Témwen 33

33:1 Sényè, nou tout ni pou hont! Gadé jan mwen hont, pou mwen é pou pèp an-mwen! Davwa nou sé on wayòm nan rébélyon, jis jòdi-jou, é nou pa tann lè Ou vèti, ni kouté lè Ou palé.

33:2 Gadé jan nou dan ladévenn! Nou divini kon labou nan lari ; yo krazé é pilé anba pyé a lènmi-la.

33:3 Ou ban nou pawòl a-Y, sèlman nou pa kyenbé’y rèd. Sé pwòp pawòl an-nou ki nouri nou, épi sé pwòp chimen an-nou ki méné nou.

33:4 YHWH, Ou sé Bondyé Toupuisan, Ou sé Liyon é Lanyo. Mé, ki fanmi an-mwen ki mwen, nou tout koupab.

33:5 Nan tout listwa, nou li pawòl a-W, mé nou pa byen konprann yo. Yo ka témwanyé grandè a Sényè an-nou, mé gadé jan nou sé pousyè anlè fas a latè.

33:6 Sèlman, mi sa mwen di : Sa dé zyé an-mwen pa té vwè, sé sa mwen ké vwè, épi sa dé zòrèy an-mwen pa té tann, sé sa mwen ké tann. Sa bouch an-mwen pa té di, sé sa mwen ké palé, épi sa men an-mwen pa té fè, sé sa mwen ké mannyé.

33:7 Davwa pèp-la ka di, Ou pa ka travay ankò jan Ou té fè’y nan tan a Zapòt a-W ki té sen ; épi yo ka di osi : Sé té sèlman on ti gouté pou sa ki ka atann nou nan syèl.

33:8 A, Sényè, pran pityé pou mwen é pèp an-mwen, davwa nou adan rébélyon kont Vou. Pou vré, nou pa ka chèché vwè glwa a-W pannan nou ka maché yonndé jou nan lèmonn, épi nou ka mété nou akèz nan lidé initil ou ni, épi nou ka blanméW pa Pawòl-la, pou èspliké lè nou pa éfikas.

33:9 Kisa nou ké réflété si sé pa lahont? Anvré, tout nasyon ka kouvè nou èvè mové pawòl, davwa yo ka vwè jan nou komik. Davwa sa nou ka préché nou yé, a pa sa nou yé alèkilé. A, Sényè! Vini libéré nou nan vanité an-nou!

33:10 Mwen ka di jòdi, pa dèmen! Jòdi, pa dèmen, biten ké chanjé. Ou kriyé mwen pou divini on nonm dapré glwa a-W, é sèl biten mwen vlé sé fè’W plézi.

33:11 Kifè, mwen ka doubout é palé adan non a-W, davwa rékonpans an-mwen sé sa : Non a Sényè an-Mwen, Jézi-Kri, glorifyé.

33:12 Mwen té anmitan yo, sèlman jòdi, pa dèmen, mwen ka sòti anmitan yo. Yo té papa-mwen, sèlman jòdi, pa dèmen, Ou sé Papa-mwen.

33:13 Lè mwen ka vwè mizè anlè Fi a Papa-mwen, ès mwen pou di ayen? Lè mwen ka vwè soufrans anlè Fanm a Frè an-Mwen, ès mwen pou rété san palé?

33:14 Awa, mwen pa vlé rété san palé, davwa Lèspri a Sényè-la kilès I té ban mwen jou-la mwen té kwè adan non a-Y, Sila ki Lèspri a Papa-mwen, mi I asi mwen.

33:15 Pou déklaré gérizon a moun ki malad, davwa péché ja èspédyé, libèté a moun nan prizon, davwa lanmò ja pèd konba, épi tan a lajwa koté Sényè-la, davwa lavi étènèl ja bay.

33:16 Sényè, mi mwen ka vwè syèl ouvè, é Lèspri ka désann. Sé granmòn-la ka réjwi é dansé nan lajwa, yo ka bat lanmen é chanté louwanj a YHWH.

33:17 Syèl-la inondé èvè limyè, épi latè ka kléré ; gran lanmè-la anrajé, sé vag-la ka lévé, épi yo ka voyé atè bato débouya. Épi, nan lanmè-la, on Wòch sòti, ki pa ka branné é moun pa ka gannyé.

33:18 Mwen ké di pawòl-la, davwa Sényè-la konfyé mwen yo. É si mwen pa di ayen, mwen pé ké fidèl pou’Y, davwa Pawòl a-Y ké akonpli, é volonté a-Y ké fèt.

33:19 Yo ban mwen on misyon ; kimoun ké di mwen, ‘Sòti la’? Yo ban mwen lòd palé ; kimoun ké di mwen, ‘Pé la’?

33:20 Ès a pa mwen ki di’Y, ‘Mwen toupiti é jenn’? Ès a pa Li ki réponn, ‘Pa di ou toupiti é jenn, davwa Mwen ké fè’w divini gran nan jénérasyon-lasa’?

33:21 Ès mwen pa di’Y, ‘Kimoun ké kouté mwen?’ Ès I pa réponn, ‘Ki yo kouté’y, ki yo pa kouté’y, déklaré sa ou rèsouvwè’?

33:22 Lè mwen té di, ‘Sényè, mwen sé on péchè, é fo mwen vini méyè’, I di, ‘Mwen pa vlé moun ki méyè, mé moun ki ka santifyé kò a-yo toulongalé’.

33:23 Sa yo di mwen nan sigré, mwen ké déklaré douvan moun, sa yo di mwen nan chanm, mwen ké déklaré anlè twa, sa yo di mwen lannuit, mwen ké déklaré lajouné.

33:24 Davwa ni ayen kaché ki pé ké révélé. Légliz an-Mwen divini on lopital koté yo ka kaché maladi kon sigré médikal ; pa ni vré dyagnostik, épi yo ka kaché sé moun-la ki maladi yo ni ; épi aprésa lopital-la ka divini on klinik, on lopital privé.

33:25 Yo ka kaché kansè-la, kilès sé péché, épi yo ka di pèp-la, ‘Pa palé sa, pou p’on moun pa ofansé! Kaché sa! Kèlkanswa, sa pa gran zafè!’

33:26 Mé-zanmi, gadé nwèsè adan zòt! Had a-yo taché, mé a pa san, épi zòt pa menm sav sa. Zòt sal! Ès fo Mwen kaché zòt sa?

33:27 Ès zòt vlé mwen konté zòt on yékrik-yékrak? Ès zòt vlé on lévanjil ki dous èvè tibren sitwon é tigout miyèl pou mal-gòj la zòt ni la, pou zòt valé Lévanjil-la pli byen, pou boyo a-zòt pa anmè? Asiré, non! Moun-la ki ka fè péché, i èsklav a péché.

33:28 Mwen té kon zòt, mé jòdi, pa dèmen, mwen ka di, ‘Asé! Mwen ké glorifyé non a Sila ki libéré anba lèsklav a péché, é ki ban mwen libètè étènèl.

33:29 Mwen lité, mé Sényè-la té ja gannyé pou mwen. Ès fo mwen hont? Asiré, non! Si mwen pa ka préché lavérité, mwen sé on mantè.

33:30 Yo moké mwen é yo blésé mwen èvè pawòl, davwa yo pa konprann sa mwen té yé, lè mwen té on timoun. Mwen lité kont pwazon mové lidé, davwa mwen konprann sa té nòwmal lè on jé on jenn tibway.

33:31 Mwen té èsklav a tantasyon mové vis, akòz mwen soufè nan solitid lè mwen té gran tibway. Mwen pa ba onpil moun kò an-mwen, é mwen konsakré sa mwen yé pou rété pwòp magré onpil fwa mwen échwé.

33:32 Mwen fasadé onpil démon nan tèt an-mwen, ka di fini èvè lavi, davwa i pa mérité viv, lè mwen té jenn nonm.

33:33 Anvré, mwen té san fòs, é p’on moun, annisòf Sila ki Yonn, té janmé konnèt jan mwen soufè san palé, davwa mwen kyenbé tousa nan fonkyè kon adan on plaka plen manjé gaté.

33:34 Mé on jou nonmé Jòdi, pa Dèmen, mwen kriyé’Y, ‘Vini sové mwen anba sa mwen yé!’ Épi Sényè-la réponn, ‘Mi Mwen!’

33:35 Aprézan, ès moun andwa di mwen, ‘Pa palé péché konsa! Ès ou hont di sa!’? Ès moun andwa mandé mwen, ‘Sèvi dòt mo, pa pwononsé mo-lasa, Péché!’?

33:36 Sèlman tout tan péché rété nan kyè a-zòt, fo zòt woté’y. Moun ki hont, pa konnèt Sényè-la. Mi, honté a-zòt sé péché a-zòt.

33:37 Adan non a YHWH, Bondyé Vivan, lè sé on chat, mwen ka di ‘chat’, épi lè sé on péché, mwen ka di ‘péché’. Adan non a YHWH, Bondyé-Vivan, mwen ka dénonsé mal-la ki kon maladi anmitan pèp a-Y dépi two lontan. Péché ki non a-y.

33:38 Konsi sa pa té asé, nou ka kyenbé rèd nan rébélyon an-nou, davwa nou wòs é pa vlé défawouché, pli mové pasé bourik. Mé jouk a Sényè Jézi-Kri flo, é chaj a-Y léjè.

33:39 Jòdi, é pa dèmen, mwen ké di pèp an-mwen, ‘Mwen-menm, séla ki frè é sè an-mwen, séla ki papa é manman-mwen, séla ki zanfan an-mwen, èvè tout séla ki di yo ni Lafwa nan Krist : Mi mwen hont pou nou!’

33:40 Davwa nou té doubout asi dé pyé, é nou té ka maché alavolonté. Aprésa jou-la vini lè boul é chenn maré pyé an-nou, mé nou pa fè kwik.

33:41 Dòt chenn vini pri men an-nou, é boul ki pli lou mélé pyé an-nou, jistan jou-la rivé, lè nou pa té sa maché, nou koumansé halé kalpat.

33:42 Konsa, olyé nou kouri kon liyon, olyé nou soté kon timouton, olyé nou volé kon zéglon, olyé nou najé kon pwason, nou tout trenné bouden atè kon sèpan.

33:43 Épi, olyé pen nou trapé wòch, olyé pwason nou trapé sèpan, olyé zé nou trapé mil-pat, olyé diven nou trapé san, olyé dlo nou trapé vinèg.

33:44 Kyè plen trayizon, lanmen plen san inosan, sé pou sa zòt adan sa. Alòs, jòdi, pa dèmen, rèpanti davwa wayòm a syèl-la ja toupré.

33:45 Lè pyébwa ka bay mové fwi, sav nan ki sézon nou yé. Lè vyé zèb ka pousé pli vit pasé bon-grenn, kouté pawòl-la.

33:46 Davwa, jénérasyon-lasa pé ké ni dòt siny ki sila ki ja alavwéri. Yo fèmé dé zyé, pou yo pa vwè é géri.

33:47 Mwen sav détwa ka di pwofèt pa ka ègzisté dépi lontan, é Mwen sav dòt ka kwè nenpòt moun-vini, san yo tèsté lèspri.

33:48 Alòs, sav jòdi, é pa dèmen, YHWH ké fè biten nèf pou zòt ; sèlman pa ni ayen ki nèf anba solèy.

33:49 Kanta mwen-menm, mwen ka rèfizé manjé pen rasi a jénérasyon ki pasé, on pen ayen dòt ki pwazon. Davwa si pen-la touné rasi, sé paskè yo pa k’alé fè pwovizyon koté Sila ki ka bay li.

33:50 Sila ka bay pen-la, I mèyè obliyé fè lantou livrézon, oben plito lè I vini, I jwenn pòt a-zot fèmé aklé?

33:51 Pen rasi a-zòt ki pa té sa bay lavi nan kaz a-zòt, Mwen ka di zòt, jété nan bwa, épi alé koté Sila ki ka bay pen.

33:52 Asiré, zòt ké viv, davwa èvè’Y zòt ké trapé on pen chak jou. Pen a jòdi, pa pen a yè, ni ta dèmen.

33:53 Wi, jòdi-jou, é pa dèmen, sé tan pou révélasyon a séla ki zanfan a YHWH, davwa fo nou manjé é bwè nan kò é san a Sényè Jézi-Kri, é fo nou obéyi pawòl a-Y

33:54 Sèlman, manjé an-nou sé lahont, kon nou enkapab obéyi tousuit Pawòl a Bondyé Sényè, é kouté sa I ka di. Enkapab maché nan Lèspri a-Y, pou géri moun malad, chasé démon, fè tout sé siny-la I di yo ké suiv séla ki ka kwè adan’Y.

33:55 Ès Bondyé an-nou ka manti? Si non, poukisa nou ka jistifyé jan nou yé, é di sé té yenki pou lé-zapòt? Ès mwen pa kwè? Mé mwen ka kwè mwen kwè.

33:56 Jòdi, é pa dèmen, mwen di, ‘Sényè, mwen ka kwè. Vini édé la ka manké mwen lafwa. Tout biten posib pou sila ki ka kwè’.

33:57 Si lafwa an-mwen sé kon piti grenn- moutad, èvè lafwa ki ta-W mwen ké di mòn, ‘Sòti’w la, é jété kò a-w nan lanmè’, épi sa ké fèt. Jòdi, mwen ka kwè é alè sa ké fèt.

33:58 Sényè, kité Pawòl a-W rété adan nou, é nou ké di, ‘Géri’, é sa ké fèt. Mwen ké di on pawòl, é sa ké rivé.

33:59 Adan YHWH, mwen sa fè tout biten, davwa sé pa èvè ni fòs ni puisans, mé sé èvè Lèspri a Sényè-la. 

33:60 Ès a pa Sényè-la ki, èvè Lèspri a-Y, ka rété adan nou? Ès mwen pa on tanp ba Lèspri-Sen? Ès mwen pa piti adan mwen, é gran adan’Y?