KYÈ FILAO - Thierry B Tagliamento
Dé piti men ka trapé yonn pli gran,
Pou fè’y santi dousè adan lanmou.
On ti chalè ka anbraré on venn,
Pou fè’y vibré tout sansasyon lavi.
Dé lanmen ka dousiné dé piti,
Pou fè on zanfan vwè sa ki lanmou.
On fréchè ka miyonné adan kyè,
Pou fè on timoun kwè i ni lavi.
Dé piti zyé ka bennyé nan yon ki gran,
Ki fè’y konprann kilès tini lanmou.
On ti gout-dlo ka lavé on kò,
Ki fè’y aprann sakrifis nan lavi.
Dé bèl zyé ka louké nan dé ki piti,
Ki fè on pitit kyenn sigré lanmou.
On siren ka vaporé nan lanmen,
Ki fè on bébé pran dousè lavi.
Ajouter un commentaire
Commentaires