Sòm 39

Pou chèf-mizisyen. Pou Jédoutoun. On sòm a David.

1  Mwen té di, “Mwen ké véyé lavi an-mwen, pou mwen pa péché èvè lang an-mwen ; mwen ké mété on brid nan bouch an-mwen, lè moun méchan douvan mwen.

2  Mwen té an silans san palé, mwen pé bouch menm pou sa ki bon ; magré sa soufrans an-mwen té pli gran.

3  Kyè an-mwen té cho andidan mwen ; pannan mwen té ka kalkilé, difé té ka brilé. Mi, lang an-mwen palé :

4  “YHWH, fè mwen konnèt fen a vi an-mwen é kantité jou ka rété mwen, pou mwen sav kijan mwen frajil.

5  Mi, Ou ban mwen yonndé jou laj kon lanmen, épi laj an-mwen sé kon ayen douvan’W ; asiré pa pétèt, tout nonm byen doubout sé yenki dlo-vapè.  – Kanpo

6  Asiré, tout nonm ka drivé kon lonbraj ; asiré, yo ka woulé pou ayen ; i ka anpilé richès é pa sav kimoun ké trapé yo apré.

7  “Aprézan, Sényè, kisa mwen pé èspéré? Sé adan’W mwen ni lèspwa.

8  Délivré mwen anba tout fòt mwen fè, pa kité moun fou moké mwen.

9  Mwen rété san palé, mwen pa ouvè bouch, davwa sé’W ki fè sa.

10  Woté mal a-W anlè mwen! Afòs men a-W bat mwen, mwen alagoni.

11  Lè Ou ka pini moun pou korijé fòt yo fè, tousa ki bèl ba’y, mi Ou ka brilé’y kon mit. Asiré pa pétèt, tout nonm sé yenki dlo-vapè. – Kanpo

12  Kouté mwen priyé, YHWH, é ouvè zòrèy lè mwen kriyé ; pa rété san palé lè mwen pléré ; davwa mwen sé on étranjé ora’W, on pasajé kon lé-zansyen avan mwen.

13  Woté zyé a-W asi mwen, pou mwen pran tibren souf. Avan mwen alé é kité latè.