Témwen 4

4:1 Mi prèmyé vizyon ki vini jwenn mwen jou 28 òktòb 2008, avan mwen té pran pou travay maké pawòl ki vini jwenn mwen, kilès maké nan liv-lasa.

4:2 Kon mwen té asi kouch an-mwen, zyé an-mwen ouvè, épi mi, mwen vwè on fòm a uit koté égal, on òktogòn san kòvyé. Fòm-la té san branné, san boujé ni agòch ni adwèt, épi i té vid, fon é andidan té nwè. 

4:3 Épi anmitan òktogòn-lasa, té ka alé-vini lèt lézòm ka maké, kilès té otan blan ki lakré asi on tablo nwè ; sé lèt-la té ka alé nan tout sans, épi tanzantan yo té ka mofwazé nan onpil mo.

4:4 Mé mwen pa té kapab ni li ni konprann sé mo-la, ni lang-la non pli, davwa mwen pa té konnèt li, épi mwen rété bazoudi afòs vwè tousa zafè.

4:5 Lamenm, fòm-la disparèt, épi mwen pa té ka vwè ayen dòt ki nwèsè.

4:6 Mi, sé lèt-la viré ankò, yo chanjé é parèt kon onpil mo. Épi fon nwè la vini klè, é sé té on gran dézè koté moun pa ka rété.

4:7 Aprésa, sé mo-la arimé yonn dèyè lòt é yo divini chouval bridé kon séla ki paré alé nan lagè. Mwen louké jan yo té byen anrajé, paré pou pran ogalo é pati olwen.

4:8 Épi mwen vwè on nonm abiyé èvè on zami an kuiv é on kap wouj klè ; épi i té ni nan lanmen dwèt on gran bann-twèl blan é vèr.

4:9 Épi sòlda-la doubout anfas èvè mwen, i fè twèl-la désann, é sa sèvi sinyal pou sé chouval-la té pati. Lamenm kon zéklè, sé sis chouval-la pati, épi yo alé lwen jistan yo pa té alavwéri ankò.

4:10 Mi, mwen té doubout tousèl nan gran dézè-lasa, pa kapab konprann tousa biten mwen té vwè ; mwen pliyé sousi, ka éséyé sézi tibren sans adan tousa.

4:11 La, sibitman ou tann on vwa, é i palé ban mwen lè i kriyé non an-mwen ; épi mwen touné tèt pa-asi koté gòch, la vwa-la té sòti.

4:12 La, mwen vwè on jenn nonm abiyé èvè on soutann long é blan, é i té doubout anlè on mòn-sab. Figi a-y té ka kléré kon ta on mésajé ki sen.

4:13 I di mwen : Sé sis chouval-la, séla ou sòti vwè la, sé pawòl ki pòkò révélé konyéla, sèlman ou sav yo ja voyé yo, épi yo ké rivé asiré pa pétèt.

4:14 Sa sé pawòl a Yonn Toupuisan pa pèp a-Y ; alòs, kouté pou konprann.

4:15 Mwen ba zòt pawòl an-Mwen épi mi i ka kité zòt pou on dòt syèl. Zòt ni pou aji asèlfen chak zyé rèkonnèt, épi chak lang konfésé, YHWH sé sèl Bondyé-Vré, é pa ni dòt sòf Li.

4:16 Konsa mwen gadé nonm-la ki té olwen é té ka di sé pawòl-la, épi mwen mandé’y : É fòm-la, òktogòn-la mwen té vwè la, kisa i ka rèprézanté?

4:17 Épi zanj-la réponn : Fòm-lasa, èvè uit koté égal, òtogòn-la ou té vwè-la, sé miwa a lèmonn.

4:18 Dé karé-lasa ka rèflété lèmonn jan i yé, ranpli èvè pawòl a Sényè-la, mé moun pa ka rèkonnèt yo davwa yo miganné èvè pawòl a lézòm.

4:19 Mi, dòt pawòl ka vini jwenn vou é pèp a-w, pa pou ranplasé yo mé pou fè zòt sonjé yo.

4:20 Davwa, onpil moun ka ouvè sé Liv-Sen la, mé ongray moun ka byen konprann yo é suiv yo.

4:21 Di yo, fo yo sonjé, Pawòl a Sényè-la ni pou maké anlè kyè a-yo. Davwa anvré, yo ni pawòl an-Mwen bò lèv a-yo, mé i pa jwenn bitasyon nan kyè a-yo.  

4:22 Di yo, Bondyé YHWH ja paré on jou lè chak moun ki pran pawòl pou ayen ké ni pou rann kont pou sa.

4:23 Davwa lèmonn ké pasé, mé pawòl an-Mwen pé ké pasé. Nenpòt moun ki ka pran’y pou ayen ké mandé pou li-menm on jijman lontan pli gran.