Sòm 12

1  Pou chèf-mizisyen. Anlè harp a uit kòd. On sòm a David.

Anmwé, YHWH, davwa pa ni moun ki drèt ankò! Moun ki fidèl ja disparèt anmitan lézòm.

2  Yonn ka manti ba lòt ; yo ka flaté lòt nan bò lèv, yo ka madragé lòt nan fon kè.

3  YHWH ni pou koupé tout lèv ka flaté, é tout lang ki awogan;

4  Séla ki di: “Lang an-nou ké ban nou viktwa, lèv an-nou ké sèvi nou ; kimoun ké komandé nou?”

5  “Davwa yo ka pilé moun maléré épi moun pòv ka plenn, aprézan Mwen ka lévé”, YHWH di. “Mwen ké ba yo délivrans-la yo ka atann la.”

6  Pawòl a YHWH sé pawòl ki pwòp, kon métal-lajan pasé nan fouyé-difé é ki pirifyé sèt fwa.

7  YHWH, Ou ké gadé yo nan sékirité, Ou ké toujou pwotéjé yo anba sé moun-lasa.

8  Moun méchan ka fè dyèz toupatou, lè sé mové mès tout moun ka soutiré.