Sòm 28

Ta David.

1  Sé Ou mwen kriyé, YHWH ; Ou ki Woché an-mwen, pa bouché zòrèy a-W ban mwen, davwa, si Ou nan silans pou mwen, mwen ké sanm séla ki ka désann nan grangouf-la.

2  Kouté vwa an-mwen ka mandé gras lè mwen ka kriyé’W, lè mwen ka lévé dé men pa-koté plas a-W ki sen.

3  Pa halé mwen èvè moun méchan, èvè séla ki adan biten mal, ki ka palé lapé èvè vwazen, mé ki ni malis nan fonkyè.

4  Rann yo sa yo fè, é dapré méchansté yo woulé ; rann yo dapré sa men a-yo travay ; ba yo viré sa yo mérité.

5  Davwa yo pa ka lévé di gad travay a YHWH, ni sa dé men a-Y fè, Li-menm ké détri yo é pa janmé woubati yo.

6  YHWH béni, davwa I tann vwa an-mwen mandé gras.

7  YHWH sé fòs é boukliyé an-mwen ; kyè an-mwen fè fon asi’Y, épi I édé mwen ; sé pou sa kyè an-mwen ka réjwi toubònman, é èvè onpil chanté mwen ké louwé’Y.

8  YHWH sé fòs a pèp a-Y, é I sé défans ka sové nonm-la i chwazi.

9  Sové pèp a-W, é béni éritaj a-W! Sèvi yo béjé, é pòté anlè yo pou toujou!