Asi Chimen Lanmò

Asi chimen lanmò,

Mi lènmi asi tras an-mwen ;

Man ka vwè yo ankò,

Kifè lèspwa ka lagé mwen,

Li ki an tan lontan ban mwen lavi.

Anmitan gwo nwèsè,

Lèspri an-mwen ka bigidi ;

Sé doutans man ka bwè,

Mé sa mwen vlé sé dlo-lapli ;

Alè, mwen ni pou jwenn tibren limyè.

Man ka ba yo masko,

Mé sé lènmi-la ka ban mwen kòchpat.

Man tonbé blogodo ;

Asi on wòch tèt an-mwen bat.

Mwen pèd lakat,

Mwen pri kon rat,

Anba tab moun aristokrat.

Kò an-mwen flègèdè,

Venn an-mwen tòtiyé kon nat ;

Mwen sé kòk atè.

Yo konprann yo gannyé,

Mé, awa, man doubout toujou.

Konba-la mwen pa pèd,

Davwa mwen ni ras, mwen ni fòs ;

Lèspri an-mwen wòs, mwen ni gras.

Zo an-mwen plis ki rèd ;

Non ! mwen pa ka pliyé jounou.

Mwen ni pou kontinyé.

On bon moun ban mwen lanmen ;

Sé lènmi-la èstébékwé,

Yo tèrbolizé.

Tout biten zwèl, dou pasé siwo miyèl :

Yo vwè mwen pa tousèl ;

Man ni on zanmi anba syèl,

On kanmarad ki pa on moun malad.

I ka ba lènmi an-mwen fyèl ;

On délivrans ki bèl,

Kon lakansyèl ki pentiré bèl twèl.

Nan trankilité,

Asi dé pyé mwen ka kanpé,

É mwen paré maché lwen.

Asi chimen lanmò,

Mwen pa paré mò ;

Mi mwen la ankò,

Magré mwen pa ni lèspri fò.

Man ja trapé on trézò,

Man ké rivé lotbò.

Davwa mwen ni zanmi déyò,

Lènmi ja ni tò.

Méchan pa bòkò,

Asi chimen lanmò.