Témwen 11

11:1 Pawòl a Sényè YHWH vini koté mwen, pou di : Kouté pawòl an-mwen, zòt tout ki ka manjé richès a péyi-la, é abondans a wayòm an-Mwen.  

11:2 Zòt ka vòlé manjé a pèp an-Mwen, é pi zòt k’alé ranpli fal a-zòt anlè tèt a mòn. Zòt ka di fi an-Mwen : Ban nou’y! Épi lè i pa vlé, zòt ka raché’y nan men a-y.

11:3 Ès Sényè Bondyé avèg? Asiré non! Mi, tan a-zòt ja konté, davwa anvré Mwen té èspéré zòt di : Sa nou ka fè la pa byen. Kisa nou fè menm? Sèlman zòt pa ka rèpanti.

11:4 Olyé sa, zòt k’alé pli lwen nan péché kont zanfan an-Mwen. Kifè, Mwen ka vini é Mwen k’ay réglé kont a-zòt.

11:5 Kon sé mové zèb la ka toufé sé pyé-blé la, an répons Mwen ka ba blé-la dlo é Mwen ka ba zèb-la pousyè. Mwen ka bouré tè-la, é Mwen ka pran swen a grenn Mwen planté ; épi lè i ké pòté fwi, Mwen ké vini raché sé zèb-la ki nan tè-la.

11:6 Davwa blé an-Mwen ké matrité, é i ké kontanté Plantè-la é séla ki ka rékòlté.

11:7 Yo ké manjé pen, kilès yo fè èvè sé grenn-la, épi diven a chan-rézen la ké fè kyè a-yo kontan.

11:8 A ki yo pou yo fè pèp an-Mwen otan movèzté? Épi dapré yo, yo ké chapé malè ki ka vini. Si zòt ka fè méchansté, zòt ké évité jijman? Awa, Sényè-la di.

11:9 Davwa onlo timouton an-Mwen ka hélé anmwé, épi Mwen ki Bèjé, Mwen ka kouri vini èvè baton an-Mwen pou bat é chasé on liyon anrajé.

11:10 Pa pléré, zanfan an-Mwen, davwa zyé an-Mwen asi zòt, é Mwen ka vini pou géri bobo a-zòt. Tini lapé pou zòt, davwa Mwen ni tousa ki fo pou zòt géri.

11:11 Di séla ki ka maltrété zòt la : Bondyé sé on Géryé pou lajistis, é lépé a-Y ja paré pou frapé ; hach a-Y ja paré pou haché tout mové pyébwa, kon koupè-d’bwa.

11:12 I ka vini koté zòt, bandi ; sé pou sové nou anba mové rasin a-zòt, é anba men a-zòt ki ka débòdé èvè malédisyon.

11:13 Nou-menm pa fè ayen ki mal, davwa Bondyé an-nou vèv nou, é laviktwa sé ta-Y tousèl.

11:14 Aprann sa : Mwen YHWH, Mwen la, é Mwen ké parèy jistan lèmonn pasé, é apré sa osi, davwa jou an-Mwen pa ka konté, Mwen ka rété étènèl.

11:15 Fè chimen ba bénédisyon an-Mwen, pou i tonbé anlè zòt akwèdi on kado nan gran jou sélébrasyon. Sé on kado ki pa ka mandé ayen annisòf rèsouvwè’y.

11:16 Mé, kimoun ké sa rèsouvwè kado an-Mwen? Sé sila tousèl ki ni on kyè ouvè, é ki paré ouvè lapòt ba’y.

11:17 Anvré, zòt ka fè zòt mal lè zòt ka kwè bénédisyon an-Mwen lwen lanmen. Sèlman sa pa vré.

11:18 Kifè, vini pli pré Mwen, é ouvè lapòt ba bénédisyon an-Mwen. Ouvè men a-zòt, davwa I bon pou nanm a-zòt.

11:19 Konsa, mwen ki disip, mwen té pè sé pawòl-la ki té vini jwenn mwen, kifè mwen touné pa-koté Sényè YHWH nan lapriyè.

11:20 Épi mwen di’Y : Sényè, tout sé pawòl-la mwen maké la, sa Ou té mandé mwen fè, jisk alè yo ka sanm dwol é rèd pou mwen. Mwen sé yenki on jennboug é mwen ka mandé’w on siny ki sòti koté’W. Montré sé pawòl a-W é volonté a-W anvré.

11:21 Davwa onpil moun ka maké é palé pawòl, mé jisk alè séla ki gran é ka déklaré yo ni pawòl ki sòti koté’W, mi Ou montré mwen yo sé bann fo pwofèt.

11:22 Konsa Lèspri a Bondyé désann anlè mwen é pòté lapé nan kyè an-mwen, épi I di mwen, sé pawòl-la sé koté Sila ki Pli-Ho yo sòti, é mwen pa ni pou pè sé moun-lasa. Sèlman mwen pa té asiré toujou, mwen douté, épi mwen té pè rann yo piblik.

11:23 Mwen di Sényè-la sa : Pa ban mwen pyès siny adan kyè, ni adan lidé, davwa mwen pè sèvi pwòp lidé é imajinasyon an-mwen pou pwodui tousa mwen ka maké.

11:24 Anplis-di-sa, sa rèd pou mwen, maké sé lokans-lasa adan on liv, anplis on mésaj ki sòti koté’W, davwa sa vlé di mwen sé on pwofèt. P’on moun pé ké kwè mwen, épi mwen ja vwè liv-lasa sé pou traka é lapenn.

11:25 Épi lè mwen té fini priyé, mwen tann Vwa a Sényè-la ki réponn mwen : liv-lasa, a pa on liv kon Liv-Sen a Pawòl an-Mwen.

11:26 Liv-la Mwen mandé’w maké la, i ni pou pasé nan men a dòt moun pou yo tout li’y. I pa pou vann, pou p’on moun pa fè pwofi èvè’y, davwa pawòl a Sényè-la pa ka pézé pou moun achté. Ou ké ba yo li, pou i alé vitman san arété.

11:27 Anplis-di-sa, a pa on révélasyon nèf, mé i ké anni fè yo sonjé Pawòl an-mwen, é i ké on témwen pou Limyè-la. I ké fè moun ki ka li’y sonjé, yo pou jwenn lavi nan Liv-Sen la lé-zansyen avan zòt té maké, sila ki jwenn zòt jis jòdi-jou.

11:28 Davwa Mwen pé ké chanjé ayen nan Pawòl an-Mwen ; sèlman Mwen toujou kriyé pwofèt an-Mwen nan senté pou fè moun sonjé’y. Davwa kon i kité twòn an-Mwen, bandi ja ka varé’y, kifè moun kapab obliyé’y lamenm, adan on bat-zyé.  

11:29 Alòs, di konfrè é konsè a-w : Mi, sa Sényè YHWH ka di, Sila ki kréyé tout syèl é latè, épi tousa ki adan yo.

11:30 Mwen ka voyé pawòl an-Mwen koté zòt onfwa ankò. Las fè mal, épi fè byen, pou zèot trapé on gran rékonpans.

11:31 Zòt ka ba Pawòl an-Mwen do, é zòt kwè zòt ké évité mové kòlè an-Mwen, kon zòt ka di : Padon, Sényè! Mé si zòt té ka mandé sa èvè on kyè sensè, ès Mwen té ké blanmé zòt?

11:32 Sèlman, pawòl a-zòt mové nan zyé an-Mwen, épi priyè a-zòt ranpli èvè salté é trayizon.

11:33 Malè pou zòt, mové nonm, davwa zòt ka kyenbé lajòl lagras a moun maléré, épi zòt ka bat lanmen. Zòt pou trapé hont èvè gason a-zòt, séla zòt mété asi latè ; yo pé ké chapé kondannasyon.

11:34 Davwa Mwen ké doubout pou sèvi Jij é pou mandé vi a-zòt pou rann kont asi vi a moun zòt té maltrété.

11:35 Kriyé Mwen é mandé pason, pannan zòt ni tan toujou ; kriyé Mwen èvè on kyè ki sensè, pwòp é pirifyé adan on san ki inosan.