Témwen 34

¹  Jòdi, é pa dèmen, mwen ké pwoklamé sa ki lavérité, Lévanjil a Jézi-Kri, Gason a Bondyé.

² Davwa I pa alé anlè lakwa pou mwen, divini èsklav a péché, mé pou mwen libéré é divini èsklav a lajistis, labonté, ladréti, lagras, épi pou pòté fwi é rèsouvwè kado a Lèspri.

³  Péché, oti fòs a-w? Lanmò, ou fini bat! Lapè, ou chapé lwen!

⁴ Mwen pa limyè kouvè anba on po, mé mwen ka kité Papa pozé mwen la mwen ké sa voyé limyè asi moun I envité, séla I envité depi déyo-la, pou yo antré nan kaz a Papa-la.

⁵ Mwen sé sèl-la ki manké pèd léta a-y ; mé jòdi, é pa dèmen, mwen di, ‘Sényè, salé mwen èvè difé a-W ki sen’.

⁶ Mwen pa on vil ki bati nan ravin ; mé mwen anlè mòn-la, Mòn Siyon. Onpil moun ké vwè’y é kouri jwenn li pou kaché anmitan masonn a-y.

⁷ Gadé onpil biten rivé Légliz an-Mwen, Bondyé Sényè di. Konsa, Mwen pran lidé travay anmitan’y, é Mwen ké fè’y jòdi, é pa dèmen.

⁸ Pèp an-Mwen, mi Mwen ka vansé. Zòt ni valè pou Mwen, mé zòt doubout nan lapòt a fènwè.

⁹ Gadé onpil konfò, mé mi malkonfò ka vansé. Moun byen alèz, mé mi malèz toupré lanmen.

¹⁰ Pannan ou ka maké pawòl an-Mwen, di yo : Mwen palé, é ké kontinyé palé. Pèp an-Mwen, gadé jan zòt lwen Mwen, davwa péché a-zòt bati on masonn antrè zòt é Mwen.

¹¹ Woté lahont a-zòt ;  jété péché a-zòt lwen é zòt ké vwè si péyi-la pa rétabli. Latè ki branhang ké pòté onlo fwi.

¹² Sé mòn-la ka tranblé nan fondasyon, épi dlo a loséyan chayé nan tout sans. Sé pyébwa-la ka pòté bon fwi, épi latè ka kléré nan laglwa.

¹³ Mé zanfan an-Mwen pé ké pòté pyès fwi, é yo pé ké kléré non pli, lè yo ka onoré Mwen yenki èvè lèv a-yo, é lè kyè a-yo lwen Mwen.

¹⁴ Tiré douvan Mwen, séla ki ka pwomèt richès adan non an-Mwen, davwa Mwen té di, ‘Anpilé pou zòt-menm trézò ki nan syèl, la pa ni vòlè.’

¹⁵ Tiré douvan Mwen, séla ki ka di pèp-la; ‘Zòt sé tèt, é pa kyé, mé yo ka palé richès nan lèmonn, davwa yo ka déklaré pèp-la, ‘Lajan é lò sé ta Sényè-la ; mandé é zòt ké trapé’.

¹⁶ A pa ti bèl sa bèl, pou pran pawòl an-Mwen é anmiyonné moun ka kouté. A pa ti bèl yo bèl, lang a séla ki ka sèvi pawòl an-Mwen, é ka pliché vérité a-y.

¹⁷ Sèlman, zòt ki pèp, vré richès a-zòt sé ta syèl, é yo ba zòt kado a Lèspri ; davwa lèmonn pa ka trapé’y, piskè yo pa konnèt Lèspri-la.

¹⁸ Mi lavérité! Zòt sé tèt spirityèl, davwa anvré zòt sé anbasadè é prèt pou Mwen, épi gad-véyè é pwofèt pou Mwen, zòt sé sèvitè é disip pou Mwen, épi zanfan é zanmi pou Mwen.

¹⁹ Mwen kréyé moun rich é moun pòv pou plan-la Mwen té jé tiré avan fondasyon a latè. Mandé sa zòt bizwen, é zòt ké ni’y. Chèché wayòm a Syèl an prèmyé, é zòt ké kontanté èvè rèpo.

²⁰ Gadé konyéla sa ki wayòm a Syèl : Moun avèg ka vwè, moun bwété ka maché, moun lad pirifyé, é moun soud ka tann, moun mò ka lévé, moun anchenn libéré, é Bon-Nouvèl la préché ba moun maléré.

²¹ Sa pé fèt tout biten nan lachè é lèspri, mé lavérité ka rété lavérité, davwa i pa ka fè dé lidé, é i pa ka palé dé lang.

²² Tan-la rivé pou zòt, bann fo pwofèt, pou zòt arété méprizé sèla ki ka boké zòt. Davwa, pétèt yo pa mèt nan téoloji, oben yo pa nan lékòl bon-zanmi.

²³ Sèlman zòt pou sav, sila ki ka chèché volonté a Papa, é ki ka rété nan lékol a-Y, i pli gran pasé sila ki alé nan lékòl a lézòm é ka fini pli mové pasé on farizyen.

²⁴ Rèkonnèt Sényè-ka ka travayè èvè moun ki piti, é I ka rézisté moun aristokrat ; davwa zanfan-la piti, i pa alé nan gran lékòl biblik, é i pa gran nan pyès légliz.

²⁵ Sèlman i ka palé sa ki lavérité, é  i ké kontinyé lavérité, davwa Mwen YHWH, ba’y misyon pou fè’y, é i ké fè’y, tousa pou Mwen glorifyé.

²⁶ Lépèp, o! Mwen ka palé nan modèsti, ‘Mwen pa pli gran pasé zòt. Mwen sé yenki on sèvitè, épi kon tout sèvitè, Mwen ka obéyi vwa a Mèt-la ki komandé mwen sé biten-lasa : Palé! Ében mwen ka palé. Fè! Ében mwen ka fè. Maché! Ében mwen ka maché. Doubout! Ében mwen ka doubout.

²⁷ Jòdi, é pa dèmen, yo ké fè pou mwen dapré lafwa mwen ni ; épi mwen ka konfyé lafwa nan men a Jézi-Kri, Mèt-fè é Finisè a lafwa. Épi mwen sav mwen pé ké janmé garé.

²⁸ Lézòm, o! Pa chèché sa ki mal, mé réjwi davwa jenn moun la lévé èvè lèspri ki té ta Jérémi é Gédéyon. Sé travay a Sényè-la, pou kaz a Papa adan léta I té ké vlé.

²⁹ Chak lajouné ka pòté asé traka nan kò a-y, épi chak jénérasyon ka bwè asé pwazon ki ta-y.

³⁰ Jòdi sé jou-la Mwen ka voyé jenn mésajé an-Mwen, épi yo ké doubout é antré nan Tanp-la èvè onpil kòd. Yo ké chasé séla ki ka bokanté nan Kaz a Papa-yo.

³¹ Davwa pèp-la ka bokanté èvè péché nan tanp-la, é yo ka vann Lévanjil. Ès Mwen ké rété la ka gadé? Yo ka fè tout kalité zafè nan kaz a Papa, é yo ka méné malpwòpté nan kat masonn a-y.

³² Mé Mwen ka di zòt konsa : Kaz-lasa sé on kaz a priyè, mé zòt fè’y divini on bik a vòlè, davwa yo ka vòlé nanm a zanfan a Papa-Mwen.

³³ Époutan, sila ki vini vòlé, krazé épi kyouyé sé moun a dyab-la ; mi sé konsa zòt sav kimoun ki papa-yo.

³⁴ Épi zòt ké konnèt osi kimoun yo ka bay lonè, laglwa, sila ki papa mantè ; davwa menm lè yo ka sèvi non a Jézi, yo sé bann lou dévoran abiyé kon mouton.

³⁵ Ès Mwen ké mété on vwèl asi tèt an-Mwen alavwéri tousa? Ès Mwen ké mété tèt an-Mwen adan on tou kon lotrich? Oben ès Mwen ké fè lasanblan pa vwè?

³⁶ Sila ki Advèsè, ja plasé fo pwofèt a-y nan kaz-la. Ès Mwen ké doubout la san di on pawòl? Ès Mwen ké ba yo chèz pou yo sizé? Non, awa!

³⁷ Gadé sa! Mwen ka monté dépi atè kon pyé-séda anmitan dòt pyébwa, davwa Yo ban mwen on misyon. Lité kont fo pèp-la é sé fo pwofèt-la, pou vré pèp-la é sé vré pwofèt-la jwenn lonè.  

³⁸ Jòdi, é pa dèmen, mwen ka woté vwè-la anlè tout tèt, davwa tout biten ni pou révélé. Jòdi, é pa dèmen, mwen ka gadé anlè, é mwen ka monté mòn pou pwoklamé adan non Papa, é Gason, é Lèspri-Sen, Sila ki Sényè YHWH :

³⁹ Sa nou pa té vwè èvè dé zyé, sa ké parèt nan jénérasyon-lasa, épi sa nou pa té tann èvè dé zòrèy, sa ké palé nan sézon-lasa.

⁴⁰ Alòs mwen priyé é di, ‘Sényè, révélé mwen sé lèspri-la ki ka fè pli déga nan légliz a-W, pou mwen priyé é goumé kont yo’.

⁴¹ Épi pannan mwen té ajounou, Sényè-la palé gyè palé ban mwen. I chui-chui onsèl mo nan zòrèy an-mwen, épi mo-lasa té ‘Hira’.

⁴² Mwen pa té sav kisa sa té ye an tan-lasa. Mwen pa té janmé tann mo-lasa avan, é pa té menm sav kijan sa ka maké. Mwen té bazoudi, é pa rivé dòmi jistan mwen té konnèt sans a mo-lasa.

⁴³ Alòs, mwen doubout vitman présé, é mwen alé gadé sa asi entènèt. Apré mwen té éséyé plizyè mannyè pou maké’y, mwen jwenn mo-la anfen-di-kont.

⁴⁴ Mwen té èstébékwé aprann, Hira sé té gwòt-la adan kilès Mohamèd, pwofèt a Islam, di i té kontré zanj Gabriyèl, é koté i té rèsouvwè prèmyé révélasyon a-y.

⁴⁵ Mwen li tout listwa-la, é sa ki anrapò èvè zanj-la ki té tanté tranglé nonm twa fwa, ka mandé’y li oben résité, magré nonm-la pa té konnèt li.

⁴⁶ Apré mwen té kalkilé sa onpil, Lèspri a Sényè-la ouvè lèspri an-mwen, é i montré mwen a pa té Gabriyèl, ni p’on zanj ki sòti koté Sényè YHWH, mé plito on démon, kon Mohamèd li-menm té kwè.

⁴⁷ Davwa tout zanj ki sòti koté YHWH, toujou ka méné lapé èvè mésaj a-yo. Yo té ka di, ‘Pa pran pè!’ é osi, ‘Lapé asi adan non a Sényè-la’.

⁴⁸ Sèlman zanj-lasa, swadi Gabriyèl, i pa té pòté lapé ba Mohamèd, mé yenki lapè é traka. Épi kon i kwè sé té on démon, menm Satan, nonm-la kouri jwenn madanm a-y.  

⁴⁹ Mé mwen pa té ka konprann rapò sa té ni èvè Légliz, davwa mwen té priyé pou’y. Épi Sényè-la ouvè lèspri an-mwen, épi tout biten vini klè.

⁵⁰ Lèspri-la ki ka fè plizanpli ravaj nan Légliz-la jòdi, sé lèspri a fo pwofési.

⁵¹ Onpil fo révélasyon déklaré adan non a Bondyé é adan Gason a-Y, Jézi-Kri, mé yo ka pwoklamé on dòt dyé é on fo krist. Mi, akòz lèspri a fo pwofési lasa, moun krétyen ka dékonsidéré vré Lèspri a pwofési.

⁵² Anvré, alèkilé, tout moun ka sanm yo ni on révélasyon, sèlman yo pa ka dénonsé mové biten ki ka détri pèp an-Mwen, YHWH ka di.

⁵³ Konmen nonm é fanm ja tonbé, jòdi, é pa dèmen, nan grangouf a manti a Satan?  Manti pasé manti, oti lavérité, kimoun sa di?

⁵⁴ Sèlman, Mwen ka di zòt : Séla ki antré akokanny mizi an mizi, yo ké chapé janm alantou kou.

⁵⁵ Davwa jòdi, é pa dèmen, sa nou pa vwè nan dé zyé, mi sa ké pasé ; épi jòdi, pa dèmen, sa nou pa tann nan zòrèy, mi sa ké pasé.

⁵⁶ Ni on tan pou tout biten, épi alè sé tan pou rétabli lòd nan kaz a Sényè-la. Pa ni ayen ki nèf anba solèy ; sa ki té yé, sé sa ki ké yé : Senté!

⁵⁷ Mwen ké onoré Sényè YHWH, obéyi komandman a-Y, maché nan volonté a-Y, é fè fon asi’Y. Davwa, san Li, mwen pa kapab èvè ayen.

⁵⁸ Zòt tout ni pou vini é doubout anlè dé pyé èvè mwen, é pwoklamé Lévanjil adan kilès Gason a Bondyé vini nan lèmonn, étan Jézi-Kri nan lachè.

⁵⁹ I maché asi latè, pou ansényé, I alé anlè lakwa, pou sèvi sakrifis, épi I désann nan tonbo, pou délivré.

⁶⁰ Épi I viré lévé twazyèm jou-la, dapré Lékriti, pou bay lavi, I monté nan syèl, étan sèvi prèt, épi I sizé nan lanmen dwèt a Papa, pou rényé.

⁶¹ I ké viré é jijé moun vivan é moun mò, épi I ké rann chak moun dapré sa yo fè, é dapré sa yo fè èvè kado a Bondyé, ki sé Gason Chéri a-Y.

⁶² Épi jòdi, pa dèmen, Bondyé Sényè ké fè onpil gran mirak, mé pa kon sé moun-la èspéré.

⁶³ Davwa, Mwen YHWH, sé Sényè ka fè siny é mèrvèy anlè latè é anba syèl.

⁶⁴ Mwen ké méné pèp an-Mwen nan sékirité, é aprann yo kijan pou obéyi pawòl an-Mwen, Sényè-la di. Mwen sé Yonn ki ka travay jòdi, é ké travay dèmen ; Mwen pa ni koumansman, ni fen.

⁶⁵ Dépi nan koumansman Mwen té palé asi lafen, épi avan lafen Mwen té palé asi koumansman. Tousa sòti koté Papa, atravè Gason, é pa Lèspri-Sen.

⁶⁶ Sèlman pran pokosyon èvè fo siny é mèrvèy ki sòti koté papa mantè ki sé Satan, gason pèdisyon ki sè Lantikrist, épi lèspri blasfémi ki sé Fo pwofèt-la.