Konfésyon Atanaz

Nenpòt moun ki vlé sové, avan tout biten i ni pou kyenbé lafwa inivèsèl (katolik). Si i pa kyenbé'y antyè é pwòp, san douté i ké péri pou létènité.

Mi lafwa inivèsèl (katolik) : nou ka adoré yon Bondyé nan Trinité, é Trinité nan Linité, san konfonn chak Pèsonalité, ni divizé Sistans. Davwa tini yon Pèsonalité nan Papa, yon lòt nan Gason, yon lòt nan Lèspri-Sen. Mé tini yon Divinité nan Papa, nan Gason, é nan Lèspri-Sen : laglwa égal, majèsté parèy étènèl. Jan Papa yé, menm jan Gason yé, menm Lèspri-Sen yé osi : Papa non-kréyé,  Gason non-kréyé, Lèspri-Sen non-kréyé ; Papa enfini, Gason enfini, Lèspri-Sen enfini ; Papa étènèl, Gason étènèl, Lèspri-Sen étènèl. Époutan yo pa twa étènèl, mé yon Étènèl ; menm jan yo pa twa non-kréyé, ni twa enfini, mé yon non-kréyé é yon enfini. Parèyman, Papa toupuisan, Gason toupuisan, Lèspri-Sen toupuisan ; époutan yo pa twa toupuisan, mé yon toupuisan. Alòs, Papa sé Bondyé, Gason sé Bondyé, Lèspri-Sen sé Bondyé. Époutan yo pa twa Bondyé, mé yon Bondyé. Parèyman Papa sé Sényè, Gason sé Sényè, Lèspri-Sen sé Sényè ; époutan yo pa twa Sényè, mé yon Sényè. Davwa, menm jan lavérité krétyen ka oblijé nou rèkonnèt chak Pèsonalité pou Li-menm sé Bondyé é Sényè, menm jan rélijyon inivèsèl (katolik) ka défandi nou di tini twa Bondyé oben twa Sényè.

Papa pa fèt pa p'on moun, é I pa ni kréyé, ni zanfanté ; Gason sòti nan Papa tousèl, é I pa ni fèt, ni kréyé, mé zanfanté ; Lèspri-Sen sòti nan Papa é Gason, é I pa ni fèt, ni kréyé, ni zanfanté, mé I pwosédé. Alòs tini yon Papa, pa twa Papa ; yon Gason, pa twa Gason ; yon Lèspri-Sen, pa twa Lèspri-Sen. Épi nan Trinité-lasa, pa ni yonn ki avan oben apré yon lòt, pa ni yonn ki pli gran oben pli pitit ki yon lòt ; mé toulé twa Pèsonalité, yo étènèl ansanm, é égal parèy. Sitèlman, adan tout biten, kon sa ki maké avan, nou ni pou adoré  Linité nan Trinité, é Trinité nan Linité. Alòs, nenpòt moun ki vlé sové, i ni pou kwè sa asi Latrinité.

Anplis, pou sovasyon étènèl, fo moun-la kwè osi èvè fidélité nan lenkarnasyon a Sényè an-nou Jézi-Kri. Davwa mi lafwa ki drèt (òwtodòks) : nou ka kwè é konfésé, Sényè an-nou Jézi-Kri, Gason a Bondyé, sé Bondyé é Nonm. I sé Bondyé nan sistans a Papa, zanfanté avan lèmonn, é I sé Nonm nan sistans a manman-y, èvè nésans adan lèmonn. Bondyé ki parfèt, Nonm ki parfèt, èvè sistans nanm plen rézon é chè a lézòm, égal kon Papa nan divinité, enféryè a Papa nan limanité. Menm si I sé Bondyé é Nonm, kanmensa pa tini dé Krist, mé yon Krist : Yonn, pa atravè transfòmasyon a divinité nan chè, mé atravè asèptasyon a limanité nan Bondyé ; yon sanblé, pa atravè mélanj nan sistans, mé atravè linité nan pèsonalité. Davwa, menm jan nanm plen rézon èvè kò sé yon nonm, menm jan Bondyé èvè nonm sé yon Krist. Sila soufè pou nou té sové, I désann nan lanfè, twazyèm jou I résisité anmitan moun mò, I monté nan syèl, I sizé asi lanmen dwèt a Papa, koté I ké sòti é vini jijé moun vivan é moun mò. Lè I vini, tout moun ké résisité èvè kò a-yo, é ké rann kont pou zouvraj yo fè : séla ki fè byen ké alé nan lavi étènèl, séla ki fè mal nan difé étènèl.

Mi sa ki lafwa inivèsèl (katolik) : nenpòt moun ki pa ka kwè èvè fidélité é asirans, i pé ké sové.