Pou chèf-mizisyen. On kontanplasyon a bann gason a Koré.
1 Kon bich swèf koulé-dlo, nanm an-mwen swèf Vou, Sényè.
2 Nanm an-mwen swèf Bondyé, Bondyé ki vivan. Kitan mwen ké vini é parèt douvan Bondyé?
3 Sé dlo-zyé mwen ka manjé lajouné kon lannuit, pannan yo ka di mwen toulongalé, “Oti Bondyé a-w?”
4 Lè mwen sonjé tousa, nanm an-mwen ka koulé andidan. Mi mwen té k’alé èvè on-foul moun ; mwen alé èvè yo nan kaz a Bondyé, anmitan kriyé nan lajwa é louwanj, èvè on-foul moun nan fèt pélérinaj.
5 Pouki ou maléré konsa, nanm an-mwen? É pouki ou enkyèt andidan mwen? Èspéré nan Bondyé, davwa mwen ké louwé’Y kanmenm ; sé délivrans an-mwen, Bondyé an-mwen.
6 Nanm an-mwen maléré andidan mwen ; alòs mwen ké sonjé’W dépi péyi Jouden, é dépi hotè Hèrmon, dépi mòn Mitsar.
7 Fondlo ka kriyé fondlo lè kaskad a-W fè dézòd ; tout vag é gwo-dlo a-W pasé anlè mwen.
8 YHWH ké komandé bonté a-Y lajouné, é lannuit chanson a-Y ké èvè mwen : on priyè pou Bondyé a vi an-mwen.
9 Mwen ké di Bondyé, gwo Wòch an-mwen, “Pouki Ou obliyé mwen? Pouki mwen k’alé nan dèy konsa pannan lènmi ka bat mwen?”
10 Kon zo an-mwen ka krazé, lènmi ka ofansé mwen, lè yo ka di mwen tout lajouné, “Oti Bondyé a-w?”
11 Pouki ou maléré konsa, nanm an-mwen? É pouki ou enkyèt andidan mwen? Èspéré nan Bondyé, davwa mwen ké louwé’Y kanmenm ; sé délivrans an-mwen, Bondyé an-mwen.
Ajouter un commentaire
Commentaires