Témwen 14

14:1 Sé èvè Bondyé-Vré tousèl, mwen ké maché pou toujou, sé èvè Li mwen ké rivé.

14:2 I sé YHWH, sèl Bondyé-Vré. I sé Alfa é Oméga. Non a-Y pou béni!

14:3 Lontan avan lanné mwen viv, Ou tousèl ki Bondyé. Ou pa ni koumansman, Ou pa ni fen.

14:4 Gran-Mèt, toulé jou Non a-W lévé anho bann syèl pa tout kréyasyon a-W.

14:5 Lanné ja pasé, é Ou la toujou ; Ou pa ka las, Ou ka fè mirak ; douvan zyé a-W, tan pa ni ras.

14:6 Anvré, mwen té ké gadé pou éséyé konprann ; mwen ké las afòs èspliké jan Ou gran é bòdzè.

14:7 Paréyé vi an-mwen jan Ou yé, davwa pou mwen Ou ni valè, é mwen bizwen’W.

14:8 Fidélité a-W gran, pou toujou ègzalté. Glwa pou non a-W, Sovè é Wa an-mwen.

14:9 Mwen ka hélé chanté laviktwa chak jou mwen viv, davwa Ou gangné tonbo-la.

14:10 Vini vwè mwen vitman, davwa mwen ka bigidi afòs pyé kagou. Méné limyè nan lannuit an-mwen, kité limyè-la kléré. Di sa, é sa ké fèt.

14:11 Jou apré jou, mwen èspéré adan’W. Mwen kwè adan’W tousèl. Davwa kimoun kapab sové mwen? Tout moun kon mwen.

14:12 Afòs maché, pyé an-mwen mèg é ka tribiché san dlo adan dézè-lasa, épi fòs an-mwen ka lagé mwen.

14:13 Lévé asi twòn a-W, épi vini ban mwen on pal, YHWH! Kité lapli a-w désann pou i rafréchi mwen

14:14 Montré mwen jan Ou gran, davwa mwen sa pa ni p’on moun kon’W. Kimoun ka sanm Vou jan Ou miziré. 

14:15 P’on moun pa sa di, “Mwen doubout kon Sényè-la!” Wi, Sényè, Ou sé Bondyé-Vré, kilès dé men a-y ka travay èvè adrès é puisans.

14:16 Woté péché-la ki ka néyé mwen! Davwa, si mwen di mwen pwòp, mwen ké doubout kon mantè douvan’W.

14:17 Pirifyé sa ki adan mwen, pou tousa ki andidan vini pwòp é blan kon koton.

14:18 Ranfòsé lafwa an-mwen, épi pa kité lèspwa an-mwen mò lè ladévenn asi mwen.  

14:18 Kité jou lakontantman diré pli lontan ki séla ki fè zyé an-mwen pléré nan tristès é chagren. Rété èvè nan an-mwen, épi kité’y vwè glwa a-W.

14:19 Souvan mwen ka sonjé lwa a-W, é mwen ka di i gran é san défo. P’on moun pa ka sézi sans a lwa a-W, mé Ou la pou bay répons pou kèsyon nou ni.

14:20 Lanmou a-W ki gran é bèl, lwen pasé sa nou konprann ; alòs, aprann nou jan pou enmé, Vou, pwochen an-nou, épi yonn-a-lòt.

14:21 Fè kyè an-nou vini yonn èvè ta-W. Fo nou kon Ou yé, Yonn.

14:22 Sa sé komandman a-W pou nou ; fo nou yé kon Ou yé. Épi nou vlé obéyi. Alòs, ban nou fòs asèlfen nou sé yonn, kon Ou té voudré.

14:23 Dépi prèmyé jou jistan jou-rèpo rivé, kèlkanswa jou-la, nou vlé rété fidèl pou non a-W. Èvè tousa nou ni, nou ké louwé’W.

14:24 Piyano, flit épi gita, twonpèt, tanbou épi tibwa, tout larèstan enstriman ni pou akonpannyé lanmen é lavwa a tout fidèl a Sényè YHWH.

14:25 Ès ni kèk sousi nan kyè a séla ki ka louwé’W, Sényè? Si sa té menm vré, Ou ni pou ba kyè ki maré onpil lajwa ; épi konsa, ansanm nou ké réjwi nan sovasyon a-W.

14:26 Nou ni zèl pou’W, Sényè ; nou ka lité adan non a-W. Fè limyè an-nou kléré kon flanm-difé, épi non a-W pou louwé toupatou asi latè.

14:27 Ba Sila ki sizé asi twòn-la, laglwa, évè lonè é puisans, dépi toujou é pou toujou. Louwé Sényè YHWH!