Jénèz 1

¹ Nan koumansman Bondyé kréyé sé syèl-la é latè.

² Latè té hak é brak ; épi nwèsè té anlè fas a granfon-la. Épi Lèspri a Bondyé té ka planné anlè fas a sé dlo-la.

³ Mi Bondyé di, “Limyè pou fèt” ; épi limyè fèt.

⁴ Épi Bondyé vwè limyè-la té bon, é Bondyé séparé limyè-la èvè nwèsè-la.

⁵ Épi Bondyé kriyé limyè-la Lajouné, é nwèsè-la, I kriyé’y Lannuit. On swè èvè on maten, sé té prèmyé jou.

⁶ Mi Bondyé di, “On lèspas ni pou fèt anmitan sé dlo-la, é i pou séparé dlo èvè dlo.”

⁷ Mi Bondyé fè lèspas-la, é séparé sé dlo-la ki té anlè èvè sé dlo-la ki té anba ; épi sa fèt.

⁸ Épi Bondyé kriyé lèspas-la Syèl. On swè é on maten, sé té dézyèm jou.

⁹ Mi Bondyé di, “Sé dlo-la anba syèl ni pou sanblé onsèl koté, é koté sèk ni pou parèt” ; épi sa fèt.

¹⁰ Épi Bondyé kriyé koté sèk la Latè, é tout sanblé dlo, I kriyé yo Lanmè. Épi Bondyé vwè sa té bon.

¹¹ Mi Bondyé di, “Latè ni pou pwodui zèb, pyé-zèb ki ka bay grenn, é pyé-fwi ki ka bay fwi dapré kalité a-y, èvè grenn adan’y, anlè latè” ; épi sa fèt.

¹² Épi tè-la pwodui zèb, pyé-zèb ki ka bay grenn dapré kalité a-y, é pyébwa ki ka bay fwi, èvè grenn a-y adan’y dapré kalité a-y. Épi Bondyé vwè sa té bon.

¹³ On swè èvè on maten, sé té twazyèm jou.

¹⁴ Mi Bondyé di, “Limyè nan lèspas a bann syèl ni pou parèt pou yo séparé lajouné èvè lannuit ; é yo ni pou sèvi siny é sézon, épi jou é lanné ;

¹⁵ épi yo ni pou sèvi limyè nan lèspas a syèl pou bay limyè asi latè” ; épi sa fèt.

¹⁶ Mi Bondyé fè dé gran limyè : pli gran limyè-la pou dominé lajouné, é pli piti limyè-la pou dominé lannuit. I fè zétwa osi.

¹⁷ Bondyé plasé yo nan lèspas a syèl pou bay limyè asi latè,

¹⁸ é pou dominé lajouné é lannuit, pou séparé limyè èvè nwèsè. Épi Bondyé vwè sa té bon.

¹⁹ On swè èvè on maten, sé te katriyèm jou.

²⁰ Mi Bondyé di, “Sé dlo-la ni pou ranpli èvè onpil kréyati vivan, é zozyo ni pou volé anlè latè koté lèspas a syèl.”

²¹ Konsa, Bondyé kréyé gran bèt lanmè, é chak biten vivan ki ka déplasé, ki ranpli sé dlo-la, dapré kalié a-yo, épi chak zozyo a zèl dapré kalité a-y. Épi Bondyé vwè sa té bon.

²² Épi Bondyé béni, lè I di, “Pòté fwi é pwofité, é ranpli dlo ki nan lanmè, épi zozyo ni pou miltipliyé anlè latè.”

²³ On swè é on maten, sé té senkyèm jou.

²⁴ Mi Bondyé di, “Latè ni pou pwodui kréyati vivan dapré kalité a-y : zannimo, tibiten ka trenné, épi gwo bèt anlè latè, yo chak dapré kalité a-y” ; épi sa fèt.

²⁵ Épi Bondyé fè chak gwo bèt anlè latè dapré kalité a-y, zannimo dapré kalité a-y, épi chak tibiten ka trenné atè dapré kalité a-y. Épi Bondyé vwè sa té bon.

²⁶ Mi Bondyé di, “Annou fè lézòm nan sa Nou yé, dapré sa Nou ka sanm ; yo ni pou dominé asi pwason nan lanmè, asi zozyo ki anlè, é asi zannimo, asi tout latè é asi chak tibiten ka trenné atè.”

²⁷ Konsa, Bondyé kréyé lézòm nan sa I yé ; nan sa Bondyé yé I kréyé yo ; nonm é fanm I kréyé yo.

²⁸ Mi Bondyé béni yo, é Bondyé di yo, “Pòté é pwofité ; ranpli latè é sèvi’y ; dominé asi pwason nan lanmè, asi zozyo ki anlè, é asi chak biten vivan ki ka déplasé asi latè.”

²⁹ Épi Bondyé di, “Mi, Mwen ka ba zòt chak pyé-zèb ki ka bay grenn anlè fas a tout latè, épi chak pyébwa ki ka bay fwi ; sa ké manjé a-zòt.

³⁰ Parèy, pou chak gwo bèt asi latè, pou chak zozyo ki anlè, é pou tout biten ki ka trenné atè, adan kilès tini lavi, Mwen bay chak pyé-zèb vèt pou manjé” ; épi sa fèt.

³¹ Mi Bondyé vwè tout biten I té fè, é anvré sa té bon toubònman. On swè èvè on maten, sé té sizyèm jou.