Témwen 18

18:1 Mi mésaj a Sényè-la pou séla ki ka maltrété pèp an-Mwen nan péyi Lend épi nasyon ki alantou a-y, koté yo ka bat lagè kont zanfan an-Mwen.

18:2 Moun ni pou sav sa MWEN YÉ, Sényè-la di. Épi Mwen-menm pa ka dòmi.

18:3 Mwen témwen pou tout sé mové biten-lasa, épi Mwen ka voyé pawòl an-Mwen alé, pou yo sav ja ni asé.

18:4 Di pèp-la, moun a-yo ja bésé an kantité afòs tonbé anba men a moun ki ka maltrété yo, sèlman Mwen YHWH pa obliyé yo. 

18:5 Dépi nanni nannan biten ka vini mové, épi yo kaché kò a-yo douvan zyé a lézòt.

18:6 Davwa yo ka èspéré pèp an-Mwen ké soufè nan silans. Mé, mi silans ka fè chimen pou on gran dézòd ; sé bwi chouval a onpil sòlda ki k’alé nan lagè pou délivré zanfan an-Mwen.

18:7 Moun ki té abandonné yo, yo sav fòs a-yo pa ayen alavwéri grandè sitiyasyon-la.

18:8 Anvré, yo ni rézon, davwa nonm pa kapab ayen lè Lènmi-la fè lidé varé moun ki jis ba Sényè-la, séla I té rédansyonné, séla I té kouvè èvè san a Lanyo.

18:9 Ében si sé konsa, lafen toupré pou yo. Mwen bay lenstrisyon pou zanj an-Mwen ki sen, mésajé an-Mwen ki ka ranmasé priyè a moun ki sen, é ki ka sanblé yo adan koup a kòlè an-Mwen.

18:10 Mi tan-la rivé pou vidé koup-la, pou dèstrisyon a moun mové tonbé asi yo, kon wòch ka déboulé gran Mòn-la.

18:11 Do a-yo ké krazé afòs dézolasyon-la, ki ké tonbé asi yo, ka pézi asi yo. Yo ké sav lafen toupré pou yo.

18:12 Déklaré sa, tigason a lézòm : YHWH ka woté éritaj a moun rich pou ba sé moun maléré.

18:13 La lézòm di zòt entouchab, mi YHWH, Bondyé-Vré, ka touché zòt é géri zòt.

18:14 Tan-la rivé pou on nonm rich vini pòv, é pou richès a-yo tonbé nan men a moun san ayen é moun san fanmi.

18:15 Zòt ni lidé zòt pwòp, mé nan zyé an-Mwen zòt sal kon labou nan lari. Men a-zòt sé pwazon-lanmò ki bay dézèspwa anmitan pèp a-zòt.

18:16 Gadé épi kouté pawòl Mwen ka bay, davwa, apa di sa pa ni ayan dòt pou zòt fè, étan zòt toudi tèlman zòt ké nan ladétrès.

18:17 Moun maléré ké viv èvè richès a-zòt, é yo achté tè a-zòt, pou moun louwé Sényè-Larmé koté on gran kantité moun nan pèp-la ké sanblé.

18:18 Mi, yo ké viv, épi yo ké pòtè-d’-Pawòl, davwa séla ki dènyé, yo ké ranpli èvè Lèspri é entélijans pou alé é préché Pawòl-la nan bann nasyon nan Léwòp é Lamérik.

18:19 Séla ki rèsouvwè Bon Nouvèl la an prèmyé ké vwè yo sòti dépi bann péyi Lafrik é Lazi, zanfan Mwen sòti fè, ki rédansyonné adan on lèmonn koté lanmizè pa té kapab gannyé asi lèspwa é lafwa yo ni.

18:20 Lè yo ké vini jwenn zòt, kouté yo épi rèpanti pou Mwen sa géri péyi a-zòt. Panga zòt di nan fonkyè, géri pou ki maladi. Davwa zòt ka menm vwè lè péyi a-zòt alagoni.

18:21 Zòt mò magré zòt vivan. Vi a-zòt sé yenki lanmizè, davwa lèspwa a-zòt disparèt, é i ja pran lavòl kon pousyè on toubouyon ka chayé alé.

18:22 Dapré zòt, zòt bon, sitèlman bon, zyé a-zòt ja garé zòt, épi kyè a-zòt ja fè zòt ba pawòl an-Mwen do.

18:23 Tout séla ki ka di, “Sényè, Sényè”, pé ké antré nan wayòm an-mwen, davwa p’on moun pa ka fè volonté an-Mwen kon Mwen té mandé. Zòt ka ba lavérité do pou chapé jwenn manti. Zòt pa hont!

18:24 A-a, si sé té sèl péché zòt ni douvan Mwen! Mé tini pli mové. Zòt doubout é zòt ka déklaré biten fo adan non an-Mwen.

18:25 Ba moun zòt pa enmé, zòt ka di, adan non a YHWH, nou hay yo. É-é, zòt pa hont méné malédisyon anlè sila ki vwazen é frè a-zòt? Ki lanmou zòt ka ba’y?  

18:26 Mwen ka vwè séla ki ka pran non an-Mwen pou ayen, ka di mi sé konsa Bondyé yé, é I pé ké asèpté on nonm mové kon’w! Mové bandi ki zòt yé, a ki zòt pou préché konsa ba vwazen a-zòt?

18:27 Davwa, zòt sav YHWH hay kèk biten zòt ka vwè nan vwaen a-zòt, mé ki biten I ni kont zòt? Mi zòt ka fè menm biten ki nonm-la, époutan zòt ka kondanné’y.

18:28 Sa byen fasil pou zòt vwè pay-la nan zyé a vwazen a-zòt, lè ou-menm pa ka vwè poto-la ki na zyé a-w! 

18:29 Lontan Mwen té palé ba lé-zansyen avan zòt, é Mwen ka fè’y èvè zòt toujou. Zòt li pawòl an-Mwen, é zòt konnèt sa ki adan.

18:30 Zòt ni pou konnèt fondè a Pawòl an-Mwen, pou zòt pratiké sa zòt ka préché, sa zòt konnèt.

18:31 Gadé, lè-la ka vini, i ja vansé, jou-la Gason a lézòm ké désann é jijé onpil moun ipokrit. Sèlman Mwen vlé zòt byen, alòs viré jwenn Mwen.

18:32 Pawòl a-zòt ni pou divini rivyè-bonté, épi kyè a-zòt divini koulé-lanmou. I ni pou ranpli èvè lanmou pou tout moun, zòt ni pou obéyi Mwen, avan Gason a kaz-la viré pou jijé moun fou é moun aristokrat.

18:33 Jou a-Y ka vini adan on tan, é Mwen ka mandé zòt paré, san di I ka tadé. Séla ki ka véyé é pa kité moun kouyonné yo, sé yo ki ké pli savan anmitan lézòm.