Yé Krak Avanlokans
Lè vyé nonm-la fini, mwen, Tobi, rakonté,
Prèmyé fwa-la man vini tann on bèt palé :
“On aprémidi man la ka ba poul manjé,
Man ka tann : “Grenn mayi ankò, man ni asé.
Toulé jou, dimanch pou sanmdi. Mé k’a sa yé ?
Sèten on jou dèmen man pou bèkté misyé!”
“A ki la ?” man ka di, ka gadé alantou ;
Mé pa ni ponmoun, man tousèl adan lakou.
“Zòt ka vwè sa, tiboug-lasa koumansé fou.”
Sé menm ti vwa-la man ka tann palé toujou.
Douvan kalòj-la, man ka désann ajounou.
Sila ki ka réponn man ka ba’y boukousou.”
Man ka di sa an lidé obliyé man pè,
Époutan, rivé on biten man pòkò vwè :
On poul ka palé : “Fout tiboug-lasa tèbè !”
Alatandé sa, man ka rété bèkèkè.
Man ni lanvi kouri, sèlman man ka pran kè ;
Man ka di : “Man k’alé koupé kou a-w talè !”
An kalòj, poul ka volé an tout dirèksyon,
Agòch adwèt, yo pa ka touvé pozisyon.
Pousyè anlè ka fè on manman toubouyon.
Yo ka di : “Ou vwè sa, sakré modi kouyon !
Tout lasimenn yo ka di’w bèk a-w la pa bon.
Ou two malpalan, é dèyè sa, ou kapon.”
On dòt ka mandé : “Zòt ka kwè i ka konprann ?”
Épi on dèzyèm ka di : “Ès i ka menm tann ?”
On twazyèm ka hélé : “Man pa vlé sèvi vyann !”
Adan tousa bakannal, man ka di, “Atann !
Tout moun ki jiké anlè, zòt ni pou désann,
Dépi jòdi, zòt tout pou ponmlé an savann.”
Sé mwen ki kontè-la, mwen pa rakonté zikak !
Yé mistikrik ! Yé mistikrak !
Pawòl an-mwen pa dlo brak !
Istwa-dè-di, kon man fini, nou k’ay kouché. Krak !
Ajouter un commentaire
Commentaires