Lavwa Anba Bwa

Mi on kadans dékadansé,

Tout chanté nan fal a sikriyé,

Ki ka alé-viré nan fétay douvanjou,

Kilès ka di on vyé nonm bonjou.

Apré laswèf té fini déswèfé,

Travayè-la ki té byen triviyé

Avan solèy té woté pyé an kabann,

Té sizé an zèb anfas épi on chan kann.

Anbafèy on bann boustabak

Alavòl yo chak èvè on ti tyak,

Té ka chanté anlè branch a pyébwa

On lokans ritmé pou bay lavwa.

Sé konsa tandè-la konstaté

Apré tan lanné ‘i té fini planné,

I poko té konprann langaj a zozyo,

Magré touléjou i té ka tann yo.

Èvè chapo pay toutafèt dépayé

Misyé-la lévé doubout pou granmèsyé,

Tout ti zozyo ki té sanblé kon zétwal

Anba bwa ka bay mizik kannaval.

Nanm èsprimé sa ki té dan lèspri,

Tout lanvi pou aprann kouté lavi

Kon twa gout-dlo tonbé anlè on plim,

Kilès té témwen a on jenn viktim.

Vyé boug-la koumansé bougonné,

Tèt a-y bésé pou on zozyo blésé

Kilès té déranjé’y abonnè-la,

Kilès té kouché san vi atè-la.

Épi pou sakrilèj vini sakrifis,

Pou bénédisyon fè bénéfis,

I antéré sisi-la anba on pyébwa,

Pou onoré’y i ba’y on dènyé lavwa.