Témwen 6

6:1 Mi pawòl a Lèspri Sényè Pli-Ho, sa ki vini jwenn mwen jou 28 òktòb 2028, jou-la I ban mwen lòd maké sé pawòl-la nan liv-lasa.

6:2 Épi I di mwen konsa : Palé ba pèp-la é di yo sa ki vré, Pawòl an-Mwen yo ka li, pou yo sa pòté fwi nan lèmonn, davwa yo sé limyè nan lèmonn.

6:3 Pran gad, davwa Mwen ka vwè lévé adan syèl plent a latè. Ès zòrèy a Bondyé Sényè ouvè yenki pou priyè a-zòt? Asiré non!  

6:4 Davwa, Mwen sizé anlè granmòn ki ho, épi Mwen ka vwè on san wouj klè ka monté koté Mwen. Kitan zòt k’ay lévé nan sonmèy, zòt-menm ki la ka dòmi? Abiyé kò a-zòt èvè Lèspri!

6:5 Nou abiyé èvè Lèspri, wi Sényè ; mi sa yo ka di. Nou ka pwofétizé an non a-W, nou ka chasé démon an non a-Y. Pawòl a-W préché toupatou asi latè, é nou ka sanblé an non a-W.

6:6 Bann ipokrit, Sényè-la di. Zòt pa kapab diféransyé Bon Lèspri èvè mové lèspri, ni Sila ki Sen èvè séla ki pa sen. Mé poukisa?

6:7 Sé paskè zyé a-zòt fèmé anlè Pawòl an-Mwen. Konsa zòt lagé kò a-zòt nan èsklavaj ba’y, Sila ki Mové ; époutan Mwen té libéré zòt.  

6:8 Anmitan zòt, Mwen ka tann séla ki ka di : Sa pa sòti koté Bondyé YHWH! Sèlman zòt ka boké yo é zòt ka di : Pa palé on mo! Zòt mè’è méyè pasé nou? Sé ba zòt tousèl Bondyé ka palé? Sé èvè zòt tousèl I ka patajé volonté a-Y?

6:9 Asiré non, YHWH di. Davwa Mwen ja palé ba zòt osi, mé kilès adan zòt kouté Mwen? Kimoun déklaré menm onsèl fwa, anvré, sa pa travay a Sényè-la?

6:10 Gadé, Mwen ka vèti zòt ankò. Panga p’on moun di Mwen pa voyé on avètisman, piskè i ké di, Mwen Bondyé Pli-Ho, ka manti.

6:11 Mi, anmitan zòt ka doubout bann fo pwofèt ki ka palé on lang Mwen pa aprann yo. Pawòl a-yo pa sòti dépi syèl, mé dépi sila ki prens adan lèmonn, sila yo ka glorifyé é onoré.

6:12 Yo ka di pèp-la : Bondyé mété zòt mèt asi vi a-zòt. Mé kijan zòt ka kwè pawòl a-y, zòt Mwen achté èvè on pri koutan?   

6:13 Tann sa! Zòt sé mèt asi sa Mwen té ba zòt : libèté. Sèlman zòt ka bésé anba jouk a lènmi-la, davwa zòt ka kwè mansonj I ka di. Ès sé prèmyé fwa i ka sèvi pawòl an-Mwen to garé moun, sila ki pli gran imitè é pli bon madragè?

6:14 Kité mwen palé’w, pèp rédansyonné. Sényè-la enme’w èvè tout kyè a-Y, é jalouzi I ni pou’w, i otan laj é fon ki gwo dlo nan fon-lanmè.

6:15 I enmé’w èvè on lanmou enfini, é alè I ka palé ba’w, asèlfen ou rivé sav, sila ki ka palé’w pawòl ka dousiné é madragé, i sé yenki mantè, i té toujou on mantè dépi yo té jwenn mové-kyè adan’y.  

6:16 I ka viv yenki pou manjé é détri, davwa i jiré asi tèt a-y, i pé ké ba zòt tan pou pozé, jistan jou a-y ké étenn.

6:17 Alòs, pèp an-Mwen, diféransyé lèspri, épi fouré zami a-zòt pou détri travay a zanfan a dyab!

6:18 Ès Mwen janmé komandé palé an lang ba tout pèp-la? Ès Sényè-la ba lézòm on lang èvè onpil pawòl p’on moun pa ka konprann? A pa pou moun di zòt tout fou é sou?

6:19 Ès Mwen pa ba détwa on palé an lang, ba dòt on don-pwofési, ba sila on don-sajès, é ba lòt-la on don-ansènyman?

6:20 Ès yo pa ba zòt sé don-la pou bénéfis a préché Bon-Nouvèl la? Oben sé pou mal é non byen zòt ka ba Pawòl an-Mwen do?  

6:21 Mwen méné on révèy spirityèl, lè Mwen vidé Lèspri an-Mwen anlè tout chè, épi Mwen bay don palé-lang pou déwta chè mé pa pou tout chè. Alòs, arété fè djendjen, davwa Sényè-la pa on komédyen. Chèché la zòt garé, épi travay asi sa.

6:22 Kimoun adan zòt ké plenn alavwéri spèktak-la? Alòs, si ou ni zyé pou vwè, gadé anlè, épi pran swen a Fi an-Mwen.

6:23 Mwen voudré di’w, gason a lézòm : Ban mwen adan tan a-w, pa nan rèlijyon, mé nan rèlasyon.

6:24 Davwa, sé moun-lasa ka sanblé, épi yo ka chui-chui asi bobo pèp an-Mwen ni.

6:25 Sèlman, lè chak moun viré nan kaz, kantité adan yo ki ka pòté soufrans-la ban Mwen nan lapriyè sé kon ti-miyèt, épi séla ki ka plenn alavwéri traka-la sé kon pousyè asi had a Sényè-la. Mi, plent a-yo sé ayen ki van, entéré a-yo sé ayen ki lè.

6:26 Pouki zòt andwé konnèt traka pèp an-Mwen ka jwenn, épi rété san palé nan lapriyè, pou zòt alé-di moun-andèhò ki pa pèp an-Mwen? 

6:27 Anvré, moun-andéyò ka malpalé pèp an-Mwen, mé ola i tann jwenn pawòl-lasa, si a pa moun panmi zòt ki di’y.

6:28 Mwen pou déklaré : Lapé asi séla ki ka pwoklamé Lapé. Davwa mi lapé-lasa ou ka tann anmitan zòt : Sényè-la ké béni’w, I ké fè’w kado ou mérité, é i ké fè’w pwofité.

6:29 Sèlman yo ka palé richès ki pa spirityèl mé ki matéryèl. Mé, moun pé pa sèvi YHWH é Lajan.

6:30 Lévé goumé nan chè a-w é nanm a-w, épi gadé sila ki ka palé an non an-Mwen, époutan i ka soté anlè kon kabrit, é pa kon timouton.

6:31 Davwa yo ka sèvi men pou touché zòt, é pozé men asi zòt, ka di sé koté Toupuisan sa sòti. Sèlman yo ka tranblé to fèy-pyébwa, kilès tout van é lèspri ka balansé.

6:32 Époutan, anmitan trant-mil nanm, pa ni yonn ka di, “Asé!” É poukisa? Sé davwa yo avèg, é pa ni pyès limyè adan yo.

6:33 Sèlman zòt, larèstan pèp-la, olyé konsolasyon, zòt pòté mépri. Sé pou sa, babyé ka lévé anmitan Fi a pèp an-Mwen.

6:34 Davwa séla ki trapé limyè-la, yo ka goumé èvè zam a lanmou, mé yo sèvi bann zam a lènmi : lahenn èvè mépri, épi yo simé grenn a divizyon é dézakò.

6:35 Mi i ka rivé, Sila ki Mové, kilès ka fè zòt hay yonn-a-lòt. Mé Mwen, Sila ki Sényè, Mwen pa obliyé zòt, é Mwen ké travay asi zafè mélé.

6:36 Pwoklamé lanmou é lyannaj a Krist nan lavérité é lajistis! Fo zòt zanfan a Papa-zòt. Davwa pèp an-Mwen ka jémi an nanm a-y.

6:37 Di ba kyè a Jérizalèm : Bondyé a-w enmé’w èvè on lanmou enfini. Suiyé dlo ki nan zyé a-w, viré jwenn Li èvè tout kyè a-w ; konsa I ké divini kouwòn-la anlè tèt a-w, é dyaman-la ki ba’w glwa.

6:38 Aprésa, pawòl a Sényè-la vini jwenn mwen ankò, prèmyé jou-la pawòl a liv-lasa koumansé maké.

6:39 Mi I di : Mwen ja vèti zòt tout, dépi lontan, é Mwen té di zòt : Pran gad, é panga yo madragé zòt!

6:40 Davwa, Mwen ka vwè nonm èvè bèl wòb fin é blan ki sizé adan on bato anlè sé dlo-la ; yo ka balansé dé men nan dlo-la pannan yo ka palé pawòl a démon.

6:41 Épi Mwen ka vwè asi on granmòn, anmitan dlo-la, on dòt nonm ki doubout drèt, é i abiyé èvè on wòb blan, ka hélé pou moun tann :

6:42 Malè pou zòt, davwa lènmi-la vini pli pré! Tann li kriyé, sòti koté’y! Sèlman p’on moun pa ka pati, davwa kri a-y ni otan silans ki vwa a on timouton.

6:43 I maské kò a-y èvè limyè, épi bèl had a-y ka sanm san tach. I voyé mésajé a-y koté pèp-la pou pwoklamé pawòl dousinè é madragè.

6:44 Sényè, di Mwen, a ki yo? Mi, yo sé gason a gran kolokent-la, fanm a move-kyè, ki ka paré chimen pou abominasyon-la ka vini.

6:45 Yo ba yo akonpli on plan yo té paré avansa, pou fè bann gason a Fanm-mayé la pri nan madrag é kité Nonm-mayé la. 

6:46 Gran kolokent-la mété kò a-y nan lenjistis, é i ka soutiré zanfan a Fanm-mayé la pou fè menm biten.

6:47 Fanm-la ka palé pawòl ka dousinz, mé i kon liyon anrajé ka atann jibyé ba-y èvè onpil asirans. Davwa, fanm-la di ba kò a-y : Annou dévoré yo! Panga kité onsèl mòso, davwa yo pa mérité viv.

6:48 Kouté sa Sényè-la ka di Fanm a-y ki pou mayé dèmen : Mwen ka asiré ou sové. Pa pè, Mwen ké pwotéjé’w. Kon on flè nan men an-Mwen, Mwen ka kyenbé’w, pou onsèl ti pétal a-w pa krazé.

6:49 Ou ni gran pri pou Mwen, kon koko-zyé. Nenpòt moun ka varé’w, I ké goumé èvè Mwen ; p’on moun pa sa bat vou, davwa Mwen ja gangné.

6:50 Rété adan Mwen é viv, davwa vi a-w ni gran pri pou Mwen, kon solèy èvè on flè.

6:51 Mwen ba zanj an-Mwen lòd chayé’w anlè zèl a-yo, pou ou pa konnyé pyé a-y asi on Wòch.

6:52 Épi lè ou ké swèf, ou ké bwè dlo a lavi, kilès ka tijé an abondans jis nan létènité.

6:53 Mwen anvi vwè pèp an-Mwen viv, mé yo malad. Pòté on rimèd pou yo géri, palé é yo lévé doubout. Di onsèl mo é yo ké viv.

6:54 Di pèp an-Mwen : Mi, Bondyé a-w ka kyenbé’w nan plat a men a-Y, alòs kimoun ké pozé men asi’w? Asiré I sé pwotèksyon a-w é boukliyé a-w nan jou détrès.

6:55 I ka maché akoté’w anlè chimen-la ki étwèt é séré. Fè fon asi’Y é I ké pwotéjé’w.

6:56 Lé-pèp, di’Y konsa : Mwen enmé’W osi, Sényè! Lanmou mwen ni pou’W, i otan gran ki solèy douvanjou ka monté bò midi. Toujou ka grandi é enmé, mi kyè an-mwen ba’W.  Davwa Ou té enmé mwen avan on moun té enmé mwen.

6:57 Avan fondasyon a lèmonn jòdi, Ou montré Ou sé on gran Sòlda èvè on lépé ki puisan. Ou gangné enpé wayòm é prens, é Ou rédansyonné pèp a-W èvè on bra ka lonji.

6:58 Kimoun ki kon’W, Bondyé YHWH? Pa ni on moun ka sanm Vou, ki ni Fòs pou sové.

6:59 Sé pou sa mwen ka adoré’W, davwa Ou sèl sé Sila ki Pli-Ho, é Ou sé Mésajé a lapé, Jézi-Kri, Rédantè an-nou.

6:60 Béni pèp an-Mwen, davwa yo pasé mové tan, mé lavini a-yo toupré. Mi sa Sényè Jézi di.