Moko Tobi 01

A kisa yonn pé rakonté asi jenn Milo Tobi ?

Dépi lontan non-la sé on papiyon an divini.

Adan péyi Mari-Galant, té ka viv an jenn gason.

Dé paran, on tisè, é on granfrè yo nonmé Sanson.

Bòdzè toubònman, près flègèdè ; époutan i té djòk :

Chivé swa, po sapoti, ho kon gòlèt, èvè on chapo.

Brav èvè lèspri-savan, timal té kon mèt-a-mannyòk.

Chimen lavi pa té gyè fasil, kèkfwa sa té bòsko.      

É mi sa ki fèt ! Man Milo té ba gason a-y on kwi.

Hadiman, Tobi té ka pòté’y alantou ti kò fin a-y :

Enpé biten té k’ay adan, akwèdi on trézori.

Hak zikak ! Pa ni prété. Sé on kado yo té ba’y.

Flanbwayan é matadò té ké jalou kwi-la toubònman.

Gaya an chimiz é pantalon kout, ka maché ni-pyé,

Frè-la té ni on chapo-pay épi on bèl sak charman.

Gran otan lézòt, tiboug-la té ja trapé kenz lanné.

Imajiné sa manman-y té yé pou jenn konpè an-nou !

Lidé vini pou fèt a-y, fo i bay kichòz èspésyal,

I désidé travay pou i achté’y on joli bijou.

Lendi pou sanmdi Tobi pòté on mannèv a pédal :

Jaden pwovizyon a Misyé Galba té sitèlman pwòp !

Konsa i té èspéré on rèkonnésans natirèl,

Jistan i kontré mèt a tè-la ki té sovaj pa twòp,

Ki di, “Man ké péyé’w lè kabwèt ké fè lawoutounèl.”

Mé tiboug-la pa té dakò ; i atann nonm-la channda.

“Patat, tomat, é konsò, man ké vann”, Tobi déklaré.

Mété sa i té pé adan on bidim pannyé bakwa,

Pou alafen kité sa, pas : ‘Vòlè pa ka pwòspéré’.

Ora Sanson i alé, ka déklaré pwofitasyon ;

“Nou ké konstaté si simenn pwochen ou ké ni salè,

Ou pa bizwen kalkilé é trapé pwenn anmèrdasyon.”

Nanm a Tobi pa té otan soulajé, plito kòlè.

Règrétan mové sitiyasyon-la, i pati boudouy.

Uisan mèt alaviré, i kontré on papa manglous,

Raman otan hadi, bèt-la di bonjou é palé pou’y :

“Uit pitit man ni, chak jou fo chèché manjé alakous,

Tanpri souplé, ban mwen adan sa ou ni an tisak a-w !

Si man pa jwenn ayen, asiré pa pétèt, nou ké mò.”

“Titak kasac-giyòm,” Tobi montré, “sé sa man ni ba’w.”

Sèlman modi manglous-la fè konsi yo té fè’y di tò.

“Vyann, mi sé sa ki bon manjé ; ki zafè kazac-giyòm ?

Zòt mèyè pa ni rèspé pou mwen ?” É i lagé on kyip.

Vitman-présé, i disparèt, é tousèl i kité jennòm.

Zéklè anba bwa, i bliyé i té kaché on sak trip ;

Yabé douvan on bèl okazyon, Tobi ranmasé sa.

Wacha-wacha an zèb-la, konpè kontinyé fè chimen ;

Yenki pou rivé adan on gran savann dèyè mòn-la.

Wabap ! I tonbé babap èvè on gwo towo bataklen.

Wòch solèy té méyè pasé maléré zannimo-la :

Yenyen té alantou li, ka tigonné’y toulongalé.

Way ! Anba lonbraj a on pyébwa anmitan savann-la,

Yonndé zo asi gwo bèf nwè la fè Tobi pran pityé.

Zévan a-y té ka soupiré on filèt van cho é sèk,

Véyatif, padavwa krentif, tiboug-la ba kò a-y bann !

Zyé émosyonné, i menné’y bwè dlo, é san fè tèk-tèk,

Viré maré’y on koté ki ni zèb pou tann é konprann.

“Senk jou man pa démaré, davwa mèt an-mwen trépasé ;

Tibren ankò, man té ké mègzoklèt pasé èskèlèt.

Sèlman, abo mandé on kabrit ki chak jou ka pasé,

Tala pa ban mwen on tizing zèb, ni tizing baragèt.

Uitan man ka viv kotésit, asi tè a mèt an-mwen,

Rabataj i ka fè an savann, moké mwen sitèlman ;

Uitè-d’tan chak jou, bouden a kabrit-la pa janmé plen.

Règrétan, mé granmèsi,” towo-la di an finisman.

“Nou anlè tè a Misyé Poban, ki ni on gran gason,

Olyé i pran swen tousa, i pisimyé chaché richès.

Niyaj san dlo i vlé trapé, ka bobansé sa ki bon :

Ochansté a lavi ka garé chimen a lajennès.

Papiyon té avan tobi, tobi té apré chinin ;

Mizi an mizi on nasyon kapab bati on péyi,

Pa pran kouri, toujou travay, pa dòmi avan labrin.

Mété on pongni tè an kwi a-w, épi atann lapli.”

Konsa misyé towo bòsko fini palé parabòl.

Jolivans a dékatman-la, ti konpè pa menm konprann ;

Kifè kon nanm a-y é lèspri a-y té pati atòtòl,

Jwenn tibren tè, mété’y an kwi-la ; é i halé désann.

Lamenm, avan i té mété pyé andidan granbwa-la,

Initil kon pa tini, on kabrit blan ba’y on kou-d’kòn ;

Lwen douvan i vòlplanné, blip ! Tobi kongné atè-la.

I lévé, maché, épi antré an bwa-la kon siklòn.          

Grenn-sibit pran’y, anba on gwo akoma i abréjé.

Fétay a pyébwa-la té an mouvman ; épi mi toutrèl :

“Gason, kisa ou ka fè isi ?” zozyo-la woukoulé,

“Fon-la ni kantité danjé, ou pa pè drivé tousèl ?”

Had mouyé, doulè an zo, maché tousèl, i té fouben,

É i réponn : “Sé labitid, man k’alé obò létan.”

Hotè bèt-la té yé, gwosè a-y Tobi pa té sèten

Enstalé asi on branch, bèlté a-y té bazoudisan.         

“Chèché manjé ba pitit, sa sé on travay kòstobral ;

Bobi pran yo, Konpè, man k’alé plen fal an-mwen alè.

Chaben, a on dòt solèy,” bèl toutrèl-la di anfinal.

“Bèkté tibren kasav,” Tobi di, “nouriti tèlman fyè”.

Davwa sé té bénédisyon, zozyo-la pa rèfizé ;

Atè i pozé, manjé san présé sa Konpè té ba’y :

Débouya pa péché, i manjé épi yo byen kozé.

Apré i té fini, gason-la kité’y an pyébwa a-y.

Anba-la tras-la té ka menné obò gran basen-la ;

Blèz anba on syèl kristal, dlo-la té ka kléré kon mab.

Chapo an tèt, i pran lak a-y, é di pwason sé konbòch :

“Dé mòso trip dwèt ni asé pou anba dlo fè dézòd”.

Dis minit pasé : sonmèy ka tonbé asi’y, kanmarad !

Chalè voyé pwason dòmi ; pétèt i ké jwenn kribich.

Byò ! vant a-y fè. Dépi bonmaten i té alawoulib,

Ayen i poko té manjé. O ! kasac-la pa té la !

Èstébékwé, Tobi Milo gadé sa ki té pasé ;

Fafouya, modi rat a pwèl nwè, pli gra pasé mal-bèf,

Grigné asi on twon pouri, davwa i té fè’y on blag :

Halé kasav a-y san alavwè. Tiboug-ka hélé : “Ah !

Hadi é voras ki ou yé ; mwen mérité yenki pach ?”

Gloup ! Ayen pou ti konpè, kilès té ja on bolòm mèg.

Fatigé akòz tousa traka, i pran pòz filozòf ;

Égri afòs i té fen, viré nan kaz i fè lidé.         

I kouché an zèb, ka gadé syèl anba solèy midi,

Jis pou fèmé zyé, pou rèspiré lè-la. Alavòltij,

Konsi yo té vlé chapé douvan kèk chasè alatak,

Lòt koté bitasyon, on bann toutrèl pasé alavòl.

Lalwé, léti é branch pwa-di-bwa fè lapli anba syèl ;

Konsa sé zozyo-la té lagé sa yo té ni adan bèk.

Janmé gason-la poko té vwè sa, magré tousa laj.

I lévé pou ranmasé, an doulè ka maché kochi.

“Monchè, souplé ban mwen léti,” di on mòlòkòy bidim –

“Nou tout ka mò : pa ni bèt isi ki ni bouden plen.

On-kalité pouldo kòsto nwè, ganmèz é gran fawo,

Piyé létan-la, fè voras pou zèb, enmé tann zatrap ;

Pwenn kapon, enmé ataké, ja fè onpil tonbé, vèp !

Oswè nou pou chanjé létan, nou ké pati ogalo ;

Nwèsè ké pwotéjé nou, é nou ké pwofité plen-d’lin.

Moun alanmò kotésit, akòz on agoulou a vyé plim.”

Raché yonndé fèy léti, Tobi ba Papa Mòlòkòy.

Sòti an dlo, Misyé Konpè monté atè alaprès ;

Tanto aprésa, larèstan lafanmi vini parèt :

Uit mòlòkòy, gwo é piti, an tout sans kon foufou,

Uityèm-la té granpapa, ki mòlman té ka lonji kou.

Tobi pran kozé asi kouman jòdi i ja débat,

Sitèlman i pèd gou lapèch, san anvi alé lachas :

Rété kon brak douvan létan, i té ka annui obò’y.

Vizitè té byen satisfè, ka plen vant akwèdi rèv.

“Waka é gran mèsi, Konpè, pou jénérozité a-w,”

Yo di jenn gason-la. Aprésa yo tout pati kité’y.

Zòrèy a-y, sibitman, lévé doubout kon kòk a bèl pòz ;

Zingzing pasé kon pou anonsé envité nan lakaz,

Yon vyénonm èvè lenj blan, lòt koté basen-la, kriyé’y ;

Woté on kwi anba on pyé-kalbas, é i di’y, “Mi ba-w !”

Vitman, bokanté kwi. Tobi viré nan kaz an mannèv.

Anchyen landèmen, Konpè ouvè zyé konsi i kagou,

Ankò bébétoum, ka fè zègèlèt, konsi i té sou ;

Alakalkil asi tout zéprèv èspéryansé lavèy,

Alanaliz asi kouch a-y, apré on lannuit sonmèy,

Boug-la doubout, i pran lawout,

Chèché kwi-la an kuizin-la,

Dabò pou yonn, tout alawonn,

Ékléré pa on filèt limyè ki chapé douvanjou,

Èvè dousè, i pran kalbas-la i té pann hotè kou.

Épi konsa, Tobi louké’y andidan kon andéyò,

Époufé pou on zéfé ki pa té ni lajan ni lò.

Fèmé bèl kwi, spèktak fini.

Grigné ba dlo ki glasé do,

I bengné kò, chivé grenndò,

Janm épi pyé : sèk, abiyé.

Kouri présé, fè lafimé, i halé on twèl chipangn ;

Koré asi on pyé-koko i kontanplé lakanpangn.

Kalbas-la i té désidé pwòpté èvè vyé twèl-la :

Kouvèti é ofon té suifé afòs foté kwi-la.

Lafen rivé, misyé alé

Makayé pen, é fouyapen ;

Niché miyèl, léjè kon syèl,

On dlo koko dou kon siwo.

Pati aprésa, jenn gason-la halé aladésann,

Pasé menm koté ki lavèy, bò towo-la an savann :

Plézi vwè’y an bon santé. I kontré toutrèl adan nich.

Pli ta i rivé ora létan, sizé asi on bich ;

Rété pozé, byen rèspiré,

Sikso an kyè, moman i vwè

Twa mòlòkòy, twa ti tòtòy.

Uitè-d’maten, Tobi té byen.

Van-la té ka karésé figi a-y, i viré pa-dèyè ;

Véjétasyon zèb vèt, détwa kòs pwa té byen kouvè,

Vansé pa-la, Tobi kalkilé sa pou fè èvè sa.

Vitman grenné, é apré i mété pwa-la an kalbas-la.

Woy ! fouyé tou adan labou,

Yonndé kwi dlo pou wouzé yo :

Zanmi pati, pwa pran plézi.

Zyé a-y té tèlman èstébékwé, landèmen lè jou kasé :

Yon pyé pwa-di-bwa otila onpil zozyo té jiké.

Waka, waka ! Zèl a-yo té ka fè bakannal monté.

Voyé kòs pwa, anba pyé-la ;

Vanné féyaj, jwé opiyaj.

Ven zannimo vini sito

Varé tousa, anpilé sa.

Uit pannyé yonn adan lòt té alakat ora on wòch ;

Tobi té débousolé, gadé adwèt, gadé agòch,

San vwè pèsonn. Alò i plen pannyé akwèdi sé pòch.

Rafal pyébwa ; pa ni dòt pwa –

Rézon pou bèt déviré tèt :

Ranmyé pati, mouton osi.

Rètou pou yo, bon ti kanpo.

Pozé asi wòch-la, Tobi antré an kalkilasyon :

“Onpil pannyé pou chayé. Kouman fè ?” vini on kèsyon.

Ni pwoblèm adan lavi ou kwè pa ni solisyon.

“Man pa ni lach ni moun gran wach,”

Misyé-la di – “Laprémidi

Moun ké menné boukèt baté !”

Mi sé konsa, i vwè tousa.

Lè i koumansé pran zéfé a-y pou fè lawoutounèl,

Konpè tann adan granbwa-la on dézòd èksèpsyonnèl.

Jété zyé, i apèsi Sanson dèyè on kriminèl.

Inèspéré, Tobi gadé ;

I té ka vwè on bon konpè.

Istwa-dè-di, Bondyé, mèsi !

I palé ba’y, ba granfrè a-y.

Hokò Tobi èspliké Sanson kijan i té mélé :

“Gadé tousa pannyé pwa ban nou, on vyé misyé kité !

Fo nou chayé séla nan kaz. Ès ou ni on kèk lidé ?”

Épi konsa, mi granfrè-la

Édé Tobi. Boukèt vini.

Èspwa pou yo monté anho,

Évè ti chyen, ka fè chimen.

Déviré gadé, i ka konstaté vyé nonm-la sizé ;

Chichòt charman an van-la di tiboug-la lévé dé zyé.

Bò on pòyé, kabrit é pouldo mò, sé sa i touvé :

Alé lachas, i té jwenn kras ;

Asé pou di, manglous osi,

Adan zatrap, rat adan grap.

‘Apré mizè, tini bonè’.           

Manglous té vyéfi a lèd mannyè,

Towo té filozòf a bon kè,

Kabrit té on bandi malmaké.

Toutrèl té travayèz angajé !

Rat té on vòlè byen sanfouté,

Mòlòkòy té kalen a kalpat,

Pouldo té aristokrat kon chat.