Témwen 15

15:1 Mwen fè lidé priyé Sényè-la pli souvan, piplis twa fwa lajouné, dépi prèmyé simenn a mwa-d’novanm 2008, davwa kyè an-mwen santi sa té bon.

15:2 Mwen désidé lévé lavwa bò Sényè-la, pou frè é sè an-mwen ki ka soufè anmitan pèsékisyon, èspésyalman nan péyi Lend, é menm jan nan lèmonn antyé.

15:3 Mwen mandé sèvi on pyès pou priyé nan lékòl-la mwen té ka travay la, épi yon jou, alè moun ka déjiné, mi mwen trapé on vizyon.

15:4 Mi zyé an-mwen vini ouvè. Épi, mwen vwè on nonm abiyé kon kiltivatè, ka kouri anlè on tras anba granbwa. Sé pyébwa-la té otan ho ki gran masonn alantou a-y.

15:5 Chak pa présé i té ka fè, sé té kon ta on lapen on chasè envizib pran pou jibyé.

15:6 I pa té ka las gadé dèyè, ka touné do, é près ka tonbé plizyè fwa.

15:7 Labou-la, ki té ka monté anba pyé a-y chak pa i fè, té ka sanm otan lou ki goudwon anlè on chimen toufré.

15:8 Lézè té lou, sé tout biten alantou a-y té gri, menm syèl-la. Époutan a pa té lannuit, mé plito i té ka sanm granbonnè maten, té ka fè nwè toujou.

15:9 La mwen vwè kat nonm ki parèt dépi olwen ; yo té ka kouri pli vit ki’y. Sé nonm-lasa té kiltivatè osi, épi yo té ka vini pli pré.

15:10 Yonn adan sé kiltivatè-la té ni on fòch-kout, on déyèm té ni on gran fòch, épi lézòt dé té ni pikwa ; yo té ka kyenbé sa byen fò nan men a-yo, paré pou piké sa nan do a sila yo pran pou jibyé.

15:11 Lè yo té toupré trapé jibyé-la, on gwo limyè parèt nan syèl-la, é i vèglé yo tout, menm nonm-la yo té ka chasé la.

15:12 Gwo limyè-lasa té otan blan ki koton, é té ka kléré kon solèy.

15:13 Épi limyè-la vini toupré nonm-la épi i vlopé’y kon dra-lenn asi lèstonmak a-y, otan épé ki on manto. Manto limyè la té ka sanm zèl a on zanj.

15:14 Sé zèl klérant la trapé prèmyé nonm-la, épi i lévé dépi atè-la é monté nan anlè on hotè sé lézòt nonm-la pa ké kapab rivé. I vlopé’y on mannyè yo pa ké ka vwè’y ankò.

15:15 Pè sa yo té vwè, sé kat vòlè-la chapé kouri. Sèlman limyè-la, kon boul-difé, pati alakous dèyè yo. Yo pòkò té kouri san mèt, limyè anni tonbé asi yo.

15:16 I tonbé anlè yo kon mas asi on plim, kon wòch ka déboulé mòn é krazé anlè on kaz.

15:17 Kò a-yo té ka soufè afòs limyè-la té ka pézé anlè yo, yo té ka kriyé doulè, mé pa té ni p’on moun pou délivré yo.

15:18 Épi mi sé la yo mò ; davwa on bann mové boug té vlé mété on nonm jis alanmò.

15:19 Kò a sé bandi-la rété dépayé atè anlè tras-la, kon bèt-mò yo kité pou bèt ka manjé zòdi.

15:20 Aprésa, limyè bat-aryè toudous, épi nonm-la i té woté la, i viré pozé’y atè.

15:21 Tout blès i té ni avan, épi tout labou-la ki té anlè lenj a-y, pa té ni onsèl tras. Lenj a-y té viré pwòp kon lenn pwòp.

15:22 P’on moun pa té ké kwè i té an danjé toutalè-la. Davwa, ou té sa li lakontantman anlè figi a-y, paskè délivrans té antré nan kaz a-y jou-lasa.

15:23 Aprésa on vwa palé é di : Gadé sa! Moun ki ka ataké zanfan an-Mwen, sé Mwen yo ka ataké. Chèché malè pou zanfan an-Mwen, épi Mwen ké malè pou zòt.

15:24 Mi on biten fodré sav : Nan lanmò a moun jis, Mwen pa ni plézi.

15:25 Mi, Mwen ka vini délivré’y, é Mwen ka vini chasè, é prédatè pou séla ki té ni lidé détri.

15:26 Pa trapé pèd, pèp an-Mwen, davwa zyé an-Mwen anlè zòt. Kimoun i vlé ba zòt mal pou diven? Mi, diven a-y ké lanmò.

15:27 Davwa anmitan pèp-la, moun ka di Sényè-la pa vivan ; sèlman I touprézan. Mi I ka vansé é I ka travay èvè puisans pou sispann méchansté a moun ki mové.

15:28 Konsolé pèp an-Mwen. Di Chéri an-Mwen, mi Bondyé a-y la èvè’y, Sényè-la pa abandonné’y.

15:29 Menm jan oblijé ni malè pou sondé séla ki fo, mi sa rivé zòt. Mi, sé pou lè jou a Sovasyon a YHWH vini, p’on moun pa di : sa pa ayen.

15:30 Okontrè, lè tout moun ké vwè Men a Sényè-la travay èvè puisans, nan bouch a-yo ké monté chanson ka louwé é di mèsi.

15:31 Davwa yo ké sav pa ni dòt bondyé ki ni Délivrans konsa, ka travay lanmou konsa, annisòf YHWH.

15:32 Sèl Bondyé-Vré, I kapab, é akoté’Y pa ni dòt bondyé.

15:33 Yo soufè, mé yo ké konsolé, Bondyé mèt-linivè ka di. Konsa yo ké trapé on gran rékonpans, davwa yo pòté lahont pou chaj épi yo gadé lafwa pou Bondyé a-yo, yo ba abandonné’Y.  

15:34 Gadé tipawòl-lasa kon konsèy, davwa rékonpans a moun maléré é pa fawo sé nan syèl é asi latè i yé.