Pou chèf-mizisyen. Ta David, sèvitè a YHWH.
1 On mésaj andidan kyè an-mwen asi mannyè sila ki méchan ka fè mal ; pa ni lakrent pou Bondyé douvan zyé a-y.
2 Davwa i ka flaté kò a-y nan dé zyé a-y, pou jwenn enjistis i ka fè é pou lahenn.
3 Pawòl a bouch a-y sé méchansté é madrag ; i sispann pran sajès é fè byen.
4 I ka tiré mové plan asi kouch a-y ; i ka mété pyé a-y asi on chimen ki pa bon ; i pa ka méprizé sa ki mal.
5 Lagras a-W, YHWH, ka touché syèl. Fidélité a-W ka kontré niyaj.
6 Jistis a-W kon montangn pré Bondyé ; jijman a-W kon granfon-dlo ; YHWH, Ou ka soutyenn ki moun ki bèt.
7 Gadé jan bonté a-W ni valè, Bondyé! Mi pou sa lézòm ka kaché anba lonbraj a zèl a-W.
8 Yo ka plen vant nan kaz a-W ki chajé orabò, é Ou ka ba yo bwè nan rivyè a-W ki chajé plézi.
9 Davwa toupré’W sé fontenn a lavi ; nan limyè a-W nou ka vwè limyè.
10 Kontinyé nan bonté a-W ba moun ki konnèt Vou, é nan jistis a-W ba moun ki ni kyè drèt.
11 Pa kité pyé a moun awogan vini kont mwen, é pa kité men a moun méchan fè mwen alé.
12 Gadé sa! Moun nan péché ja tonbé ; yo chalviré, é yo pa sa lévé.
Ajouter un commentaire
Commentaires