Témwen 7

7:1 Onpil lanné pasé, mwen koumansé grandi adan’W, Sényè, é mwen tonbé nan lanmou pou pèp a-W ; davwa mwen kriyé non a-W pou ban mwen lanmou kilès Ou té palé nan Pawòl a-W. 

7:2 Épi lanmou a-W koulé adan mwen kon gwo dlo puisan, é mwen divini amouré pou Ladivinité é limanité.

7:3 Ou é mwen, nou patajé onpil ansanm, époutan Sényè, mwen santi kon étranjé èvè frè é sè an-mwen, davwa Lèspri a-W té ka pijé mwen pou palé asi biten Ou té pozé asi kyè an-mwen.

7:4 Mé mwen rété san palé paskè mwen té pè. Anvré, Lèspri a-W té ka présé mwen pou di sé biten-lasa, sèlman mwen pa di yon mo.

7:5 Sényè-la di mwen : Pa kité p’on moun méprizé jennès a-w. A pa yenki ou, mé onpil moun ankò pou pé ké kouté.

7:6 Davwa, dépi tan té timoun Mwen té palé ba yo, sèlman yo pa pran gad èvè Pawòl an-Mwen, ni menm kouté Mwen.

7:7 Yo palé nan bouch a-yo, ka di : Pawòl a Sényè-la èvè nou, kimoun ké palé ban nou adan Non a-Y?  Konsa yo konprann-di I pa ka palé ankò, Sila ki kréyé bouch é ba lézòm lapawòl.

7:8 Épi yo di ankò : Pawòl a YHWH kachté jistan tan ké bout ; pyès moun pa pou ajouté ni woté adan mésaj a-Y. Époutan yo-menm ka ajouté é woté adan Pawòl-la pou fè sa ki mal, é non sa ki byen.

7:9 Konsa yo vini wòs nan kwayans yo ni, épi yo ka sèvi pawòl ki ta-yo kon èskiz pou pa kouté lè Mwen ka boké yo é gidonné yo.

7:10 Yo pilé Témwanyaj an-Mwen èvè pyé a-yo, épi yo touné zòrèy pa lòt koté ; yo pa vlé kouté Lèspri-Pwofési, yo pa anvi maché nan komandman an-Mwen ki doubout pou toujou jistan syèl é latè pasé.

7:11 Épi, kon zot pa ka konprann, mi sa Sényè-la réponn, lè I di : Si zòt té ka kouté Mwen, ès Mwen té ké oblijé fè zòt sonjé pawòl an-Mwen?

7:12 Sèlman, Mwen ka fè’y pou p’onn moun pa di : Kitan Ou palé ban nou, é nou pa kouté? Nou ka li Pawòl a-W toulé jou, plis pasé lé-zansyen avan-nou, épi kaz a-y adan nou.

7:13 Asiré pa pétèt, i anlè lèv a-zòt, mé pa andidan kyè a-zòt, sansa zòt té ké konprann sa : Mwen, YHWH, ka pran plézi nan lanmou é non adan sakrifis.

7:14 Oti konpasyon a-zòt? Menm pou frè a-zòt zot pa ni pyès lanmou, kifè oblijé mwen ka vwè lèmonn ka soufè toupannan zòt ka kyenbé Klé a lavi nan men a-zòt.

7:15 A ki sé nonm-la ki k’alé lwen nan bout a latè èvè Pawòl an-Mwen nan men a-yo?

7:16 Anmitan yo sé bann gason a Dyab ki ka bat lagè pou rèlijyon olyé pòté lanmou nan kyè a moun ki maltrété, séla moun ka bat é méprizé, mé kilès Sila ki Anho enmé.

7:17 Kité dlo a lavi tijé dépi an mitan a-w, vou ki Fi a Sila ki Anho ; konsa yo pé ké palé anmal moun ki nan lajistis, akòz moun mové ki sòti an mitan a-w.

7:18 Épi moun ava ki ka malsèvi non a Sényè Jézi pou trapé richès asi latè, yo ké vwè tan a-yo rivé. Épi moun madragè ki ka blasfémé non a Lèspri-Sen pou trapé glwa nan lèmonn, yo ké vwè sézon a-yo rivé.

7:19 Sényè, Ou voyé mwen kon zanfan é disip, kon mésajé pou palé ba Légliz a-W ;

7:20 Pou konséyé yo rété nan Pawòl a-W kilès Ou té ban nou, pou révélé kyè a-W é plan a-W ki sé Bon-Nouvèl a-W ki sen, menm jan ki sèvitè a-W, sé zapòt-la.

7:21 Épi Ou fè mwen sonjé on biten ki pa ka chanjé : P’on nonm pa pwofèt nan péyi a-y. Sé pou sa, Légliz ké ni pwoblèm pou sa kisa pou fè èvè mwen é èvè onpil pitit. Sèlman mwen pisimyé moun kriyé mwen témwen, sèvitè, é menm èsklav.

7:22 Antouka, mwen rété nan chimen-la, é mwen sèvi’Y anmitan sé jennès-la lè mwen té ni laj, épi mwen té ranpli èvè zèl a-W é pasyon a-W, é mwen té antiché nan lapriyè.

7:23 Nou priyé pou nou té fè plis pou glwa a-W, mé falé nou té atann pou vwè biten chanjé. Konsa mwen sanblé èvè dòt moun.

7:24 Épi afòs tan pasé, détwa adan nou arété vini sanblé. Kifè mwen té ranpli èvè tristès é délè kòlè, mé mwen té vlé kontinyé alé èvè’W, Vou ki enmé mwen.

7:25 Mi, Lèspri a Sényè-la di : Dapré’w, sé jenn-lasa pa ka chèché lavérité, kon ou-menm? Oben ou té ké enmé vwè yo nan lari, garé é san lavi spirityèl?

7:26 Davwa, pèp a-w ka di, Sényè-la pa ka rété sé koté-lasa. Mé, anvré, ou ni rézon, davwa Sényè-la pa ka rété nan bitasyon lézòm fè èvè men a-yo, mé I ka rété nan kyè a moun ki ka chèché’Y. 

7:27 Mwen konnyé anlè pòt-la, é yo ouvè ban Mwen. Alè yo sé tan-Mwen, é Mwen té travay adan yo. Kimoun ou yé pou jijé sèvitè a on dòt moun?

7:28 Vou épi séla èvè kilès ou ka sanblé, zòt ka di sistèm a-yo pa sòti koté Bondyé, légliz a-yo sé on abominasyon. Légliz a-zòt san tach?

7:29 Époutan, gadé! Sa moun ka vwè koté yo ka adoré, pa tini koté zòt. Idòl a-zòt ka rété nan kyè a-zòt, é magrésa zòt ka sizé pou jijé moun-andéyò. A pa anmitan zòt zòt dwé woté sa ki mové?

7:30 Zòt ka di moun-andéyò : Gadé jan péché a-w gran! Sa vlé di zòt san mal, san tach é san péché?! Sèlman ipokrizi a-zòt la ka monté jwenn Mwen kon lodè fimyé adan chan.

7:31 Alòs, woté poto-la ki nan zyé a-w pou ou vwè pli byen kijan pou woté pay-la ki nan zyé a frè a-w.

7:32 Ansanm, yo èvè zòt ké priyé Mwen, épi Mwen ké woté pikan difé ki anlè tèt a sila ki pa anmitan zòt.

7:33 Dòt ké jwenn zòt ka sanblé, mé si ya pa touvé lanmou, yo ké chapé lwen zòt drèt nan dé bra a fanm kolokent la.

7:34 Davwa, mi sa Sényè-la ka di : Mwen pa ka chèché on légliz men a moun fè, mé on Légliz a kyè. Séla ki ba Sényè Jézi-Kri kyè a-yo, é séla ki ka travay lajistis, moun ké kriyé yo gason a Sila ki Anho.

7:35 Mi sa Sényè YHWH ka di : Mwen sé Sila ki ka ouvè zyé asi péché, asi lajistis, é asi jijman.

7:36 Gadé sa! Zòt ka fè kon sé Farizyen-la, davwa zòt kwè zòt sé bon gadyen a Lwa a Sila ki Anho, kilès yo té bay pa sèlman pou zòt, mé pou tout moun.

7:37 Sèlman, mi komandman an-Mwen pou zòt : Alé panmi tout nasyon, ansényé yo tousa mwen té aprann zòt.

7:38 Ansènyman an-Mwen pa fondé yenki asi rézon é filozofi, mé asi témwanyaj ranpli èvè zouvraj lanmou, pasyans é modèsti.

7:39 Hadyès é awogans a-w ka témwanyé kont zòt, ka di zòt pa pratiké yenki mòso adan sa zòt ka di. Zòt pa hont? Davwa zòt ka aprann lézòt fè menm biten.

7:40 Épi Mwen ni onpil dòt biten kont zòt. Zòt ka kité zòt gidonné èvè pawòl a fanm-pwofèt Jézabèl, kilès mové zouvraj ka ba zòt lanvi palé èvè lahenn. Ès Mwen ké louwanjé zòt pou sa? Awa menm!

7:41 Sèlman zòt touné do asi mal zòt ka fè, é viré asi Mwen. Konsa Mwen ké vwè jistis a-zòt grandi kon solèy anmidi, é konsa tout moun ké jwenn on abri nan lonbraj a zèl a-zòt.

7:42 Davwa kon zéglon, Mwen ka vwè zòt volé pa-asi lorizon olwen ; p’on moun pa sav la yo ka pozé, sòf séla ki ka volé èvè yo.