Sòm 9

Pou chèf-mizisyen. Anlè mélodi “Lanmò a gason-la”. On sòm a David.

1  Mwen ké louwé’W, YHWH, èvè tout kyè an-mwen ; mwen ké rakonté tout mèrvèy Ou fè.

2  Mwen ké kontan é réjwi adan’W ; mwen ké chanté non a-W, Sila ki Pli-Ho.

3  Lè lènmi an-mwen dèyè, yo ké tonbé é disparèt lè Ou parèt.

4  Davwa Ou défann jistis é kòz an-mwen ; Ou sizé anlè twòn pou jijé nan lajistis.

5  Ou blanmé bann nasyon, Ou détri moun méchan ; Ou éfasé non a-yo jòdi-jou é pou toujou.

6  Tout lènmi fini! Pou toujou yo détri! Ou krazé onpil vil, moun pé ké sonjé yo ankò.

7  Mé YHWH ké rényé toujou, I paré twòn a-Y pou jijman.

8  I pou jijé lèmonn nan lajistis, é I pou jijé sé pèp-la nan lonnèté.

9  YHWH sé on chato-fò pou moun nan ladévenn, on chato-fò nan moman détrès.

10  Moun ki konnèt non a-W ké fè fon asi’W, davwa, YHWH, Ou pa ka lagé moun ki ka chèché’W.

11  Chanté pou YHWH, ki wa nan Siyon, déklaré sa I fè anmitan tout pèp!

12  Davwa I ka vanjé san ki koulé, I ka sonjé, I pa ka obliyé pléré a moun maléré.

13  Pran pityé pou mwen, YHWH, gadé mizè moun ki hay mwen ka pòté mwen! Woté mwen nan lapòt a lanmò,

14  Pou mwen rakonté pouki mwen louwé’W nan gran lapòt a Jennfi a Siyon, é pou mwen réjwi nan délivrans a-W.

15  Nasyon ka tonbé nan grangouf-la yo té fouyé la, pyé a-yo ka pri nan filé-la yo té kaché la.

16  YHWH montré kimoun I yé lè I fè jistis, I fè on méchan pri nan sa li-mwen té fè.

– Méditasyon. Kanpo

17  Moun méchan ka désann nan bitasyon lanmò, èvè tout nasyon ki obliyé Bondyé.

18  Davwa a pa tout tan yo ka obliyé moun pòv ; èspérans a moun maléré pa ka pèd pou toujou.

19  Lévé, YHWH, pa kité lézòm pran viktwa! Fè tout nasyon pasé nan jijman douvan’W.

20  Fè yo pran pè, YHWH! Fè tout nasyon sav sé yenki moun yo yé. – Kanpo