Sòm 34

Ta David. Lè i té fè lasanblan fou douvan Abimélèk, kilès té chasé’y, épi i té pati.

1  Mwen ké béni YHWH chak lè ki pasé ; louwanj a-Y ké nan bouch an-mwen ajékontinyé.

2  Nanm an-mwen pou vanté nan YHWH ; moun kyè-atè pou tann sa é yo pou kontan.

3  Lévé YHWH anlè èvè mwen ; ansanm annou glorifyé non a-Y!

4  Mwen chèché YHWH, é I tann mwen ; I délivré mwen nan tout lapè mwen trapé.

5  Lè moun ka gadé’Y, yo ka kléré kon limyè ; figi a-yo pa ka janmé kouvè èvè lahont.

6  Nonm-la ki maléré kriyé, épi YHWH tann li ; I sové’y nan tout détrès i ni.

7  Zanj a YHWH ka kanpé alantou moun ki ka krenn Li, é I ka délivré yo.

8  Mi, gouté é vwè jan YHWH bon ; I béni, sila ki pran kachèt adan’Y.

9  Krenn YHWH, zòt ki sen pou’Y! Moun ki ka krenn Li, yo pa manké ayen.

10  Jenn liyon adan nésésité é lafen ; mé moun ki ka chèché YHWH pa manké ayen ki bon.

11  Vini, zanfan, é kouté mwen ; mwen ké aprann zòt lakrent pou YHWH.

12  Si yonn adan zòt enmé lavi é anvi vwè onpil bon jou,

13  I ni pou kyenbé lang a-y lwen méchansté, épi lèv a-y lwen pawòl madragè ;

14  Fo i kité sa ki mal, é fè sa ki byen ; chèché lapé é kouri dèyè’y.

15  Zyé a YHWH anlè moun ki jis, é zòrèy a-Y ka tann yo kriyé.

16  Figi a YHWH kont moun ki mové, pou moun pa sonjé yo asi latè.

17  Moun ki jis ka kriyé, é YHWH ka tann, épi I ka délivré yo anba tout détrès yo ni.

18  YHWH toupré moun èvè kyè bréché, é I ka sové séla ki ni lèspri krazé.

19  A pa ti mizè pou on moun ki jis, mé YHWH ka délivré’y anba yo tout.

20  I ka kyenbé tout zo a-y ; p'on yonn adan yo pa krazé.

21  Malè ké kyouyé moun mové, é moun ki hay séla ki jis, yo ké kondanné.

22  YHWH ka rachté nanm a sèvitè a-Y, é p'on moun ki fonfyan adan'Y pé ké kondanné.