Témwen 21

21:1 Mi pawòl sajès é konpransyon pou on moun ki savan. Sila ki ka konprann fondè a konnésans sé on moun kilès zyé véyatif ka véyé pou wòch ki glisé.

21:2 Mi kyè an-mwen lou èvè doulè, davwa mwen pa rivé sézi Sila Ki Toupuisan nan tout grandè a-Y. Épi mwen pléré lè mwen réyalizé, lézòm san éntélijans menm lè yo ka ba yo li.

21:3 Lézòm ka kontinyé alé kont Sila ki sizé asi twòn-la, épi sé pou sa moun ka malpalé non a Sila ki Pli-Ho.

21:4 Épi Sényè-la palé mwen é di : Mwen pa on dyé moun sa konnèt nan rèlijyon ; mé Mwen sé Bondyé ki Yonn moun, moun sa konnèt nan rèlasyon.

21:5 Mwen anvi moun vini koté Mwen kon on zanfan ka vini jwenn papa-y. Mwen lonji men an-Mwen, é Mwen ka kité’y la ba zòt, pou zòt sa kyenbé’y. Konsa Mwen ké pran zòt la zòt yé, é Mwen ké lévé zòt anlè.

21:6 Pèp-lasa obliyé mésaj an-Mwen, é yo ka pann nan pawòl a moun. Mwen voyé Gason an-Mwen pou méné zòt koté Mwen. Travay a-y fini, mé zòt ka taté chimen a-zòt toujou.

21:7 Alòs, tann é aprann lèson-la : Mwen té èvè Bondyé, égal èvè sa I yé, épi Mwen té Bondyé.

21:8 Anmitan Konsèy a-Y, pa té ni ayen diféran ka séparé Nou, épi èvè Lèspri a-Y ki sé Lèspri an-Mwen, kilès sé Lèspri, Nou té yonn.

21:9 Mwen kréyé zòt épi lavi té alabondans pou zòt, jistan jou-la kwadjalo tonbé anlè zòt épi lanmò vini adan lèmonn.

21:10 Konsa Mwen fè lidé sové zòt, paskè p’on nonm pa té ké kapab fè’y. Mwen kité tout biten yenki pou zòt, épi Mwen dézabiyé laglwa asi Mwen pou divini kon zòt.

21:11 Kon Mwen fè travay an-Mwen, Mwen viré nan syèl. Pou zòt, Mwen kité on mòso adan Mwen ; wi, pou zòt Mwen té séparé èvè Papa-Mwen anlè kwa-la.

21:12 Mwen té égal èvè YHWH, épi alè, kon nonm, Mwen rèsouvwè tout biten a men a-Y, épi Mwen té toujou fidèl èvè’Y, davwa I sé Papa-Mwen é Bondyé an-Mwen osi. Pou zòt, Mwen divini on nonm nan chè, on sèvitè pou Li, Sila té enmé, é kilès Mwen ké toujou enmé.

21:13 Alòs, pèp-la andwa ni konpransyon, davwa Mwen sitèlman hont pou zòt é sajès a-zòt ki pa ayen.

21:14 Mwen montré zòt chimen-la alé koté Papa, é zòt obliyé sé Li zòt ké ni pou rann kont. I sé Papa an-Mwen, Bondyé an-Mwen, épi I sé Papa-zòt, Bondyé a-zòt. Ès a pa sa Mwen té ansényé?

21:15 I déklaré Mwen Bondyé, kon Mwen té Bondyé avan koumansman, mé alè Mwen ka rété sèvitè pou’Y, é tousa té fèt pou zòt. Épi, kon péché ka séparé zòt èvè Bondyé, lè zòt vini vivan, Papa déklaré zòt zanfan pou toujou.

21:16 Épi Gason-la pòté péché, té séparé èvè Papa, épi Papa déklaré’y Bondyé pou toujou. Syèl pa parèy ankò, chanjman-la té ja fèt avan fondasyon lèmonn, nan létènité, alòs panga lézòm obliyé Sila ki Papa.

21:17 Konsa, mwen, on nonm nan tristès, rété bazoudi èvè pawòl-la, é mwen jis pléré. Davwa ni on biten mwen té ka trihalé pou konprann, épi souvan mwen té ka palé sa lè mwen té nan lapriyè.

21:18 Mi, Gason a Bondyé divini Gason a lézòm, pou ouvè on chimen ka méné jwenn Papa, pou onpil zanfan a lézòm divin zanfan a Bondyé.

21:19 É I di konsa : Mwen sé Lapòt. Mé nou sav tout pòt ka ouvè asi on biten pli gran andidan, kilès moun pa konnèt ni vwè tout tan pòt ka rété fèmé.

21:20 Papa pli gran pasé Gason, davwa sé Li ki Papa é ni lotorité, magré Yo pa diféran ; épi Gason sé Chimen pou jwenn Papa, mé a pa Li ki Papa.

21:21 Sèl Gason a Bondyé divini on sèvitè a Bondyé, pou bay on dwa sizé nan kaz a Papa, pou onpil sèvitè a Bondyé divini zanfan a Bondyé.

21:22 Gason-la sé pòt-la ki ka méné koté Papa. Alòs, poukisa zòt ka rété nan sèy-pòt la toujou, é zòt pa k’alé pli lwen? Pòt-la gran toubònman, mé chato-la pli gran ankò. Kyè a Papa, koté Gason-la ni bitasyon, mi Chato a lavi.

21:23 Pòt-la voudré tout moun pasé pa li, menm jan Izrayèl pasé nan gwo lanmè ; épi Pòt-la ka méné nan latè-pwomèt, épi latè-la sé Papa.

21:24 Apré lanmè-la, ki sé Gason-la, avan latè-pwomèt, tini on montanny lalwa ; épi montanny a lalwa sé Lèspri.

21:25 Davwa lalwa ni pou maké anlè kyè a-zòt pa Lèspri, pou zòt tout konnèt Mwen, Bondyé Sényè di.

21:26 Moun ki pa konprann rèlasyon fonkyè antrè Krist é Papa, alè yo ni pou chèché é touvé ; konsa yo ké konnèt tout biten, èvè Lèspri, davwa yo ké ni pli gran konpransyon asi Pèsonalité ki nan Bondyé YHWH, ki twa.

21:27 Papa la ka atann nou. Sila ki sizé asi twòn-la bay tout lotorité nan men a Lanyo, épi Lanyo ka di : I sé Papa-Mwen, é Bondyé an-Mwen.

21:28 Mwen trapé lotorité koté Bondyé an-Mwen pou I Bondyé asi lézòm, menm jan lézòm trapé lorité koté Gason a lézòm pou yo mèt asi kréyasyon a Bondyé.

21:29 Pou on tan nan listwa, I pèd on mòso nan bèl lyannaj antrè on papa é on gason, lè I vini nan lèmonn pou sové lézòm. Mé alafen Bondyé kouwonné’y Bondyé.

21:30 Mi bèl syans, mi bèl konnésans, lè-ou-gadé Krist, Avoka, Sényè é Bondyé pou nou, Li-menm ni pou rann kont ba Sila ki divini Bondyé é Papa pou’Y. Tousa biten pou nou!

21:31 Alòs, si zòt doubout nan pòt-la san vini pli pré Sila ki Papa, ki sans zòt ka bay mésaj a-Y lè I té maché èvè zanfan a lézòm?

21:32 Davwa Krist bay Papa tout glwa. Sé pou sa, kolè a Papa pa anlè séla ki asèpté sakrifis a Gason-la pou yo.

21:33 Mé kyè a Papa adan on gwo chagren, davwa désèten moun ka di yo ka vini koté Gason-la, mé onpakèt moun obliyé Papa-la, é yo ka bay lidé sé on Bondyé kòlè ki san lanmou, kilès travay sé pou pini tout moun.

21:34 Ès lanmou a Sila ki Papa pli gran pasé lanmou a Sila ki Gason, davwa tèlman I té enmé lèmonn, I bay sèl Gason I zanfanté?

21:35 Sèlman, tèlman Abraham té enmé Sènyè-la, i té paré bay sèl gason i zanfanté ; gason-lasa sé la ki fèt nan lyannaj lanmou, nan linité plézi.

21:36 Si zòt kwè zot ni tout dwa pou jwenn twòn-la, pasé sèy-pòt-la pou jwenn Bondyé YYWH, épi rèsouvwè plis koté’Y. Davwa la, tini gran bénédisyon, é konnésans san défo pou nenpòt moun ki nòz alé sézi konplésité a Papa.

21:37 Pa ni ayen pou règrété, davwa Lèspri adan zòt, épi zòt adan Gason-la, Gason-la adan Papa, épi Papa adan Lèspri.

21:38 Gadé sa! Ni konplésité nan YHWH : Bondyé ki sen, Papa, Gason, Lèspri, YHWH ki enfini, sé Yonn ki pli konfyan. Grandè a-Y pli gran pasé sa nou konprann.

21:39 Épi sa bon pou chak moun pwoché’Y épi konprann gran dimansyon a Pèsonalité ki nan Bondyé. Davwa pa ni jalouzi, é pa ni rivalité nan Ladivinité ; plito, ni konplésité a lavi.

21:40 Bondyé sé Yonn nan twa, dépi avan-jou, jòdi-jou, é pou toujou ; yo pa ka lité pou rényé, yo pa ka débat pou puisans, yo pa ka goumé pou glwa. Yo sé Yonn, é toulé twa sé Yonn ki konplé, é lyanné : Papa, Gason, é Lèspri.

21:41 Mo a lézòm pé pa dékri sa lèspri a on nonm konnèt. Davwa yo pa ba lézòm mo pou yo dékri Sila ki san dèskrisyon ; mé yo ba yo lèspri pou konnèt Sila ki Lèspri.