Témwen 12

12:1 Mwen, jenn boug, mwen arété maké liv-la pou on tan, davwa mwen té kwè mwen té ajouté pawòl nan sa I té bay nan lèspri an-mwen é sa I té pozé nan kyè an-mwen ; lifè mwen mandé kò an-mwen si mwen té ka vini fou.

12:2 Magrésa, mwen di Sényè Bondyé sé pawòl-lasa : Tanpri, ban mwen on siny oben on vizyon mil fwa pli gran pasé sé pawòl-la ki ka vini jwenn mwen nan lèspri é kyè. Sé pawòl-la ki ka vini la, yo ka pérézité mwen, é mwen pè déklaré yo.

12:3 Mé, nan silans, Sényè-la réponn kon avansa, épi I di : Ès ou oblijé pè, gason an-Mwen? Ès ou pa kwè Mwen sé Gadyen a pawòl an-Mwen? Lè i ja voyé, kimoun ké arété’y? I kon flèch yo tiré anmitan lagè, i ka monté kon fizé pa-anlè sèk a Latè.

12:4 Pawòl an-Mwen ké touché mak a-y lamenm, asiré pa pétèt, davwa pèsonn pa ka touné’y ni agòch ni adwèt. Okontrè, i ka fè chimen drèt, ka fè vitès kon zéklè, é ka sonné kon loraj adan kyè.

12:5 Alòs, pa enkyèt pou pawòl an-Mwen! Déklaré épi gadé, davwa sèten Sényè-la ké akonpli’y.

12:6 Jété kon vyé had tout lapè ki ta-w ; ban Mwen kyè a-w é kouté pou tann! Konsa tout lidé ki ta-w ké vini kon lidé an-Mwen, é tout pawòl ki ta-w ké kon pawòl an-Mwen.

12:7 Méné ban Mwen tousa ki ta-w, é Mwen ké aprann vou lavérité. Épi kon ou mandé on siny, Mwen ké voyé’y ba’w.  

12:8 Konsa kyè a-w pé ké douté ankò, é i pé ké santi kon avan ; épi zyé a-w ké vwè sa yo pa té janmé vwè avan.

12:9 Sèlman, kon Lèspri a Sényè-la té ban mwen maké sé pawòl-lasa, mwen pa santi fyè, davwa mwen té kwè vi an-mwen té mérité plis jistis nan zyé a Bondyé.

12:10 Sa fè mwen sonjé tout sé biten-lasa, épi mwen té tris toubòlman.

12:11 Konsa mwen priyé : Sényè, mwen pa méyè pasé onnòt, pouki fodré mwen jwenn sé pawòl-lasa ki sòti koté’W? Ni tèlman sèvitè a Bondyé asi latè ; yo tout konnèt plis biten pasé mwen, épi yo la palé èvè plis konfyans pasé mwen.

12:12 Mwen sitèlman piti, é sitèlman jenn, mwen pa sa palé, é mwen ka suiv tras a-W dépi yonndé lanné sèlman.

12:13 Mwen pa pwòp, é dapré mwen, fo pa péché an-mwen douvan’W, davwa mwen sé on jennboug nan jennès toujou, épi délè lapenn mwen ni ka fè mwen jijé jan Ou ka travay.

12:14 Alòs, Sényè, touvé on moun ki pli fidèl, épi woté difé-la ki adan mwen, kilès toulongalé ka fè mwen vwè sa ki ka pasé dèyè rido, vérité kaché èvè Lèmonn adan kilès mwen oblijé viv, épi Légliz adan kilès mwen vlé viv.

12:15 Épi Bondyé Sényè di mwen : Mwen pa bizwen on moun ki konprann i pwòp a san pousan pou i rèsouvwè é pibliyé pawòl an-Mwen. Davwa, asi latè-lasa, pa ni yonn ki pwòp.

12:16 Mé, mi sa Mwen vlé : Sila ki ka pirifyé kò a-y, i ni pou kontinyé pirifyé ankò, épi la Mwen ké vidé pawòl an-Mwen adan’y.

12:17 Mwen pa ka chèché moun ki méyè mé séla ki ni zòrèy é zyé, é ki sav kijan pou sèvi yo.

12:18 Davwa séla ki ni zyé é zòrèy bouché, yo ké byen vwè mé yo pé ké gyè vwè, yo ké tann mé yo pé ké gyè tann.

12:19 Mwen pa ka mandé on nonm ki kwè i sen, mé yonn ki ka santifyé kò a-y. Anvré, moun ki kwè yo-menm sen, mé kyè a-yo pa an santé mé an salté, yo ka chèché lavérité mé yo pé ké touvé’y.

12:20 Ba sila ki vlé sèvi Mwen, yo ké ba’y on pawòl pou konsolé pèp an-Mwen. Mi, yo ka di sé jennès-la, “Sèvi Sényè-la” ; sèlman lè yo doubout, yo ka di yo, “Sizé”.

12:21 Mé Mwen ka déklaré pou zòt, Sényè YHWH di : Mwen ké fè sé jennès-la doubout drèt, é yo ké sèvi wòch pou zòt tribiché, bann stati blanchi ki zòt yé.

12:22 Yo konprann yo drèt é byen visé, épi ayen pé ké branné yo dapré kyè é lidé a-yo.  

12:23 Mé Mwen ka di zòt ankò onfwa : Pa baré chimen a mésajé Mwen voyé, davwa pisimyé yo maré on wòch-mèl alantou kou a-zòt é jété zòt nan lanmè.

12:24 Mwen ba sèvitè an-Mwen lenstrisyon, é travay an-Mwen ké fèt èvè yo.

12:25 Konsa zòt ké bazoudi alavwéri Sényè-la ka lévé dépi manmèl séla ki ké pwofétizé, palé, é dékatyé mové biten zòt ka fè.

12:26 Épi, davwa pèp an-Mwen vini avèg é soud, sé zanfan-lasa ki sòti fèt, yo-menm ké zyé é zòrèy pou yo. Sé toupiti-la ké ba zanfan an-Mwen lèt, on lèt yo nonmé lavi, é pa lanmò.

12:27 Pa ba Pawòl an-Mwen do, davwa i sé on lanp pou sila ki ni konfyans adan’y.

12:28 Pawòl an-Mwen ka méné limyè nan chimen-la zòt ka maché, épi sé èvè’y zòt ké vwè sèpan ki anba sé wòch-la koté zòt ka pilé, séla yo pozé nan chimen-la pou fè zòt tribiché.

12:29 Panga zòt di : Nou jenn ; kimoun ké kouté nou? Davwa, séla ki ké kouté zòt, sé yo adan kilès Lèspri an-Mwen fè bitasyon.

12:30 Mé séla ki pé ké kouté zòt prèmyé fwa-la, zòt pou di yo : Sényè-la pou fè zòt asèpté lavérité, davwa I plen konpasyon pou zanfan a-Y.

12:31 Épi séla mové kyè a-yo ké bat lagè kont zòt, di yo konsa :  Sényè YHWH ni pou boké zòt ki ka rèfizé kouté pawòl a-Y.