Témwen 13

13:1 Mi zòt tout ni pou trapé lavi. Mé ki sans zòt ka ba mo-lasa?

13:2 Lavi ni tan valè pou nou ; mé ès ni on nonm ki sa déklaré fondè a-Y? Menm si zòt èspliké’y, ès zòt sa viv li?

13:3 Davwa lavi sòti koté YHWH, épi sé Li tousèl, adan gran konnésans a-Y, ki sa bay fondasyon a lavi.

13:4 Zòt ka di : lavi initil, lè nou ka vwè tout séla ki ka fè mal, é abizé pwochen a-yo, yo ka kontinyé viv ankò é ankò. Asiré, sé vré.

13:5 Mé, ès zòt sav lavi sé on kado ki ni valè, é nenpòt moun ki ni’y mérité gadé’y tibren pli lontan avan i vwè bout a-y?

13:6 Davwa, sa bon pou ba chak moun on dézyèm chans ; parèy on plant-flè ka fè flè nan sézon prentan, sa bon pou on moun chanjé chimen lè yo ka ba’y lokazyon fè’y.

13:7 Bondyé YHWH jis, kimoun ké kontèsté bonté a-Y? Si ou nòz, anni gadé kò a-w, é sonjé kantité fwa lè lagras té anlè’w, é ou pa  menm té sav.

13:8 Lavi sé on pyé-fwi, plen èvè bon lodè, é parfen a-y k’alé asi latè ; Van-la ki puisan ka touné é viré, é ka chayé’y alé.

13:9 Lavi sé on sajès pou konnèt tousa ki ni valè nan zyé a Sila ba kilès nou tout ké rann kont pou sa nou fè èvè on kado sitèlman bèl a gadé.

13:10 Lavi sé on limyè a Bondyé-Toupuisan é i ka fè nou admnèt i pa sòti koté nou.

13:11 Davwa a ki nonm-la koté kilès lavi sòti? Si ou konnèt li, ében aprann Mwen!

13:12 Davwa Mwen fè lavi kon miwa a sa ki anho syèl. Sa ki sòti dépi anho désann koté zòt kon zéklè ka désann anho syèl é ka kléré syèl-la dépi on bout jist lòt bout.

13:13   Épi Mwen di : Lavi pou fèt! Épi lavi vini. Osi Mwen di : Viv! Épi sé sa ki fèt. Mwen ka méné tout biten nan ègzistans, davwa san Mwen, p’on biten pa lavi, tout biten sé lanmò.

13:14 Mwen ba zòt on souf pa kilès bann zo ka gouyé nan kò, in souf pa kilès chak kazèt ka hélé lè Mwen kriyé. “Mi mwen”, yo ka di.

13:15 Anvré, bann kazèt, déklaré : Davwa Sényè YHWH kréyé é fasonné nou ; I ban nou lègzistans é pou sa nou ka glorifyé’Y. Nou sòti koté’Y nan koumansman, é sé koté’Y nou pou viré nan lafen.

13:16 Zòt ki gason a Adan, enmé lavi mé pa kité’y fonn asi’y. Pran swen a-y kon zé anba zèl a on poul. Kouvè’y é èspéré.

13:17 Wi, jou-la i ké éklò, zòt ké ri nan lajwa, davwa zòt èspérans a-zòt jwenn bout, é aprézan zòt sa chanté pou lonè a Sila ki ka fè tout biten fini.

13:18 Mwen enmé lavi davwa i sòti koté Mwen. Mwen ka bay li san miziré, sèlman enmé’y! Maché nan sajès, é zòt ké sav kijan pou satisfè’y.

13:19 Pa gadé sa ki pa kapab ranpli Lavi, davwa vi a-zòt pa ni sans san dlo. Kon dlo sé lavi, ba vi a-zòt Lavi.

13:20 Mwen sé Lavi, é san Mwen, vi a-zòt pa ayen. I ké kon pousyè Van-la ka chayé alé, i ka touné é viré tonbé la i té sòti.

13:21 Mé si vi a-zòt pa ayen sòf pousyè, èvè tigout dlo i ké divini labou.

13:22 Épi si labou-la séché, i ké divini onsèl èvè tout éléman ki adan’y, é i ké vini on tè ki bon pou planté.

13:23 Si vi a-zòt sé on bon tè, nenpòt sa yo planté adan ké pran rasin, é i ké divini on gran pyébwa ; épi zòt ké asiré pòté fwi.

13:24 Alòs, fo zòt divini on bon tè akoté dlo, é vi a-zòt ké ranpli èvè fwi alabondans.

13:25 Gason a Papa-zòt ki nan syèl, mi sa fo zòt yé. Davwa pwomès I fè ké rété pou toujou pou sila ki ka vini toupré’Y é èspéré on favè nan jijman a-Y;  

13:26 I sé sous a lavi pou vi a-zòt, limyè ki nésésè pou chak pyébwa pwodui tousa i bizwen pou viv é nouri lézòt.