Pou chèf-mizisyen. Èvè onpil flit. On sòm a David.
1 Kouté pawòl an-mwen, YHWH, Gadé soupir an-mwen.
2 Tann vwa an-mwen ka kriyé, Ou ki Wa é Bondyé an-mwen, davwa sé Ou mwen ké priyé.
3 Ou pou tann vwa an-mwen lé maten, YHWH ; lé bonmaten mwen ké voyé’y koté’W, é mwen ké gadé anlè.
4 Davwa Ou pa Bondyé ki ka pran plézi nan méchansté, épi movèzté pa pou rété èvè’W.
5 Moun vanta pa pou doubout nan zyé a-W ; Ou hay tout séla ka travay lenjistis.
6 Ou pou détri moun ka manti ; YHWH pa sa sipòté moun asasen é madragè.
7 Mé mwen-menm ké alé nan kaz a-W Nan kantité gras Ou ni ; nan lakrent pou’W mwen ké ajounou pa-koté tanp a-W ki sen.
8 Gidé mwen, YHWH, nan jistis a-W, akòz lènmi an-mwen ; mété chimen a-W drèt douvan mwen.
9 Davwa pa ni sensérité an bouch a-yo ; fonkyè a-yo sé dèstriksyon, fal a-yo sé on tonbo ouvè ; lang a-yo ka di pawòl dousinè.
10 Déklaré yo koupab, Bondyé! Kité plan a-yo fè yo tonbé ; chasé yo pou kantité péché yo fè, davwa yo rébélé kont Vou.
11 Mé yo pou réjwi, tout séla ki ka fè fon asi’W, yo pou chanté lajwa pou toujou, paskè Ou pwotéjé yo ; tout séla ki enmé non a-W, yo pou kontan adan’W.
12 Davwa Ou, YWHW, ké béni moun ki jis ; èvè lagras, Ou alantou yo akwèdi on boukliyé.
Ajouter un commentaire
Commentaires