Témwen 27

27:1 Pawòl a Sényè-la vini jwenn mwen, é di, “Pèp an-Mwen anba konduit a lènmi, davwa moun Mwen té ba yo pèp an-Mwen, mi yo ka manjé pen é bwè diven toupannan pèp an-Mwen ka soufè.”

27:2 Mi, désanm 2008, zyé an-mwen ouvè ankò, é mwen trapé on vizyon. Adan vizyon-la, zyé an-mwen vwè on gran mistè.

27:3 Té ni kat nonm adan on gran lasal, adan kilès pa té bon limyè. Yo té nan nwèsè, sizé alantou on gran tab rèktang é an bwa.

27:4 Té ni on nonm nan bout a gran tab-la, é i lévé doubout la i té sizé, ka kyenbé on koup an lò nan men a-y.

27:5 I hosé’y anlè, fè on priyè, é pòté nan bouch a-y, é i bwè adan’y. Aprésa i pasé koup-la ba sé lézòt twa nonm-la ki sizé obò tab-la. 

27:6 Té ni dé nonm koté dwèt, épi dényè-la té asi koté gòch a tab-la.

27:7 Sé kat nonm-la té abiyé èvè wòb long é wouj, èvè chapon wouj-san ki té ka kaché figi a-yo. Mwen pa té sa byen vwè kimoun yo té yé, akòz sé chapon-la anlè tèt a-yo, é davwa té ka fè nwè.

27:8 Yo té ka bwè é anmizé kò a-yo adan lasal-lasa koté té nwèsè é frèt, mé pa té ni ayen dòt asi tab-la, pa on gray manjé. Tousa yo té ni sé té koup an lò lasa.

27:9 Pa té ni limyè asi tab-la, é pa té ni p’on dòt moun èvè yo. Yo té tousèl, akwèdi moun kaché é sanblé nan koté anbistan pou fè mové plan.

27:10 Épi sibitman, mwen vwè on gran men kon limyè blan ka kléré ; i parèt é i maké asi masonn-la ki té dèyè nonm-la ki té ba lézòt koup-la.

27:11 Lè men-lasa fini maké, mwen tanté li sé mo-la, mé mwen pa té ka konprann sa ki maké asi masonn-la, davwa mwen pa té kapab li sé mo-la té. Yo té ka sanm sa lézòm pa kapab li.

27:12 Mé mwen tann on vwa ki di, “Mwen konté zòt, é pézé zòt, épi Mwen touvé zòt léjè douvan Mwen. Zòt pa pran swen a pèp an-Mwen, alòs ki Mwen té konfyé zòt li.

27:13 Olyé pran swen a pèp an-Mwen, zòt fè yo mal. Mi, Mwen ka lévé kont figi a-zòt, é sa Mwen té konfyé zòt, Mwen ké pran’y nan men a-zòt, épi Mwen ké ba on dòt pèp li, ki ké pli jenn é pli savan ki zòt.”

27:14 Mwen, on tiboug ki pa ayen, mwen vwè tousa ki fèt, é mwen gadé alantou, épi mwen pa vwè ayen ankò. Tousa mwen té ka vwè aprézan, sé té nwèsè.

27:15 Sèlman mwen réyalizé, ki nonm-la ki té bay koup-la, ki lézòt twa ki té pran adan’y, p’on yonn pa té vwè men-la ki té maké sé prèmyé pawòl, ni tann vwa-la ki té palé sé dézyèm pawòl-la.

27:16 Yo kontinyé nan sa yo té ka fè, konsi zòrèy a-yo té bouché pou p’on mo pa antré adan yo é pòté fwi. Yo pa vwè sé mo-la, yo pa tann vwa-la.

27:17 Yo rété parèy, davwa pa té ni on zing chanjman adan yo. Épi yo té ka anmizé é ri, é nan pawòl a-yo, yo té ka malpalé pèp-la yo té konfyé yo la.

27:18 Épi, sòti adan nwèsè-la, vwa a Lèspri palé ban mwen ki té vwè tout biten.

27:19 Épi I di, “Lévé doubout, davwa Mwen pòkò fini montré é di’w sé biten-lasa, pou ou pòté konnésans ba lézòt, frè é sè a-w kilès non a-yo méprizé pa séla ki di yo-menm sé bèjé. Anvré, a pa sa yo yé.

27:20 Davwa sé yo té bèjé anvré, pèp an-Mwen ka pa té nan léta Mwen ka vwè yo. Davwa lézòm ka gadé lasanblan, mé Mwen YHWH, ka gadé kyè.

27:21 Épi alè, sa Mwen ka vwè ka trakasé Mwen nan fonkyè, davwa séla ki ka kouté sé fo bèjé-lasa, ka manké yo konnésans, épi men a-yo ka mannyé bayè a lanfè.

27:22 Palé ba pèp an-Mwen é di yo sa ou témwen, tout sé biten-la ou vwè é tann la.

27:23 Davwa yo ké ni pou rèkonnèt anmitan yo mwen lévé on pwofèt, pa dapré volonté a on nonm, ni volonté a on légliz, mé pa volonté a Sila ki sizé nan twòn a-Y, ba kilès tout moun ké rann kont pou travay yo fè, nan jou jijman.

27:24 Onpil fo pwofèt ja vini nan lèmonn, jis alèkilé, sèlman pèp-la pa sa séparé lou èvè mouton.   

27:25 Panga ou pè sa p’on yonn adan yo ké di’w, ka malpalé é méprizé’w. Davwa, Mwen YHWH, konnèt biten ki nan kyè a-yo, é lidé ki nan tèt a-yo.

27:26 Mi! Men an-Mwen ka travay. Kimoun ké doubout kont Mwen? Ni plis pou gannyé nan plézi obéyi Mwen, ki fè yo plézi. Davwa onpil moun rété san palé é pèp an-Mwen ka péri ; p’on moun pa okipé osi pou dénonsé sa, é doubout anmitan pou yo.

27:27 Ès sé pou ayen mwen kriyé’w sèvi gad-véyè? Ès a pa pou dénonsé sa, é priyé pou yo byen?

27:28 Épi, mi sa ki plézi pou Mwen : sé ajen nan lapriyè, davwa sé kalité démon-lasa ka pati lè ou ka priyé onpil é ajen. Alòs, santifyé kò a-zòt, é chèché fas an-Mwen, konsa zòt ké gannyé yo.

27:29 Mi, ou vini tris, jis mété kò a-w ajen, mé sé Mwen ki té mété sa asi kyè a-w. Épi onpil moun adan pèp ka priyé ajen pou yo, kifè ou pa tousèl ka fè sa.

27:30 Sèlman, Mwen ni pou palé ba sé fo pwofèt-lasa, pou yo konnèt sé ba yo Mwen ka palé. Épi Mwen ka palé asi yo, pou pèp-la konnèt mové biten yo fè kaché nan sigré, é bann sakrifis yo ka fè ba dòt dyé.

27:31 Épi anvré, é nan tout tan, Mwen ni konpasyon pou pèp an-Mwen, kifè Mwen ka vèti yo asi désèpsyon ki ka sòti koté sé fo pwofèt é sé fo bèjé-lasa.

27:32 Épi Mwen ka palé ba zòt, pèp an-Mwen, “Pran pokosyon nan sa ou ka fè, davwa tras ou ka maché la, i ka glisé. Ou ka drivé anlè on chimen izolé èvè pyébwa asi chak koté, é tousa sé akòz bonté Mwen ni pou ba’w sa ou bizwen.

27:33 Mé lajouné kon lannuit Mwen ka palé ba’w, é Mwen kriyé nan kyè a’w, mé ou pa ka tann Mwen, davwa ou ka pran plézi nan limyè a lènmi san menm ou sav.

27:34 Pran lafwa nan Sila ki té kriyé’w, épi réponn Li, pou ou gouté biten ou pòkò té konnèt, ni menm lé-zansyen ki té avan’w.

27:35 Davwa onpil moun ka mandé é anvi yo sé kon légliz a lé-zapòt, mé p’on yonn pa ka réyalizé, sa Mwen ka mandé é anvi yo yé, sa Mwen kriyé yo pou divini, sé légliz ki té pou pwofité dépi an tan lézòt jiska aprézan.

27:36 Zòt vlé yé sa zòt pa konnèt, mé Mwen vlé montré zòt sa Mwen anvi zòt yé; anvré, sé Mwen ki konnèt biten ki bon pou zòt.

27:37 Alòs, zòt ni pou chèché fas an-Mwen, é rèsouvwè vizyon an-Mwen, davwa sé pou tout moun ki ka kriyé non an-Mwen nan lèspri é lavérité, pa yenki nan lèspri mé nan lavérité osi.

27:38 Épi lavérité sé pou yo kwè é obéyi Pawòl an-Mwen, pou yo konnèt é suiv lòd an-Mwen, pou yo travay lajistis é maché kyè bésé pou fè vwazen a-yo byen, épi pou yo enmé chimen an-Mwen, chimen a lavi. Sa sé pawòl an-Mwen, é Mwen pé ké chanjé.

27:39 Épi lè nenpòt moun vini, kon onpil ja vini, pou préché on dòt biten ki Pawòl an-Mwen, kité moun-lasa kon étranjé pou zòt, jistan i déklaré sèl vérité : Pa ni dòt Bondyé ki YHWH, é sé nan Gason a-Y, Jézi-Kri, tout lavérité ka rété.

27:40 Épi si yo préché on dòt Lévanjil ba zòt, yo ni pou modi jistan jou jijman vini. Épi séla ki ka préché on dòt Krist ba zòt, yo ni pou kondanné jistan jou jijman rivé.

27:41 Davwa, ni onsèl Lévanjil èvè onsèl Krist, ni on sèl Pawòl èvè onsèl Bondyé, ni onsèl Lèspri èvè onsèl Papa.”

27:42 Épi Mwen ka di zòt, “Pa li antrè liny a Liv-la zòt rèsouvwè nan men a lé-zansyen avan zòt, davwa sila ki ka woté oben mété adan pawòl an-Mwen, i ké trapé jijman kon tilili. Mé sila ki ka témwanyé é siwoté pawòl an-Mwen, i ké trapé laglwa kon tititi.”

27:43 “Kanta pou ou-menm, ti sèvitè, ki ka di, ‘Kimoun mwen yé pou palé ba’W?’ Kouté sa Mwen ka déklaré : Asiré douvan Mwen ou sé yenki pousyè ki atè, mé Mwen chajé zépòl a-w èvè on mésaj ba pèp an-Mwen.

27:44 Épi si ou pa ka fè lézòt konnèt li, sé ou-menm Mwen ké mandé kont pou san a séla ki jwenn lanmò akòz sé fo pastè-lasa, davwa ou pa té fè sa Mwen té koumandé’w.

27:45 Fo ou sav, sé nonm-lasa ké doubout kont vou, mé si ou kyenbé drèt adan Mwen, é si ou priyé, Mwen ké délivré’w anba men a-yo, menm si ou pou soufè akòz pawòl yo palé. 

27:46 Davwa, anvré ou ké pléré onpil, mé sa ké sèvi témwen kont yo. Ou ké soufè, mé Mwen ké délivré’w lè ou kriyé Mwen dépi grangouf nwèsè la, é gwo-tou labou la koté ou ké yé.

27:47 Lènmi a-w ké méprizé’w, moké’w é malpalé’w, sé davwa i pa konnèt ladèstinité ki ka atann li. Épi si i té konnèt li, lasajès té ké maré an ren a-y, mé i pa konnèt lasajès, é sé pousa i chapé lwen di’y.