Témwen 25

25:1 Maké ba sé légliz-la, épi di yo : Asé èvè zòt ki alèz é blèz! Sényè-la di ankò : Asé èvè zòt ka viv ti lavi nan lapé!

25:2 Kitan zòt ké konprann zòt sé limyè nan lèmonn? Séla ki ni limyè-la, yo ni pou kléré asi séla ki nan nwèsè. Sèlman zòt ka gadé limyè a-zòt pou zòt-menm, épi dlo a-zòt, zòt ka bwè dlo yonn èvè lòt. Zòt pa hont?

25:3 Plizyè fwa Mwen palé ba pwofèt a-zòt, sèlman zòrèy a-zòt té plisimyé tann pawòl ki dous. Épi zòt ka di yonn ba lòt, “Sényè-la ké béni’w”. Épi zòt ka réponn yonn-a-lòt, “Wi, Amèn”. Épi zòt fini palé.

25:4 Mé konmen adan zòt ka di, “Pa béni yenki nou, Sényè, mé pipli séla ki bizwen”? Anvré, zòt sé prèmyé minis a Légoyisité, davwa zòt ka obliyé méné bénédisyon ba vwazen a-zòt.

25:5 Épi laglwa pou séla ki ka lévé lavwa pou kanmarad a-yo, lézòm, épi lapé pou séla ki ka travay dapré tousa.

25:6 Épi Mwen té di, “Alé nan lèmonn, épi pwoklamé Bon-Nouvèl la”, é Mwen té di osi, “Dabò pou yonn, nan Jérizalèm”. Ki vlé di nan vwazinaj a-zòt, koté zòt ka viv toulé jou.

25:7 Davwa Mwen ka voyé moun misyonnè nan péyi lòt-bò, épi yo ka fè travay a-yo gidé nan Lèspri, épi sa ka fèt.

25:8 Zòt ka di, zòt pa kapab fè biten konsa, mé menm koté zòt ka rété zòt pa ka fè ayen. Ès kyé a-zòt sé wòch? É si yo ni santiman, pouki zòt ka rété san fè ayen? Menm si zòt vwè lézòt pa ka travay, sé on rézon pou rété la asi ban-fényan.

25:9 Konsa, kontinyé palé é di, “Lévé!” Mi, ou-menm èvè yo, zòt ké lévé é maché pou fè larmé a lanmò bat dèyè.

25:10 Ou ka di ou vlé fè on biten, é ou ka pléré. Konyéla, séché dlo nan zyé a-w, épi pran zam a-w. Annou! Priyé épi alé jwenn séla moun té obliyé, kon moun té obliyé’w jistan Mwen vini jwenn vou. Ès ou obliyé sa Mwen fè ba’w?

25:11 Non, Sényè, mwen pa obliyé bonté Ou fè mwen, é mwen vlé fè on biten pou yo. Sèlman mwen pa ni fòs, mwen pa ni lajan, mwen pa ni ayen pou fè gran biten pou yo.

25:12 Kouté sa, ou ki sèvitè a Mèt a-W : “Mi, Mwen voyajé anmitan bann vil Galilé é Jida. Mwen pasé nan Samari é nan péyi a moun payen.

25:13 Ès Mwen té ni on gwo bèl loto? Non, awa! Mwen maché bon kilomèt nan chimen wòch, Mwen monté anlè bourik, épi Mwen travèsé dlo nan bato a péchè.

25:14 Ès Mwen té ni on gran bann konpè? Non, awa! Pou koumansé Mwen té tousèl, épi nan chimen, Mwen kriyé détwa nonm, aprésa dòt moun ankò, épi yo suiv Mwen.

25:15 Ès Mwen té ni onpil pyès lajan? Non, awa! Sé yenki Jida ki té ni sak lajan la pou pwovizyon an-nou tout, épi adan pa té asé pou fè on gran fèsten.

25:16 É kanmenmsa, Mwen chanjé lèmonn alantou Mwen, é menm pli lwen ankò. Mé kisa Mwen té ni otan?

25:17 Mi, konprann sa! Mwen té ni lanmou, lapé, lajwa, é lahadyès pou alé jwenn séla kilès bann moun aristokrat té ka méprizé, épi Mwen pa okipé sa moun té ké di asi Mwen.

25:18 Moun ki fen, Mwen ba yo manjé, épi moun ki swèf, Mwen ba yo bwè ; moun ki malad, Mwen géri yo, moun ki nan chagren, Mwen konsolé yo, épi moun ki anchenné, Mwen libéré yo. Mwen manjé èvè moun ki modi, Mwen touché moun ki sal, épi Mwen palé èvè moun ki méprizé.

25:19 Magré tousa, zòt sav kisa moun di asi Mwen : “Misyé, sé on mantè, on blasfématè, zanmi a moun péchè, é on péchè li-menm”. Yo kriyé zanfan a dyab, épi onpil dòt non ki malé nan Lékriti, pou sèvi témwen kont yo.

25:20 Yo té anvi Mwen mò, épi yo kyouyé Mwen anlè mòso pyébwa, magra lalwa ka di, “I modi, sila ki pannan adan on pyébwa”. Yo pran lanmò an-Mwen pou malédisyon, mé sé ta-yo Mwen pòté, pa tan-Mwen.

25:21 Sèlman nan dènyé batay-la, sé Mwen ki gannyé ; davwa, nenpòt sa moun di asi’w, tout pawòl yo di sé ayen, si jou-la ou ka mò ou pa sa di pou ou-menm, “Travay-la fini.”

25:22 Anvré, lanmò mové pou sila ki ka règrété i pa fè kèk biten nan lavi a-y, pannan i té sa fè’y.

25:23 Alòs, pannan ou ni tan toujou, fè sa kyè a-w ka di’w fè pou vwazen a-w. Konsa ou ké ni onpil lajwa, davwa pilo grenn-la ou simé la, yo ké dèyè’w nan lavi apré lanmò

25:24 Anvré, sa ou simé nan lavi a lézòt, i ké kontinyé pwofité, menm si ou té pou mò démen.