Témwen 19

19:1 Apré tousa biten, mwen fè on kalité rèv dwòl, an novanm 2008, é mwen té bazoudi toubònman.

19:2 Nan rèv an-mwen, mwen té èvè plizyè moun a fanmi an-mwen, épi nou té opipré douz moun nan kaz-la. 

19:3 Nou té ka paré on gran fèsten, tout moun té okipé ka fè plizyè biten toupatou an kaz-la.

19:4 An tan-lasa, té on radyo ka jouwé mizik ajékontinyé, épi sibitman on animatè kouté mizik-la, é i di konsa :

19:5 Aprézan nou k’ay pran tan pou minit silans la, é sonjé séla ki mò, èspésyalman sé timoun-la ki mò nan mové tranblèman-d’tè lasa.

19:6 Épi mwen vwè tout moun arété sa yo té ka fè, ki mwen ki yo. Sèlman mwen pa té konprann sa ki té pasé anvré, épi mwen rété kalkilé sa. Té ni on gran silans, é tout biten té ka sanm sa ki mò.

19:7 Lè minit silans la té fini, mwen touné koté on kouzen an-mwen, é mwen mandé : Ki tranblèman-d’tè i té ka palé? Ola sa fèt?

19:8 Épi kouzin an-mwen réponn : Ou vlé di ou pa sav? Mwen réponn : Non, mwen pa sav. Di mwen sé té kèk koté nan Lend? Épi i réponn : Mé wi, sé sa!

19:9 La mwen pléré gwo dlo, davwa mwen té sav dépi yonndé mwa onpil krétyen té maltrété nan Lend é bann nasyon alantou.

19:10 Épi mwen té kwè Bondyé té pini yo apré yo fè sa. Sèlman mwen pa té konprann poukisa sé timoun ki té ni pou péyé pou sé krim-lasa.

19:11 Konsa lè mwen sòti nan rèv-la, mwen priyé Sényè-la. Mwen té toudi é bazoudi, é mwen pa rivé jwenn rèpo.

19:12 Épi I di mwen konsa : Sé sa ki pou fèt nan yonndé lanné ka vini nan péyi Lend é nan koté alantou.

19:13 Dépi pwovens Orisa latè ké monté nan jou gran tranblèman-d’tè la p’on mounn pa té vwè avansa.

19:14 Jou-lasa, pyé a mòn ki ho ké branné, bra a ravin ki fon ké séré, lè tè a latè ké boujé toubònman, épi moun, zannimo é bèt èvè tout bitasyon ki ta-yo, ké souklé kon boutèy dlo.

19:15 Sé kaz-la ké tonbé kon chato pay, épi dézolasyon é lapenn an zyé ké gran alantou sé péyi-la.

19:16 Mé a pa koté YHWH i sòti, trajédi-la ki pou tonbé anlè zòt. Sèlman davwa i pou pasé, zòt ni pou paré.

19:17 Davwa si Mwen ka vèti zòt, sé davwa kyè an-Mwen ké ranpli èvè doulè é lapenn, alavwéri sa ki pou rivé.

19:18 Zòt ni kaz kon sab, épi si tousa té pou rivé konyéla, pa té ké rété onsèl kaz si pyé, lè Mwen ka gadé sitiyasyon konyéla.

19:19 Zòt bati pou zòt-menm onpil joupa kon sann van ka souflé adan on bat-zyé.

19:20 Sèlman, sa ki fè Mwen pli mal, sé lè Mwen vwè tout sé timoun-la ki pou péri nan trajédi-lasa. Davwa, lékòl zòt bati, yo pa gyè solid, épi lè tranblèman-d’tè la ké fèt, zanfan a-zòt ké pri anba twa a sé lékòl-la ki ké tonbé asi yo.

19:21 Mwen, Sényè YHHW, Mwen pa anvi lanmò, davwa a pa Mwen ki pòté malè-lasa. Sèlman, zòt ni pou kouté é pran gad.

19:22 Ni on tan pou tout biten asi latè, pou lézòm gadé sitiyasyon a-yo ; kèlkanswa sa ki ka chapé lèspri a-y, sa ka méné’y viré nan bon rézon é lèspri drèt.

19:23 Maré ren a-zòt, épi ranfòsé tout kaz é lékòl a-zòt, davwa jou a gran tranblèman-d’tè la, moun ki ni twa é kaz kapab diré asé lontan pou yo chapé, sé yenki yo ki ké sové.

19:24 Épi tann pawòl-la : Sé on nivo nèf asi léchèl a tranblèman-d’tè ; Mwen YHWH, mi Mwen té vèti zòt, pou zòt paré pou sa lènmi-ka ké fè.

19:25 Davwa, koté jenn moun ké lévé èvè onpil ankò, koté onpil moun ké tan-Mwen, lènmi-la désidé pou varé yo avansa, pou yo détri travay yo pou fè.

19:26 Mé, p’on moun pa dépasé Sényè é Mèt a linivè. Mwen sé Gran Toupuisan, épi Mwen ka asiré pou pwotéjé zanfan an-Mwen.

19:27 Fè fon asi mwen, é pa fè fon asi lézòt, davwa yo pa kapab sové kò a-yo. Zòt pou sav, lè-la ka pwoché jou apré jou, épi sa ki pou fèt ké fèt.

19:28 Woté kouvèti-la asi zouvraj ki fèt nan nwèsè, épi priyé Bondyé a syèl é latè, pou kantité viktim pa otan.

19:29 Lévé lavwa, épi zanfan a-zòt ké jwenn pwotèksyon adan Mwen, YHWH. Sila ki jis, i ni pou fè fon asi Mwen, é Mwen ké tann li.  

19:30 Asiré péyi-la ké nan dézolasyon, mé sa ki pli enpòtan pou Mwen pasé tout latè, sé lézòm ki fèt nan imaj an-Mwen, davwa Mwen sa di onsèl mo, é i rétabli.

19:31 Mé kisa Mwen pé fè si on moun mò nan difé étènèl, lwen Mwen, paskè i té rèfizé konfyé adan Mwen?

19:32 Épi mi ankò, Mwen ka bay chaz moun on lokazyon pou rèpanti, pou yo kyenbé lavi davwa Mwen ni gran bonté é gras, sèlman Mwen ni jijman pli gran pasé yo.

19:33 Aprann asi lafen a tout biten ki pou disparèt on jou, davwa YHWH ka di : Mwen enmé lézòm ; épi anvré, mésajé an-Mwen ké lévé dépi sé péyi a-zòt la, é yo ké alé alwès pou méné sé prèmyé péyi-la viré jwenn Mwen.

19:34 Mwen sé Gadyen a pawòl an-Mwen, é Mèt a tout sitiyasyon ; Mwen ka rényé dépi tout létènité, épi p’on moun pa ka gannyé Mwen, davwa Mwen ja gannyé.

19:35 Gadé sa! Yo ké moké’w, é yo ké di pawòl a-w sé bétiz! Ès sé prèmyé fwa moun ka méprizé on pwofèt? Ès a pa labitid pou on nonm?

19:36 Sé menm moun-la ki ka paré plan pou ven lanné, yo ka ri lè Mwen ka déklaré sa ki pou rivé tanto.

19:37 Ében bon! Yo ka di. Ében, mi tousa ké rivé. Épi si zanfan an-Mwen priyé, akòz bon volonté Mwen ni, Mwen-menm ké aji pou trajédi-lasa pa otan mové.

19:38 Épi ou-menm ki zanfan an-Mwen, pa di, mwen vlé asiré pawòl-la vré. Davwa, yo ba’w pawòl-la, é i pou alé lwen. Pa chanjé ayen adan’y, davwa Mwen YHWH, Mwen ka travay pou tout moun konprann yo sé yenki pousyè.

19:39 Men an-Mwen ké asi yo, pou moun pa malpalé Non an-Mwen, é di sé Mwen ki pòté malè asi zòt.

19:40 Gadé épi kouté! Davwa dyab-la ka travay nan onpil mannyè, konsa Mwen ka travay nan tout mannyè, Bondyé YHWH ka di.