Témwen 30

30:1 Jou 18 janvyé 2009, kon mwen té ka kontinyé priyé pou Légliz-la, mé osi anrapò èvè lagè é dézòd nan lèmonn, mwen té ka pozé mwen kèsyon asi kijan Sényè Jézi-Kri té vlé sèvi mwen pou glorifyé Non a-Y.

30:2 Anvré, toulongalé I ka di mwen, mwen ni pou fè sa I ka di, pa lagé nan lapriyè, épi mwen ké lité èvè moun ki ka ba pawòl a-Y do. Mwen kalkilé asi sa, é mwen désidé sa I vlé pou mwen ni pou akonpli pou fè’Y plézi.

30:3 Mé, mwen mandé’Y : Sényè, si mwen té pé pa soufè, mé kité volonté a-W fèt, pa tan-mwen, menm jan Ou té di nan jaden Gètsémané.

30:4 Kon mwen priyé, Lèspri a YHWH vini jwenn mwen kon niyaj envizib, mwen santi’y  alantou mwen, épi mwen té ranpli èvè lapé nan kyè. Mwen santi mwen té ka najé adan on gran loséyan lanmou é konpasyon.

30:5 Konsa, mwen priyé ankò, davwa mwen té vlé Bondyé Sényè fè zanfan a-Y gras é béni yo, asèlfen yo kyenbé doubout nan jou tribilasyon ki ka vini.

30:6 Mwen pa té sav kisa sa té vlé di, mé Lèspri di mwen maké sé biten-lasa, davwa mwen té enkyèt pou sa ki pou rivé nan tan dèmen.

30:7 Mwen té enkyèt osi, davwa mwen pa té ka sanm divini on gran nonm kon Sényè-la té di mwen ké yé pou glorifyé’Y.

30:8 Kifè, mwen mandé’Y : Poukisa mwen pa ka palé asi divini kon lézòt pwofèt té ka fè? Onpil adan yo ka palé biten ki pou rivé nan divini toupré oben lwen, alòs ki mwen ka palé biten ki sanm yenki lokans sajès pou lézòt.

30:9 A ki on pwofèt, alò? Davwa mwen garé toubònman, é pa ni p’on moun pou bay on pal. Kijan yo ké sav Ou voyé mwen?

30:10 Épi Sényè-la réponn : Onpil moun ka palé sa yo pa ka vwè, épi yo ka èspéré pèp-la ké kwè yo. Konsa yo ka méné désèpsyon panmi yo.

30:11 Dépi an tan lontan, lézom ka chèché konnèt divini, kilès kaché pou yo. Mé, Mwen YHWH, Mwen ka hay travay divinè a-yo.

30:12 Ba’w, Mwen pòté tizing pawòl, davwa mésaj a-w sé pou pèp an-Mwen, kilès Mwen ka di, “Pa enkyèt”. Mwen toujou vèti pèp-la, épi tousa ki pou rivé ja maké nan Pawòl ki maké, menm si Mwen ka palé é révélé’w tibren plis ba pèp an-Mwen.

30:13 Davwa sé moun-la ka tòd sa ki maké nan Pawòl an-Mwen pou pwofité yo. Nou pa kriyé’w pou sanm sé madragè-lasa ki vlé ponnyé lézòm pou fè lajan é trapé glwa pou pwòp non a-yo.

30:14 Mé ou ni on mésaj asi sa sé moun-lasa pa ka vwè, é pou pa konnèt ayen non pli, davwa ka manké yo Lèspri a YHWH.

30:15 Mi, Légliz an-Mwen nan soufrans, é Mwen pé ké révélé plan Mwen tiré, ni divini, ba sé moun-lasa ki pa ka chèché Mwen nan lèspri é lavérité.

30:16 Zanfan an-mwen, ou ni pou kouté sa Mwen palé : Alé é maché alantou latè, épi préché Pawòl-la ou rèsouvwè.

30:17 Ou èvè séla ki frè a-w, zòt ni alé èvè zami a lapé, pou pwoklamé jistis é gras a Bondyé ba séla ki nan soufrans, épi kòlè é vanjans a Bondyé ba séla ki ka méné soufrans, é ki pa vlé rèpanti lè zòt vèti yo.

30:18 Pawòl a-w sé siny pou détwa moun é manti pou lézòt, mé séla ki pa vlé Mwen, yo ké jété yo andéyò Kaz an-Mwen.

30:19 Piskè nan Jou jijman, kondannasyon ké mové pou nenpòt moun yo pa touvé nan Liv a lavi. La, onpil ké pléré pannan lézòt ké réjwi, davwa yo té jwenn lavi.

30:20 Di séla ki frè é sè a-w : Ès sé tan pou zòt la ka paniké oben nan sékirité adan non a Krist? Ès sé tan pou zòt alarmé lézòt, oben pou zòt-menm enkyèt sitiyasyon alèkilé.

30:21 Ès zòt pa sav, sa ki pou rivé ké rivé? Davwa séla ki ka mandé on siny ké vwè’y anvré, davwa Mwen Sényè nan tout latè, ka sèvi tousa Mwen ni plézi pou glorifyé non an-Mwen.

30:22 Mwen sé Mèt nan tan é sézon, davwa jou-la Mwen ka travay, men an-Mwen lonji pou pawòl an-Mwen akonpli.

30:23 Gadé i ka vini, jou a lagras pou pèp a Jérizalèm, é pou séla ki asèpté Jézi-Kri, Sila ki Mési, Sényè a-yo.

30:24 Ni on tan pou tout biten, épi sé bon tan-la pou èspéré adan Mwen. Pouki rézon zòt ni pou pléré gwo-dlo kon rivyè? Suiyé zyé a-zòt é gadé douvan.

30:25 Sila ki Vré Mésajé ka rivé é pwoklamé pawòl a-Y ki ni lapé, sila Li tousèl ka bay.

30:26 Pa kité chouval a-zòt soufè distans épi arété nan chimen-la, davwa I pou parèt kon zéklè, épi séla ki tanté arété pannan yo k’alé, yo ké manké’Y.

30:27 Pèp-la ka mandé on siny, é Mwen ka ba yo yonn ki pa on nouvo siny : Onò é lévé kont Osid, épi lagè ké pran kont Jérizalèm.

30:28 Épi yo ké pilé’y, kon zòt sav, épi tousa zafè ki pou pasé, zòt pé ké lévé sa di gad ni an zyé, ni an kyè.

30:29 Épi akòz pawòl i ké palé, prens-la ké voyé dlo nan difé, épi lè dòt nasyon ké vini, katafal ké monté oplis.

30:30 Alòs, sila ki fo mésajé ké vini, nonm-la ki plen pawòl madragè. I ké pwoklamé on lapé tout moun swèf, é pawòl i di ké akonpli, épi tout moun ké enme’y. Konsa i ké pwofité asi yo é kyouyé yo.

30:31 I ké mandé yo fè on plas-sizé pou pòt-pawòl a-y, pwofèt-la ki ka manti la, anmitan mové Jérizalèm.

30:32 Épi vil-la ké kriyé nan doulè pannan Lyannaj Alwès, nan tout grandè a-y, pé ké lévé tann li plédé é pé ké fè ayen pou’y, menm zanmi a-y, gran nasyon-la ki alwès, onkontrè lézòt fwa, i pé ké fè ayen ba’y.

30:33 Pannansitan, dépi péyi zòt déklaré pòv, séla ki Twazyèm-Lèmonn, jenn moun ké lévé, é yo ké alé koté nasyon san Bondyé pou pwoklamé pawòl an-Mwen kon Mwen té ba moun li.

30:34 Yo ké divini Prèmyé-Lèmonn, épi pa men a-yo onpil gran mirak é siny ké fèt nan koté lézòm sanblé, é nan kyè lézòm ni. Mé onpil moun pé ké kouté mésaj a-yo.

30:35 Yo ké pwoklamé pawòl an-Mwen, mé akòz sa, moun ké présé yo ajékontinyé, kon tout moun ki ké tan-Mwen nan sé jou-lasa.

30:36 Séla ki gason a lézòm ka mandé lapé, kèlkanswa la i sòti, épi yo ké jwenn li koté nonm a péché lasa, kilès travay a-y sòti dépi an tan lontan, menm avan lèmonn té kréyé.

30:37 Li osi ké maché nan lachè anmitan lézòm, mé i pé ké palé lanmou é lagras a Bondyé, davwa i pa konnèt lanmou. Sé pa siny-lasa zòt ké konnèt li.

30:38 Lè dé témwen an-Mwen ké vini, sé ké abominasyon oplis, nan tousa ki ké fèt kont Sila ki Pli-Ho, kont Sila I chwazi, é kont Kaz a-Y.

30:39 Pou sèvi pwovokasyon, sila ki mové, gason a Satan, ké sizé asi twòn-la é déklaré, “Mwen sé Bondyé”.

30:40 Menm si onpil ja vini é déklaré yo sé dyé, sila pé ké kon lézòt moun avan’y, épi anvré i pli gran pasé moun.

30:41 Konsa tout lézòm ké kwè adan’y é adoré’y, paskè siny é mèrvèy i fè ké sèvi’y témwen. Davwa i ké kriyé non a papa-y épi travay dapré lèspri malsen a-y.

30:42 Sa ja ka pasé ; alòs, Mwen ka fè zòt sonjé zòt kouté mésajé an-Mwen. Davwa yo ké vini nan konfyans, épi men a YHWH ké fè sa.

30:43 Pèp an-Mwen ni pou konnèt sé biten-lasa, davwa san konnésans yo ka péri. Épi menm lè yo ni konnésans, si yo ka vlé’y, yo ké péri osi.

30:44 Ès Mwen anvi fè zòt pè oben ba zòt asirans? Mwen ka di zòt tout : Kwè adan Mwen épi maché nan limyè-la.

30:45 Épi évité sa ki mal, é biten nan nwèsè, ki kaché nan zyé a lézòm ; davwa sila ki ka chèché ka touvé limyè, i ké vwè klè sa i pa té sa vwè lè-ou-vwè vwèl-la tonbé.

30:46 Anvré, Sényè Jézi, sé Li ki ba moun avèg vizyon, é ka pòté konnésans ba on ras moun inyoran.

30:47 Palé ba pèp-la : Limyè-la ka ouvè zyé nan tèt a mòn a Bondyé, épi sé chan-la ja ka vini blan pou rékòlté. Solèy-maten ka pli klè, alòs imajiné jan I ké yé anmidi.

30:48 Mé sé fo pwofèt-la ka di zòt, pèp-la : Sa sé siny a Sényè-la, épi sa sé pawòl a Bondyé.

30:49 Sèlman zòt pa ka tèsté nan limyè a Pawòl an-Mwen, sé siny-la zòt ka vwè la, é sé pawòl-la zòt ka tann chak jou.

30:50 Ès zòt pa té tann oben zòt ja obliyé, anmitan zòt on-paké fo pwofèt ké sòti, séla mové plan yo tiré èvè tout dèstrisyon tiré yo té ja pwofétizé pa Énòk é tout sé pwofèt-la.

30:51 Lènmi-la gajé adan on gran batay dépi koumansman, sèlman zòt ka dòmi asi kouch a sanfouté.

30:52 A pa ti fasil sa fasil, kyouyé on nonm asi kouch a-y pannan i ka dòmi, plito ki bat lagè kont li pannan lépé a-y nan men a-y.

30:53 Kifè, mété zòt kon vré sòlda a Bondyé é mété asi kò a-zòt zami a lajistis.

30:54 Chan-batay la sé yenki san ka koulé, davwa sé kantité moun blésé é moun mò

30:55 Mé yo kouché atè-la, épi bann sòlda nan kan a lènmi-la ka pilé yo.

30:56 Kifè, pran pokosyon la ou ka pozé pyé a-w, é gadé vwè si kèk moun adan séla ki kouché atè-la ka rèspiré toujou, é si yo pé sové toujou.

30:57 Ba yo tigout dlo pou bwè, épi timiyèt pen pou yo manjé ; vidé tigout diven asi bobo a-yo, bandé yo èvè on bann-twèl ki pa anchèpi. Méné yo lopital, é pran swen a-yo.

30:58 Davwa yo ni pou viré anlè chan-batay la, davwa frè é sè a-yo ka èspéré yo. Yo ni pou woupran fòs é viré goumé ; yo ké méné èvè yo twonpèt-la ki ka déklaré Komandan a Larmé-la ka vini.

30:59 Onpil ka goumé nan batay a lavi, mé a pa zòt ki pwotèksyon pou yo? Kifè, zòt ni pou asiré frè é sè a-zòt nan kréyasyon é nan woukréyasyon ké santi kò a-yo nan sékirité, épi pou yo pa manké ayen nan sa Krist té ba zòt pou kado.

30:60 Goumé pou yo, pou kòz a Sila ki Wa pou zòt, davwa sé zòt ki avwè bon zam. Ti baton a-yo initil douvan lépé a lènmi a-yo. Mé zòt ni on Lépé, é plis ankò, on Wa akoté zòt.

30:61 O, pèp a YHWH, konprann pawòl an-Mwen, davwa Mwen sé Sila ki enmé zòt é ki ka ba zòt lavi.

30:62 Pran jwa an-Mwen nan tout grandè ki ta-y, obéyi Mwen èvè tout fonkyè dévo pou Wa-la, kon zòt ka kouté vwa a-Y.

30:63 Davwa zòt sé sòlda an-Mwen, é èvè men a-zòt Mwen ké fè gran biten asi latè é nan laj-tan lasa.