Sòm 38

On sòm a David. Pou nou sonjé.

1  YHWH, pa blanmé mwen lè Ou faché, ni pini mwen lè Ou anrajé.

2  Davwa flèch a-W pèsè fon, é men a-W pézé asi mwen.

3  Pa ni lasanté nan kò an-mwen paskè Ou kòlè ; pa ni djòkté nan zo an-mwen akòz mwen péché.

4  Davwa enjistis an-mwen kouvè tèt an-mwen ; kon chaj ka pézé, yo two lou pou mwen.

5  Bobo an-mwen ka santi é yo plen pi, davwa mwen té fou.

6  Mwen kòvyé, mwen atè kon vè-tè ; tout lajouné mwen nan lapenn.

7  Davwa ren an-mwen ni gwo doulè ; é pa ni lasanté nan kò an-mwen.

8  Mwen fèb é mwen krazé ; mwen ka jémi onpil afòs kyè an-mwen trakasé.

9  Sényè, douvan’W sa mwen déziré yé ; é douvan’W, sa mwen soupiré pa kaché.

10  Kyè an-mwen ka souflé, fòs ka lagé mwen ; é limyè a zyé an-mwen, yo osi ja kité mwen.

11  Lé zanmi é konpè, yo ka rété olwen dévenn an-mwen ; lafanmi ka rété alakat.

12  Moun ki vlé kyouyé mwen, yo ka tann zatrap épi moun ki vlé blésé mwen, yo ka palé malè ; tout lajouné yo ka konploté é manti.

13  Mé mwen kon moun soud ki pa ka tann ; mwen kon moun baba ki pa sa palé.

14  Mi mwen kon nonm ki pa ka tann, é ki pa ni répons nan bouch a-y.

15  Davwa sé’W, YHWH, mwen ka èspéré ; Ou ké tann, Sényè, Bondyé an-mwen.

16  Davwa mwen di : “Panga yo réjwi asi mwen, lè mwen bigidi ; panga yo pran pyé asi mwen.”

17  Davwa mwen près tonbé, é penn an-mwen èvè mwen toulongalé.

18  Davwa enjistis mwen fè, mwen ké déklaré, é mwen ké nan traka pou péché mwen fè.

19  Sèlman, lènmi an-mwen, yo djòk é yo fò ; séla ki hay mwen san kòz, yo ka fè tilili.

20  Épi séla ki ka rann mal pou byen, yo sé rival an-mwen, davwa mwen vlé sa ki byen.

21  Pa abandonné mwen, YHWH. Bondyé an-mwen, pa rété lwen mwen.

22  Vini édé mwen vitman, Sényè ki délivrans an-mwen.