Sòm 10

1  Pouki Ou doubout lwen konsa, YHWH? Pouki Ou kaché nan moman détrès?

2  Sila ki méchan ka blagé é i ka  pèsékité moun maléré ; yo ka pri nan mové plan i té paré.

3  Sila ki méchan ka vanté asi lanvi i ni an fonkyè ; i ka béni sila ki ava é i ka méprizé YHWH.

4  Sila ki méchan plen lògèy é i pa ka chèché YHWH ; tout lidé an tèt a-y sé : “Pa ni Bondyé”.

5  Tousa i fè toujou ka pwofité ; jijman a-W ka pasé pa-anlè tèt a-y, i ka méprizé tout lènmi a-y.

6  I ka di nan fonkyè : “Ayen pé ké branné mwen ; malè pé ké janmé rivé mwen.”

7  Bouch a-y plen malédisyon, manti é bétiz ; anba lang a-y sé méchansté é malè.

8  I anbistan toupré sé vilaj-la, i ka asasiné moun inosan ankachèt ; zyé a-y ka souskandé moun san défans.

9  I alanbiské kon liyon kaché nan tou a-y, i alanbiské pou ponnyé moun pòv ; i ka trapé moun pòv apré i fini gidé yo nan zatrap a-y.

10  I akoupyon, i ka bésé ba ; moun maléré ka tonbé anba fòs a-y.

11  I di nan fonkyè a-y : “Bondyé ja obliyé ; I kouvè zyé a-Y, I pa ka janmé vwè.”

12  Lévé, YHWH! Bondyé, ba yo fòs la! Pa obliyé moun maléré. Pouki sila ki méchan ka méprizé Bondyé konsa?

13  Pouki i ka di nan fonkyè : “I pé ké fè mwen rann kont”?

14  Sèlman, Ou ja vwè soufrans é mizè yo ni ; Ou gadé lapenn a-yo é Ou ka ba yo on pal. Sila ki maléré, i  gajé kò a-y èvè’W ; Ou ka édé timoun san fanmi.

15  Krazé gwo bra a sila ki méchan é mové ; fè’y rann kont tousa i fè jistan ayen pa rété.

16  YHWH sé Wa dépi toujou é pou toujou ; bann nasyon ké disparèt nan péyi a-Y.

17  YHWH, Ou ka tann dézi a moun nan soufrans, Ou ké ba yo kouraj, Ou ké ouvè zòrèy,

18  Pou fè jistis ba timoun san fanmi é moun maléré, pou lézòm ki sòti adan tè pa fè moun pè ankò.