Témwen 24

24:1 Kisa lavi pou on zanfan a lézòm yé, lè i ka désann nan woulib plat, akòz mil-é-yonn lidé nan tèt?.

24:2 Ou palé onpil pawòl, é Mwen voyé dòt pou konsolé’w é mété’w alèz adan traka ou yé. Si sé té pou’w tousèl, Mwen té ké fè’y ankò é ankò.

24:3 Déklaré lokans-la pou séla ki kouché nan soufrans : Ès Sényè YHWH sé yonn adan séla ki lwen pèp-la? Oben ès I toujou prézan nan tout koté?

24:4 Épi anmitan séla Mwen kréyé, Mwen ka vwè onpil kilès nanm a-yo swèf é aladriv. Yo ka soufè é yo ka pléré, mé Mwen vré é Mwen ka rété vré. Tini nonm, fanm, jenn moun, é vyé moun ki pèd vizyon a lajwa. Mi, Mwen oblijé palé ba yo.

24:5 Ou, sèvitè pou mwen, ou témwanyé asi sa ki pasé é prézan, é Mwen montré’w on divini ki méyè. Ou sé on zouti pou ba lézòt fòs é kouraj, pou sèvi modèl.

24:6 Gadé sa! Lajennès, é tout lézòm ni pou sav, Mwen YHWH, sé Sényè ; Mwen gran, é Mwen sé Chimen, Lavérité, é Lavi.

24:7 Sèlman, kimoun ka pran swen a-yo? Kimoun ki mélé èvè dévenn a lajennès san okipasyon? 

24:8 Menm si ou kriyé tanzantan, é montré on kyè plen konpasyon pou kanmarad a-w, Mwen sav sé koté Mwen sa sòti.

24:9 Ou soufè é ou viv on lavi san bonnè pannan onpil lanné, sèlman ou rété doubout akòz gras Mwen fè’w. Onpil jenn moun ni lidé lanmò, é délè ni adan yo ki ka rivé fini èvè lavi. Épi ou-menm, lè ou té pli jenn, yonndé fwa lidé-lasa vini nan lidé a-w, mé Mwen kyenbé pou glwa an-Mwen.

24:10 Alòs pléré pou soufrans a zanfan an-Mwen. Lévé lavwa koté Mwen, épi alé nan lari. Envité yo adan kaz an-Mwen davwa yo garé.

24:11 Sonjé lè ou té nan mové tan lapenn, lè ou pa té ka vwè yenki nwèsè pannan lézòt té ka vwè fo souri a-w. Davwa, sé vré, lézòm ka gadé lasanblan, mé Mwen, Sényè-la, ka gadé kyè èvè nanm.

24:12 Mé p’on moun pa ka lévé palé adan non an-Mwen. Davwa lè Mwen fini soufrans a-yo, yo k’alé adan sé légliz-lasa, épi travay a-yo ka fini la, avan menm i koumansé.

24:13 Gadé sa! Sé andéyò kaz a-zòt, zòt sa jwenn onpil malad. Andéyò kat masonn a-zòt la, pèp-la bizwen tann Pawòl an-Mwen. Sé on bon nouvèl é on limyè pou séla ki ka vwè yenki nwèsè alawonn.

24:14 Mwen ba zòt lanmou pou patajé, mé zòt ka séré’y nan men a-zòt. Gadé nan lari é vwè dézolasyon-la ki douvan zyé a-zòt.

24:15 Dyab-la ka varé granbonnè sé jennès la, dépi yo toupiti. Épi tousa sé davwa i sav, sé grenn ki ka fè pyébwa. Si lajennès pa ka grandi drèt, tout jaden-la pa ka pòté bon fwi.

24:16 Otan Mwen enmé zanfan an-Mwen, zòt ka fè Mwen hont. Davwa zòt sizé adan tanp a-zòt, é kaz a-zòt, épi zòt ka manjé é bwè, zòt ka di yonn-a-lòt : Gadé jan lajennès vini mové!

24:17 Si sèlman olyé palé, zòt té ka fè on biten, rékonpans a-zòt té ké pli gran pasé on chanson. Mé pawòl a-zòt initil, é pa ka chanjé ayen nan sitiyasyon a-yo.

24:18 Ou, ki sé sèvitè pou mwen, Mwen ka mandé’w priyé ankèo pou yo. Yo lagé sa, ka ou pa kapab fè ayen pou yo, sèlman ou ni pou sav ou kapab fè onpil, épi pawòl a-w plen lanmou é sajès ké sèvi.

24:19 Ou ké alé nan lari anmitan vil, é ou ké on mésajé lèspwa pou tout séla ki ka soufè.

24:20 Ki yo pri nan dwòg oben alkòl, ki yo nan pwòstitisyon oben vis, ki yo sal oben ka santi mové, ou ké alé é ou ké fè zanmi èvè séla Légliz obliyé.

24:21 Mwen pa sa santi ankò séla latè pa ka pòté ; yo tèlman ho, men-yo pa ka rivé ora pwochen a-yo. Mwen pa janmé santi Mwen konsa lè Mwen divini on nonm pou sové zòt. Alòs, kimoun zòt yé pou kwè zòt méyè pasé Mwen?

24:22 Jou-lasa, lè Mwen ké jijé latè épi tout syèl, onpil moun ké rann kont asi byen yo fè pwochen a-yo, sa yo fè sila ki moun a Kò-la a Krist, é piplis pou sila ki andéyò, ki pòkò moun a Kaz a Bondyé.

24:23 Davwa, tout pawòl zòt di é zafè zòt fè, sé on sous pou sové é péri ; zòt sé on sous ka envité oben dévoyé nan lapòt a wayòm-la.

24:24 Désidé kilès zòt vlé yé, pou ba pèp-la ki nan dézèspwa : dlo oben difé, limyè oben nwèsè, réparasyon oben démolisyon.