Témwen 17

17:1 Mi sa Sényè-la ka di anrapò èvè divini a limanité. Sé sa ki ké yé anrapòt èvè vini a Sényè-la Jézi, ki Gason a Lézòm, é Gason a Bondyé.

17:2 Mi sa ké rivé : Sényè-la ké sanblé bann zanj a-Y ki sen toupatou asi latè, é yo tonbé anlè moun san Bondyé.

17:3 Séla ki yé rèfizé tann pawòl-la yo té ba yo dépi anho, yo-menm ké toudi.

17:4 Mi sa ki pou pasé : Wa péyi onò ké désann asi Jérizalèm nan jou Sabat, kon i té di : Sé on jou favorab pou détri yo. Annou désann asi yo lamenm.

17:5 Konsa larmé-la ké vansé asi Vil-la, épi i ké kité komandan-la pran karé a-y anmitan masonn a-y.

17:6 Wa-la ké pran posésyon a vil-la, é i ké mété on lalwa diktatè asi’y. P’on moun pé ké andwa vini sitwayen adan vil-la san mové wa-lasa ba yo dwa.

17:7 Wa-lasa ké bay lòd mété difé nan tanp-la koté onlo moun kwè yo té k’ay bati ta-yo, épi i ké ranplasé sila èvè ta-y.

17:8 Épi i ké bay lòd mété pèp-la andèyò vil-la ; épi tout moun ki ké vlé antré andidan, yo ké ni pou péyé on taks.

17:9 Èvè pilo lajan-lasa, i ké finansé mové plan i té fè lidé kont larèstan nasyon.

17:10 Mé plis adan lò-lasa ké sèvi pou bati tanp-la èvè imaj-la i ké fè pou li-menm.

17:11 Épi i di ki yo konsa : Mi sé sila ki libéré zòt, vini adoré’y! Konsa tout moun ké pliyé jounou douvan imaj-la akòz yo pè lanmò.

17:12 Mi sa ki ké fèt nan Jérizamèm, mé sé koumansé soufrans ka koumansé. Davwa lajouné ké vini nwèsè asi yo, épi yo ké hélé anmwé Bondyé nan Syèl.

17:13 Pyès nasyon pé ké vini pou sové yo, davwa tousa ké fèt an tan nwèsè ; épi yo ké kriyé nan doulè lè yo ké vwè zanfan yo pèd.

17:14 Nanm a moun jis ké nan danjé, davwa sé sòlda-la ké alé lachas toupatou dèyè yo, asèlfen p’on moun pa tann anmitan chan pawòl a Sila ki Toupuisan. Yo ké kyouyé yo, pou p’on zòrèy pa tann yo bay lavwa.

17:15 Nanm a moun mové ké réyisi, épi yo ké konplété tout plan yo té paré, davwa sé biten-lasa ni pou pasé, é yo ké pasé.

17:16 Panga zòt pè yo, davwa séla ki ka kyouyé zòt la, yo ka ajouté nan a koup san-la ki ka koulé dépi Abèl jiska lafen, épi jou-la Mwen ké vidé koup-lasa, jijman a-yo ké pwoklamé.

17:17 Aprésa, ké ni lapé pou Jérizalèm, davwa sé on Bèjé ki ké méné’y douvan, épi mouton a-Y ké manjé nan lajistis é lanmou a Bondyé.

17:18 Jérizalèm, O Jérizalèm! Konmen fwa Mwen ja palé é palé, ankò é ankò? Ès ou janmé kouté Mwen?

17:19 Yo anvi kontinyé fè lidé a-w, é ou kwè lapé ké sòti koté’w.

17:20 Sèlman arété sé mové biten-la ou ka fè la, épi viré do koté Mwen, Bon Bèjé é Wa pou’w. Konsa, Mwen ké délivré’w.

17:21 Lè lènmi-la ké vini présé asi’w, p’on moun pé ké délivré’w, épi lahont ké asi fanm-la tout moun té jalou la.

17:22 Wa di onò ké méné’w nan dèstrisyon akòz zouvraj ou i fè ki ké mové é kaché pou lézòm.

17:23 Séla ki pa ni zyé yo bizwen, pé menm vwè ki jou sa ké rivé’w, davwa bann pawòl kotésit sé pou moun véyatif, é séla yo ké nonmé gason a Bondyé.

17:24 Anvré, pou séla kilès yo té bay Lèspri, sé biten-la ké alavwéri kon lapli anlè mòn. Asiré pa pétèt i ka désann, épi p’on moun pa kapab anpéché’y fè travay a-y.

17:25 Kouté pawòl a Bondyé YHWH ba zòt, bann fényan ki pa ka pran swen a pèp an-Mwen : Ès zòt pa gadyen a frè a-zòt, zòt ki ka di pawòl an-Mwen adan zòt? Sèlman pawòl zòt ka di sé yenki manti.

17:26 Davwa, anmitan lè zòt sanblé, Mwen ka vwè nonm èvè fanm, kilès kyè ka pléré lajouné kon lannuit. Kouman sa?

17:27 Wi, yo ni batman-kyè é yo ka soufè akòz mové lavi yo ka bat.  

17:28 Yo pèd lèspwa adan Mwen, épi sé pou konpasyon yo ka vini anmitan zòt, ka èspéré yonndé jou méyè.

17:29 Lapé a-yo ka konsomé akòz traka ki sòti nan fenfon a nanm a-yo. Yo pa ka jwenn rézon pou vini é fè fon asi Mwen, davwa yo ni lidé Mwen pé ké konprann léta a-yo.

17:30 Sé kont tout jistis, moun ni pou akizé Mwen, é di Mwen pa éfikas nan zafè a lavi jòdi-jou.

17:31 Époutan, Mwen pé ké pòté plent kont pèp-la, davwa sé zòt ki fè lèspwa yo ni ka éfasé.

17:32 Rèkonnèt onsèl biten : Mwen ka asiré yo sové pa dé men an-Mwen.

17:33 Épi sovasyon a-yo, sé ké kon pou on zozyo granbonnè maten lè lannuit bout, kon pou on ziwondèl nan prèmyé jou prentan apré livè fini.

17:34 Yo ké viré sòti nan livè, épi yo ké jwi sézon lapé ; yo ké sòti nan sézon karèm, épi yo ké kontan fréchè.

17:35 Yo ké maché nan lajwa, épi chanson lakontantman ké monté ora bayè a Syèl-la.

17:36 Épi bann zanj, chériben é sérafen, ké voyé lavwa monté é dansé èvè yo, épi glwa a Sényè YHWH ké kléré asi yo.