Sòm 33

1  Réjwi nan YHWH, zòt ki jis! Mi, louwanj bon pou moun ki drèt.

2  Louwé YHWH èvè harp ; jouwé mizik ba’Y èvè enstriman a dis kòd.

3  Chanté ba’Y on chanson nèf ; jouwé bèl mizik, é kriyé nan lajwa.

4  Davwa pawòl a YHWH drèt, é I fidèl nan tout travay I ka fè.

5  I enmé ladréti é lajistis, latè ranpli èvè gras a YHWH.

6  Sé èvè pawòl a YHWH, sé syèl-la té fèt, é tout bann zétwal, sé èvè souf a bouch a-Y.

7  I ka sanblé dlo lanmè kon adan bari, I ka mété granfon-dlo adan galta.

8  Tout latè ni pou krenn YHWH ; tout zabitan lèmonn ni pou bébétoum douvan’Y.     

9  Davwa I palé, é sé sa ki fèt ; I komandé, é sé sa ki rété.

10  YHWH ka fè konsèy a sé nasyon-la sèvi ayen ; I ka fè plan a sé pèp-la pran plon.

11  Konsèy a YHWH ka rété pou toujou, plan a kyè a-Y sé pou tout jénérasyon.

12  I béni, nasyon-la ki ni YHWH pou Bondyé a-y, pèp-la I chwazi la pou vini éritaj a-Y.

13  YHWH ka gadé dépi syèl ; I ka vwè tout zanfan a lézòm.

14  Dépi bitasyon a-Y I ka véyé asi tout zabitan latè;

15  Li ki ka kréyé kyè a tout moun, é ki véyatif anlè tousa yo ka fè.

16  On wa pa ka sové dapré gran larmé i ni ; on gran nonm pa ka chapé dapré plen fòs i ni.

17  Chouval sé lèspwa mal-papay pou jwenn délivrans ; magré plen fòs i ni, i pa kapab sové.

18  Mé dé zyé a YHWH asi moun ki ni lakrent pou’Y, asi séla ki ni lèspwa nan gras a-Y,

19  Pou délivré nanm a-yo anba lanmò, é pou kyenbé yo vivan nan lafamin.

20  Nanm an-nou ka èspéré YHWH ; I sé sèkou é boukliyé pou nou.

21  Kyè an-nou ka réjwi adan’Y, davwa nou ka fè fon asi non a-Y.

22  Kité gras a-W rété anlè nou, YHWH, menm jan nou ka èspéré adan’W.