Lanmou Ki Pli Gran

¹ Si mwen sa palé langaj a lézòm oben ta zanj, mé mwen pa ni lanmou, mwen divini kon klòch mal sonné, oben kon tanbou bakannal.

² Si mwen ni don pwofési, é mwen kapab konprann tout mistè é tout konnésans, é si mwen ni lafwa pou déplasé mòn, mé mwen pa ni lanmou, mwen pa ayen.

³ Si mwen bay tousa mwen ni pou nouri moun maléré, é livré kò an-mwen nan difé, mé mwen pa ni lanmou, sa pa ka sèvi mwen ayen.

⁴ Lanmou ni pasyans é i ni bonté ; lamou pa ni jalouzi ; 

⁵ lanmou pa ka fè awogan, i pa ka bat lèstonmak ; i pa ka fè malonnèté, pa ka sonjé yenki li, pa ka fè kòlè, pa ka sonjé fè mal.

⁶ I pa kontan pou lenjistis, mé i kontan pou lavérité ; 

⁷ i ka asèpté tout biten, ka kwè tout, ka èspéré tout, ka sipòté tout.

⁸ Lanmou toujou ké rété. ki tini pwofési, yo ké sispann ; ki tini langaj, yo ké arété ; ki tini konnésans, yo ké disparèt.

⁹ Davwa nou konnèt pa mòso é nou ka pwofétizé pa mòso, 

¹⁰ mé lè tout biten antyè ké rivé, tousa ki pa mòso ké disparèt.

¹¹ Lè mwen té timoun, mwen palé kon timoun, mwen konprann kon timoun, mwen kalkilé kon timoun. Lè mwen divini a nonm, mwen mété akoté biten a timoun.

¹² Davwa alè nou ka vwè adan on miwa, on mannyè pa klè, mé apré nou ké vwè fas-a-fas. Alè mwen konnèt pa mòso, mé apré mwen ké konnèt mannyè I konnèt mwen.

¹³ Aprézan sé twa biten ki ké rété : lafwa, lèspwa é lanmou ; mé pli gran adan yo sé lanmou.