1 Épi toupannan nou ka travèsé mové tan, nou ni pou sonjé yo té kriyé nou pou sèvi YHWH, kon zanfan-pitit a Papa-la, kon zélèv-disip a Gason-la, kon bitasyon-sen a Lèspri-la.
2 Sonjé enmé : Enmé YHWH-Lavi, enmé kò ou ni, épi enmé tout moun a-w. Enmé mové nasyon, enmé tout kréyasyon, enmé èvè nanm a-w.
3 Enmé, sé kon kannik-la nan banza-la kilès ka kyouyé on jibyé ; fodré enmé menm jan ou ka chasé.
4 Sonjé viv : Viv nan kalmipla, viv adan lajwa, épi viv tout sajès anbyen. Viv san ou vyolan, viv san fè fengnan, viv èvè dé lanmen.
5 Viv, sé kon grenn-la nan jaden-la kilès ka atann larékòt vini ; fodré viv menm jan ou ka grandi.
6 Sonjé maché : Maché an pasyans, maché nan konfyans, épi maché an fidélité. Maché èvè konsèy, maché toujou dèyé’Y, maché san époufé.
7 Maché, sé kon van-la adan vwèl-la kilès ka vansé on bato ; fodré maché menm jan ou ka rèspiré.
8 Sonjé palé : Palé konnésans, palé vérité lokans, épi palé nan senplisité. Palé pou bokanté, palé pou libéré, palé èvè mitan zyé.
9 Palé sé kon rivyè-la ki nan ravin-la kilès ka désann an lanmè ; fodré palé menm jan ou ka bwè.
10 Sonjé kouté : Kouté nanm a-w, kouté moun anfas a-w, épi kouté nan silans. Kouté pou bay pal, kouté moun ki mal, kouté kyè adistans.
11 Kouté sé kon loraj-la ki nan syèl-la kilès ka anonsé gwo lapli ; fodré kouté menm jan ou ka santi.
12 Sonjé gadé : Gadé nan lentélijans, gadé an èspérans, épi gadé èvè limyè. Gadé ankachèt, gadé pou aprann, gadé dépi an fonkyè.
13 Gadé sé kon chalè-la an kannari-la kilès ka kyuit bon manjé ; fodré gadé menm jan ou ka pansé.
14 Sonjé avwè : Avwè imaj a Bondyé, avwè miwa douvan zyé, avwè figi a lézòt. Avwè vizyon a latè, avwè chimen-la alè, avwè pyé douvan lapòt.
15 Avwè sé kon nonm-la adan lavi-la kilès ka chèché Lavérité ; fodré avwè menm jan ou ka révé.
16 Épi toupannan nou ka répété sèt jou ka mémwè a kréyasyon a-Y, annou kalkilé é médité asi yo jou apré jou, pou nou gadé lèspri é zyé asi’Y, ki mérité pou toujou.
17 Davwa, prèmyé jou I pran rèpo, kon I té ajen lanvi travay pou Li-menm, Sényè-la fè pou Adan chimen a lavi pou i sonjé pa kisa i té fèt.
18 Épi I fè sétyèm jou-la kon on jou pou moun maléré, pou woté sila ki nan pousyè, pou lavé’y èvè lawouzé ki sòti atè-la, é pou ba moun-la manjé fwi nan jaden-la.
19 Épi I di, jou Rèpo lasa té fèt pou lézòm é non lézòm pou Sabat.
20 Zanfan a Bondyé ni pou rényé nan Sabat, pou yo fè travay ki ka bay lavi.
21 Davwa, mi sa ki rèpo an-nou, sé pou nou fè kon Sényè an-nou fè, pou bay santé é pwòpté, lavi é pa lanmò.
22 Nou ké alé koté zanfan a lézòm pou méné rèpo ba nanm a-yo, pou nouri é abiyé, lavé é pwòpté, bay limyè pou yo vwè, bay chimen pou yo alé, pou édé é ankourajé, aprann é konséyé, mandé é priyé.
23 Si nou sonjé fè sa, anvré nou ké antré nan Rèpo an-nou, davwa nou pé ké travay pou nou-menm, mé travay pou YHWH.
Ajouter un commentaire
Commentaires