Témwen 3

3:1 YHWH, Bondyé Toupuisan, tini onpil lapenn nan kyè a chak moun, é tanzantan nou ka abrité nan joupa nou fè èvè bwa ki plen poulbwa.

3:2 Mé Papa, Ou ja paré pou nou on chato bati anlè on gwo Wòch, koté délivrans a-W ka rété, menm-la yè, jòdi, é dèmen.

3:3 Davwa, an tan pasé, mwen té sové anba pinisyon pou péché, épi mwen trapé lavi. Konsa nan jistifikasyon pou lèspri an-mwen, mwen ké sa déklaré jistis a-W dépi toujou é pou toujou. Mi, Lèspri a-W sé tout bonté.

3:4 Sèlman, an tan prézan, mwen ka sové anba puisans a péché, é mwen ka trapé lavi. Konsa, nan santifikasyon pou nanm an-mwen, mwen ké déklaré jan Ou Sen dépi toujou é pou toujou. Mi, Nanm a-W sé tout lanmou.

3:5 Épi, an tan vini, mwen ké sové anba prézans a péché, é mwen ké trapé lavi. Konsa, nan glorifikasyon pou kò an-mwen, mwen ké déklaré glwa a-W dépi toujou é pou toujou. Mi, Kò a-W sé tout majèsté.

3:6 Mwen fèt nèf nan Jézi-Kri, Gason a Bondyé-Vivan, épi mwen trapé on kado plen valè, lavi étènèl.

3:7 Sényè, nan Lèspri-Sen a-W, lavi chanjé pou mwen, épi mwen pa, mwen pa té, é mwen pé ké menm moun-la ankò.

3:8 Mwen té pli piti nonm asi fas a latè é lajennès té anmè pou mwen ; si anmè lavi té yé pou mwen, mwen té voudré fini èvè’y nan lanmò, pou i té pli dous pou onfwa.

3:9 On mwa avan mwen té trapé venndé lanné, Non a Jézi, kilès mwen kwè mwen té konnèt, té préché nan tout lavérité.

3:10 Twa fwa mwen tann palé gran travay lanmou é rédansyon i pòté asi Lakwa, mé mwen pa té sa vwè kijan on Bondyé si bon té kapab enmé mwen é sové mwen. Davwa mwen té hont é hay sa mwen té yé ; kouman I té pé voyé zyé asi mwen, on péchè?

3:11 Sèlman, nan lannuit apré twazyèm fwa-la, jou dimanch 1^é out 2004, mwen pa rivé fèmé zyé. Alòs, mwen chèché’Y, épi senk jou apré I touvé mwen.

3:12 Sé vandrédi swè lasa, apré Sabat yé koumansé, I touvé rèpo é mwen fèt nèf, kon mwen té aksèpté Krist kon Sovè pou mwen, é kon Sényè pou on lavi nèf.  

3:13 Mwen fè lidé konnèt Nonm-la, Bondyé-lasa ki té bay vi a-Y pou rédansyonné péché a lézòm, Sila pa kilès nou aksèpté nan prézans a Papa Bondyé.

3:14 Épi mwen transfòmé on mannyè ni mwen ni pyès moun té kapab konprann, davwa tousa YHWH ka fè pa Lèspri a-Y, sé on mistè nan zyé a moun ki savan an tan jòdi.

3:15 Antouka, pou séla ki divini zanfan a-Y pa adòpsyon, mistè ka révélé mizi an mizi jiska jou-la lè nou ké vwè’Y fas a fas jan I yé.

3:16 Bondyé YHWH sé Yonn ki gran, é Sényè a lakréyasyon ka kléré. Davwa I kon solèy, kilès dépi tan té timoun, ka kléré nan mèrvèy zyé a tout pèp ki ja fè bitasyon asi latè.

3:17 Anvré, onpil gran sivilasyon ja vini nan lèmonn, é lontan yo ja disparèt asi fas a latè, sèlman solèy ka rété ; ében sé menm biten pou YHWH Toupuisan.

3:18 Davwa sé pèp-lasa kité dèyè yo yonndé tras ka di yo pasé é alé, sèlman prézans a-W ka rété pou toujou, Ou Bondyé Étènèl.

3:19 Lèspri Konsolasyon kilès Krist Sényè té pwomèt pou moun ki ka kwè nan Li, mi I kachté mwen kon papyé-woulé ki plen valè nan plat-men a Bondyé, pou mwen kouté Vwa a-Y é maché nan Chimen a-Y.

3:20 Davwa jou-la I pou vini la, lè Sényè Toupuisan ké woté kach-la, mwen ké révélé menm jan ki tout moun ki ta-Y.

3:21 I ka bay pouvwa pa Gason a-Y pou sila ki ka aksèpté pran pati nan wayòm a-Y, yonn ki envizib alè mé ki vré.

3:22 Épi wayòm a-Y fèt èvè lanmou, lajistis, é laglwa ; pa èvè larichès, lanvi, é lahadyès. Épi wayòm a-Y pé ké ni fen, piskè I sé on Wa étènèl.

3:23 Louwanj ba Ansyen-nan-Jou, davwa travay I fè sé bèlté e puisans ba tout kréyati ki ka rété nan hotè syèl, nan mitan épi fondè a-y, ba tout séla ki pa révòlté èvè Satan, papa a tout movèzté, kilès ni malédisyon pou toujou.

3:24 Louwanj ba Gason-a-Nonm, davwa pawòl I di sé bèlté é puisans ba tout kréyati ki ka rété nan hotè latè, nan sifas épi fondè a-y, ba tout séla ki ka obéyi YHWH, Papa Tout Jistis, kilès ni laglwa pou toujou.

3:25 Sèlman, ba tout séla ki vwè èvè dé zyé a-yo, époutan yo pa kwè sa lakréyasyon ka déklaré dépi lèmonn té fèt, mi sa Kréyatè ka di :  

3:26 Ban Mwen sa ki tan-Mwen, davwa pa ni, pa té ni é pé ké ni ayen ki mal adan Mwen. Mi pousa, lahenn zòt ni pou Mwen pa ni pyès fondasyon pou doubout.

3:27 Kité Mwen gidé kyè a-zòt anlè chimen a Lavérité, menm si zòt ka di zòt pa bizwen gid, kon zòt ka maché tou-avèg, pa kapab diféransyé lanmen dwèt é lanmen gòch.

3:28 Épi yo ka di yonn ba lòt : Kité mwen gidé épi ou-menm ké gidé mwen, konsa toulé-dé nou ké pli fò. Anvré, yo ké pli fò, dapré pawòl moun ka di : Lyanné nou ké doubout, divizé nou ké tonbé.

3:29 Sèlman, pou ki travay yo ka kolé tèt ansanm, yo ki ka rèfizé kwè nan YHWH é onoré Bondyé-Sajès, é Limyè-Lézòm?

3:30 Mi, lè-la toupré é zòt la ka di : A pa jòdi tousèl, mé dépi an tan lontan moun di nou I ka viré, sèlman nou pa ka vwè’Y pyès koté.

3:31 Si I ka ègzisté anvré, Bondyé-la zòt pa las palé la, kité’Y désann Li-menm, é konsa nou ké vwè’Y.

3:32 Zabitan latè, mé kimoun ka ba zòt dérèspékté Non a Sila ki Pli-Ho? Davwa, Mwen sé Lèspri-Vivan, Bondyé YHWH ka di, épi séla ki ka vwè Mwen, yo ka vwè Mwen nan Lèspri é Lavérité.

3:33 Alòs, kité zyé a-zòt fèmé é kité kyè a-zòt ouvè pou Lèspri an-Mwen, é anvré zòt tout ké vwè Mwen jan Mwen Yé, Lavérité.