9  Pa kaché figi a-W ban mwen ; pa voyé tou faché sèvitè a-W viré! Sé Ou ki té édé mwen, pa kité mwen, ni lagé mwen, Bondyé ki sovè an-mwen.

10  Menm si papa é manman lagé mwen, YHWH ké pran mwen nan kaz a-Y.

11  Aprann mwen larèl a-W, é gidé mwen anlè on tras ki drèt akòz lènmi an-mwen.

12  Pa kité bann advèsè fè sa yo vlé èvè mwen ; davwa fo témwen ja lévé kont mwen, enpé moun ki ka rèspiré yenki vyolans.

13  Mi sèl konfyans mwen ni : Sé mwen asiré vwè bonté a YHWH nan péyi a moun vivan.

14  Èspéré nan YHWH ; pran fòs é pran kyè ; wi, mwen di, èspéré nan YHWH!