Sòm 31

Pou chèf-mizisyen. On sòm a David.

1  Koté’W, YHWH, mwen alabri ; pa kité mwen trapé hont ; délivré mwen nan jistis a-W.

2  Panché zòrèy a-W asi mwen, vini sové mwen vitman ; sèvi gwo wòch pou mwen abréjé, on chato-fò pou mwen sové.

3  Davwa Ou sé on gwo wòch é on chato-fò pou mwen, davwa non a-W méné mwen é gidé mwen.

4  Woté mwen adan zatrap moun kaché pou mwen, davwa Ou ka pwotéjé mwen.

5  Nan dé men a-W mwen pozé lèspri an-mwen ; Ou délivré mwen, YHWH, Bondyé ki lavérité.

6  Mwen hay moun ki antiché nan idòl initil ; mwen-menm ka fè fon asi YHWH.

7  Mwen ké kontan é réjwi nan gras a-W, davwa Ou vwè mwen nan ladévenn ; Ou té sav jan nanm an-mwen té nan lanmizè.

8  Ou pa kité mwen tonbé anba men a lènmi-la ; Ou mété pyé an-mwen alèz.

9  Fè mwen gras, YHHW, davwa mwen mélé ; zyé an-mwen fatigé èvè chagren, ki nanm ki kò osi.

10  Vi an-mwen ka konsomé nan lapenn, é lanné an-mwen ka pasé nan soupir ; fòs an-mwen ka bésé akòz péché mwen fè, é zo an-mwen ka fonn.

11  Mwen sé lahont anmitan lènmi an-mwen, mé sitou anmitan vwazen an-mwen, é lafous pou zanmi an-mwen ; moun vwè mwen dèyò é yo kouri douvan mwen.

12  Yo obliyé mwen nan fonkyè kon moun mò ; mwen kon vaz kasé.

13  Davwa mwen ka tann onpil ka malpalé ; moun pè toupatou mwen yé ; yo ka sanblé pou pran pawòl kont mwen, yo ka konploté pou pran vi an-mwen.

14  Mwen-menm ka fè fon asi’W, YHWH ; mwen ka di: “Ou sé Bondyé an-mwen.”

15  Tout tan an-mwen nan dé men a-W ; délivré mwen anba men a lènmi an-mwen, èvè moun ki ka pèsékité mwen.

16  Fè figi a-W kléré asi sèvitè a-W, sové mwen nan gras a-W.

17  Pa kité mwen trapé hont, YHWH, davwa sé Ou mwen kriyé ; plito kité moun méchan trapé hont, é kité yo fè silans nan bitasyon lanmò.

18  Kité lèv ka manti fè silans, yo ki ka palé san hont, ka méprizé, é fè awogan kont moun ki jis.

19  Gadé jan bonté a-W gran, kilès Ou mété apa pou moun ki ni lakrent pou’W, kilès Ou paré avan lè, pou moun ki ka fè fon asi’W, pou tout moun vwè.

20  Ou ka séré yo nan kachèt a prézans a-W kont tousa moun konploté ; Ou ka kyenbé yo nan sékirité anba kaz a-W kont lang ki ka varé yo.

21  YHWH béni, davwa I montré mwen grandè a gras a-Y, adan on vil chato-fò.

22  Pa lanprèsman, mwen di : “Mwen déyò douvan zyé a-Y” ; mé Ou tann vwa an-mwen ka mandé gras, lè mwen kriyé’W anmwé.

23  Enmé YHWH, zòt tout ki sen! YHWH ka véyé vi a moun fidèl, é I ka péyé moun awogan tousa yo douwé.