Témwen 10

10:1 Mi, lanmou sé on plant pou on sézon, ki ka fléri é ka fanné dapré mové lidé zòt ni. Davwa Mwen vwè I pa ni bitasyon adan zòt.

10:2 Si zòt té konnèt Li, zòt pa té ké janmé di’Y : nou hay Vou.

10:3 Gason a lézòm, gadé zòt ka malpalé Lanmou ! Zòt ka di asi’y : moun ki enmé, sé  moun ki ba, paskè mwen pé ké janmé kanté jou an-mwen pou sila ki ka ban mwen kalòt, ni bay manjé pou sila ki ka varé mwen.

10:4 Mwen, YHWH, pa ka soutyenn zòt nan sa zòt ka di, davwa zòt pa rivé konnèt fondè a Bondyé Pli-Ho, magré I ka palé ankò é  ankò.

10:5 Lanmou sé lajistis, kon solèy ka bay rèl pou tout moun san séparé. Lanmou sé pasyon ki ka bay lanvi kyenbé men a Sila ki ka bay lavi.

10:6 Lanmou sé fòs, davwa I ka déplasé onpil mòn. Lanmou sé sajès, davwa I konnèt vérité anmitan manti.

10:7 I sé puisans pou moun ki mérité’Y, pou moun ki ka di’Y konsa : Antouré nou èvè dé bra a-W é annou viv nan pasyon. Ou sé kon lannèj anlè figi an-nou, kon limyè-solèy nan zyé an-nou. Si a pa té pou’W, ayen pa té ké kréyé.

10:8 Adan’W pataj é kominyon ka rété, kilès ayen pé pa kasé. Nenpòt moun ki di’W, Ou sé kyè an-mwen, ében i ja touvé’W.

10:9 Lanmou sé kon lapli apré sézon-karèm ki ka méné viré fréché anlè mòn, é adan chan i ka rann vèt tousa ki té sèk, é ka fè pousé tousa ki té fanné.

10:10 Kité Lanmou vini édé’w toulé jou ou ka viv, davwa I maché èvè sè a-Y, Lasajès. Yo pilé latè yo ba lézòm, mé p’on moun pa tann mésaj a-yo.

10:11 Yenki plant adan chan ki rèkonnèt, ki toulé dé, Lanmou é Lasajès, té sòti lwen pou ba zòt lavi. Épi apré yo, Lapé ké vini.

10:12 Kriyé Sényè, davwa I té enmé zòt. Di Lanmou é Lasajès : An non a Bondyé, nou ka béni zòt. Lapé pou vini asi sila ki ka pòté Zòt kon wòb pwòp é ki pa ka maché nan konsèy a moun mové.

10:13 Kouté mésaj Sényè-la bay, zòt tout ki anlè fas a latè, épi ouvè lapòt ba pawòl a Sila ki Sen.

10:14 Yo sé lajwa, lapé, lonè, rèspé, libèté, lanmou, lasajès, rèpo é gérizon. Tousa MWEN YÉ, é pa ni ayen dòt ki yo.

10:15 Sèlman, Lasajès ka hélé dépi anlè fétay-kaz : Yo chayé zanfan an-mwen. Malè pou mwen! Kimoun ké alé é méné yo viré jwenn mwen?

10:16 Mi mwen, Lanmou di. Mwen tann Vou kriyé, Manzèl Lasajès. Épi mwen vini vitman présé pou èdè’w.

10:17 Pran gran zam a-w, Lasajès di, épi alé anlè chan-batay la, Sòlda hadi. Alé kont tout enjistis é manti.

10:18 Mi èvè sé pawòl-lasa, Manzèl Lasajès chabonné sila ki kanmarad é frè a-y, Sòlda Lanmou.

10:19 Konsa, sòlda-la lévé, épi i di Manzèl Sajès : Kijan mwen ké alé épi jwenn zanfan a-w?

10:20 Mi Lasajès réponn : Chèché konsèy a Sila ki Toupuisan, é I ké gidé’w. I ké limyè pou’w nan dézè-la, é I ké méné’w koté dlo vivan, asèlfen ou déswèfé gòj a-w.

10:21 Konsa Lanmou di : Mwen ké kouri. Yenki di mwen pa kikoté yo alé. Épi jennfi-la réponn : Gadé pa-koté alwès, la solèy ka kouché ; mi sé la yo chayé ki gason ki fi an-mwen, séla mwen té akouché.

10:22 Sòlda-la di’y konsa : Mwen ka fè’w sèman, Manzèl Lasajès, èvè gras a Bondyé Toupuisan, mwen ké méné zanfan a-w viré senn-é-sòf.

10:23 Lapé ké vini kontré’w, davwa mwen ka fè sèman asi Non-la ki Puisan, sé mové bandi-la ké pini pou mové yo fè, lè Jij-la ké désann é sanblé kat kwen a latè.

10:24 Konsa I ké sizé é délivré jijman a-Y, épi on moun ké brilé adan difé-la toupannan lòt moun-la ké bennyé adan dlo-la.

10:25 Di Jérizalèm sa : Bondyé a-w enmé’w èvè on lanmou enfini. Anlè masonn a-w, Mwen ka vwè pyé-sipré é pyé-zoliv pousé. Nan lari a-w, mwen ka vwè lannuit fè plas pou lajouné, é nwèsè pou limyè.

10:26 Dépi Siyon ka monté onpil chanson lajwa é lakontantman, davwa Sényè-la ka pòté jijman té té pwoklamé dépi lé pwofèt an tan lontan.

10:27 Davwa, ja ni asé, YHWH di. Pé ké ni pléré ankò lè bonm ka pété, pé ké ni kriyé ankò lè zam ka palé. 

10:28 Jérizalèm ké onoré non a-y, Vil-Lapé. Bondyé fè sèman asi Li-menm, I ké pozé twòn a-Y nan mitan a-y.

10:29 Épi séla ki ka méprizé lavérité, yo ké èstébékwé lè Sényè-la ké désann dépi sé syèl-la èvè kantité zanj a-Y, lè I ké pòté tout jijman a-Y, é lè I ké vidé tout koup ranpli èvè kòlè é vanjans I té sanblé.

10:30 Dézòd, pléré é kriyé, ké monté dépi latè jisk an syèl, mé p’on moun pé ké jwenn rèpo, annisòf séla ki té fè fon asi’Y.

10:31 Davwa jou-la yo té désidé ja rivé, yo té prédi’y, épi moun ki ké chapé, sé yenki séla ki ka kouté avètisman-la.

10:32 Lapé sé non an-Mwen ; frè an-Mwen, Lanmou, sè an-Mwen Lasajès, épi Mwen-menm, Nou sé Zanfan a Sila ki Pli-Ho.

10:33 Planni tout chimen, épi kité tout mòn ouvè lavwa ba Sila ki ka vini adan non a Sènyè-la, Sila ki la jòdi-jou, ki té la avan-jou, é ki ké la pou toujou.