Témwen 16

16:1 Konsa pawòl a YHWH vini jwenn mwen prèmyé simenn a révélasyon é tout siny mwen vwè é pawòl mwen mwen tann, kilès di :

16:2 Sé moun-lasa ka di i ka vini, adan kat lanné tout biten ké fini.

16:3 Ès dèmen sé ta-zòt? Ès zòt sé yonn adan séla ki sizé anho pou zòt désidé on dat lè tout biten asi latè pou fini?

16:4 Yo sé on ti kantité, épi sé ti entélijans yo ni konparé èvè yonn adan nonm savan asi latè.

16:5 Zòt ka vwè, mé zòt pa ka konprann ki sa zòt gadé kon enpòtan, sé pli piti adan tout. A pa ti mal sa ka fè mal, lè zòt ka vwè jan zòt toutouni nan lèspri!

16:6 Pa di, “Sa fini.” Davwa p’on moun ki YHWH pa Mèt asi tan ; épi sa I désidé, sé ké rivé nan tan-la I chwazi.

16:7 Gadé sé pyébwa-la ; lè yo pa pèd fèy, zòt ka di livè ka vini byento. Ében sa parèy èvè lèmonn. Gadé jan fèy a-y ka volé lwen, épi asèpté sa ki pou rivé.

16:8 Sényè-la ja désidé on tan pou I vini, é i toupré ; sèlman zòt ki konprann sé zòt ka prédi on jou é on tan, véyé kò a-zòt!

16:9 Tan-la rivé pou révéyé anmitan lé-mò. Lafen, sé nan dé men a Sényè-la i yé. Mwen ka di zòt sa pou p’on moun pa vini, Mwen YHWH pa janmé palé asi sa.

16:10 Lè a lafen ké vini byento, lè Israèl ké rétabli, kon Mwen té ansényè.

16:11 Yon jou ké vini adan dé lanné tan, lè ké bazoudi asi sa ki ka fèt nan Latè-Sen.

16:12 Détwa moun ké di : Ayen kon sa pa janmé té fèt, ola sa sòti? Kijan sa fèt?

16:13 Kouman? Zòt méyè pa sav sé YHWH ki Mèt-fè a sa lézòm pa ka sézi?

16:14 Détwa moun adan zòt kwè, ki Mwen Sényè YHWH, Mwen mò. Zòt pa hont èvè fo-syans a-zòt?

16:15 Davwa, magré’y, zòt ka désann pli fon andidan labou. Kimoun ké vini fè zòt sòti adan’y, lè Mwe, ka lonji bra pou zòt, é zòt pa vlé’y? Konsa zòt ké péri nan péché a-zòt, davwa ki sèkou ki délivrans, sé koté YHWH tousèl yo ka sòti.

16:16 Rachté tan, davwa mi Jérizalèm ka abiyé kò a-y èvè bèlté. I ka fouré had ki pli zouté, jistan jou-la Mari a-y ké vini jwenn li.

16:17 Mi sa Sényè-la ka di tout sé moun ki konprann-di yo sé divinè-dèmen : Dapré zòt zòt ka paré plan a-zòt pou on tan lontan.

16:18 Mwen tann di : Adan ven lanné nou ké fè kisisi kisala. Kimoun ké anpéché nou jwenn bout nan sa nou ni lidé fè? Mwen ké fè’y, Sényè Toupuisan di.

16:19 Davwa ki timoun ki granmoun, moun kouché kon moun doubout, yo ka mò akòz mové biten zòt fè ; épi zòt ka nòz blanmé Mwen, ka di Mwen pa ka fè ayen.

16:20 Bann vè-tè ki zòt yé! Zòt ka kaché kò a-zòt anba labou pou p’on moun pa vwè sa zòt ka fè, biten ki pli mové yonn pasé lòt.

16:21 Mwen té palé é mété nan ègzistans, épi Mwen té bay tousa ki nésésè pou lavi anlè latè sé on paradi pou lézòm.

16:22 Sèlman lajouné vini lannuit, épi limyè fè plas pou nwèsè, lè zòt té di nan fonkyè : Mwen ké fè sa mwen kwè ki jis, mwen ké fè sa mwen anvi.

16:23 A! Si jistis a-zòt té yonn pou vré, asiré pa pétèt, lèmonn té ké on koté méyè. Mé sé yenki dèstrisyon é dézolasyon nan zyé a ki nonm ki fanm, kilès soufè a-yo ka témwanyé kont mové wòl a-zòt.

16:24 Ni on tan pou lafen, mé lafen ké fini brilé jou-la Mwen désidé akonpli pwofézi Mwen ki té sòti koté Mwen, séla Mwen té bay dépi an tan pwofèt Izayi èvè lézòt, asi lafen a tousa zòt konprann-di établi.

16:25 Mi sa ki pou fèt nan jou dézolasyon pou séla ki rèfizé èspré pa tann yo ka kriyé yo onfwa ankò.

16:26 Davwa Mwen pa janmé las palé é di zòt : Viré jwenn Mwen, lagé vyé manni a-zòt épi viré asi on chimen ki ni on pwomès ki vré, koté tout biten sé lavi, koté lanmò pa ni pouvwa.

16:27 Mwen voyé mésajé an-Mwen, épi yo ka doubout pou goumé. Yo ké pwoklamé sa yo rèsouvwè, é yo ké pòté’y ba tout moun. Lavi ka èspéré nenpòt moun ki ké kouté yo, pou moun ki fo rété ababa.

16:28 Yo pé ké hélé èvè on vwa ki fò, mé lanmou ké gidonné yo, pou onpil kyè géri.

16:29 Yo ké palé di Sényè-la èvè puisans é lotorité, pa kon détwa moun kwè, ki ni lidé sé èvè on vwa fò Sényè-la ka palé. Élas!

16:30 Puisans an-Mwen sé Lèspri é Vérité ; mi lotorité ki tan-Mwen.

16:31 Davwa yo tout ni vwa pou palé, mé p’on yonn pa ni asé Lèspri, davwa Lèspri ka sòti koté YHWH. Tout puisans a-yo sé on manti, davwa Mwen tousèl ki Lavérité.

16:32 Viré jwenn Mwen èvè on kyè ki vré, pou bobo a-zòt géri, épi zyé é zòrèy a-zòt ké viré jwenn tout sansibilité a-yo nan jou délivrans.

16:33 Épi gadé é konsidéré vizyon-la Mwen ka ba’w la, sila ou té mandé mwen la. Moun-la ki voudré konprann li, i ni pou mandé Sila ki bay li.

16:34 Sila ki kwè i asé savan pou konprann sans a-y, ébén i té ké pli gran pasé Mwen, Mèt-fè a tout biten, Gadyen a tout vérité.

16:36 Mi! On nonm té ka maché asi on tras ka méné nan lavil sen, Jérizalèm ; i té nan yon péyi sèk.

16:37 Té ka rété yenki détwa mèt pou rivé ora gran-masonn a vil-la, épi mi on limyè ka kléré fò désann anho asi’y.

16:38 Yo pran jisk anho syèl, é i té doubout douvan gran twòn-la. Twòn-la té plen limyé alantou ki té ka sòti andidan’y.

16:39 Sila ki Pli-Gran, ki té sizé asi twòn-la, ba nonm-la on liv nan men a-y, épi I di’y konsa : Viré asi latè, épi pozé liv-la la Mwen ké di’w.

16:40 Yo viré méné nonm-la asi latè, épi yo ba’y on lòd : Pozé liv-la atè-la, épi kité lavi parèt.

16:41 Lè i té pozé liv-la atè-la, latè tranblé, épi lavi payé kon lafimé.

16:42 Tèlman lavi, zèb fanné anni parèt nan dézè-la, épi pyébwa kochi anni doubout, épi fèy vèt pousé.

16:43 Aprésa, fwi parèt nan chak pyébwa, épi yo tonbé atè otan vit ki yo té parèt. Kon yo tonbé, yo boujonné é grandi ho, épi yo vini dòt pyébwa.

16:44 Sé nouvo pyébwa-lasa pòté fwi, épi lawoutounèl té ka alé ankò é toujou, parèy lawoutounèl étènèl a dlo, ki ajékontinyé ka tonbé atè é monté nan syèl.

16:45 Sila ki ni zòrèy pou tann, i ni pou tann sa ki di kotésit, davwa lavi étènèl pou tout moun ki ké asèpté’y jan yo té bay li.

16:46 Sé menm biten pou nonm-la Sényè-la pé ké fè rèpwoch nan Jou-Jijman.

16:47 Davwa, Jézi-Kri, Avoka a-yo ka travay é I sizé anmitan anplas a-yo, dépi yo pa ka konmèt pyès dòt krim toupannan yo la ka atann gran jou-la.